- 2019-04-11 07:01:27
- ប្រដាល់
គ្រូ ហ៊ុន ច័ន្ទរាជ្យ បង្ហើបថា សុខ ធី អាចនឹងឡើងសង្វៀនអន្តរជាតិឆាប់ៗ
- 2019-04-11 07:01:27
- ចំនួនមតិ 0 | ចំនួនចែករំលែក 0
គ្រូ ហ៊ុន ច័ន្ទរាជ្យ បង្ហើបថា សុខ ធី អាចនឹងឡើងសង្វៀនអន្តរជាតិឆាប់ៗ
ចន្លោះមិនឃើញ
លោក ហ៊ុន ច័ន្ទរាជ្យ គ្រូបង្វឹករបស់ក្លឹប Cambodian Top Team បានលើកឡើងពីអ្នកលេងគុនខ្មែរ សុខ ធី ហៅ កាកា នៅតែមានទីផ្សារប្រដាល់តាមប៉ុស្តិ៍នានានៅប្រទេសថៃ និងលើសង្វៀនកម្រិតពិភពលោក One Championship ដែលទទួលបានការគាំទ្រច្រើនសន្ធឹកសន្ទាប់នៅកម្ពុជា។
លោក ហ៊ុន ច័ន្ទរាជ្យ បានបញ្ចេញទស្សនៈថា ៖«វាជារឿងធម្មតាទេពេល សុខ ធី ព្រលយថាមិនប្រកួតនៅស្រុកខ្មែរ ក្រោយអន់ចិត្តនឹងលទ្ធផល ប៉ុន្តែរូបគេនៅតែមានការផ្គូផ្គងឲ្យប្រកួតជាហូរហែនៅតាមសង្វៀនស្ថានីយទូរទស្សន៍របស់ថៃ និង ជាកីឡាករប្រចាំនៅសង្វៀន One Championship ដែរ។ ពេលគេមកស្រុកខ្មែរ គេហ្វឹកហាត់នៅក្លឹបខ្ញុំ ហើយទៅថៃ គេហ្វឹកហាត់នៅថៃយ៉ាងខ្ជាប់ខ្ជួន។ ខ្ញុំនៅតែបន្តជួយជ្រោមជ្រែងដដែលដើម្បីឲ្យរូបគេបានទៅប្រកួតនៅក្រៅស្រុក»។
យ៉ាងណាក្ដី គ្រូបង្វឹកវ័យ ៣១ ឆ្នាំរូបនេះគូសបញ្ជាក់ទៀតថា កីឡាករវ័យ២២ឆ្នាំខាងលើមានសមត្ថភាព និងមានបទពិសោធន៍ច្រើននៅប្រទេសថៃ។ អ្នកគាំទ្រនៅតែឃើញអំពីសមត្ថភាពរបស់គេនៅឡើងសង្វៀនលំដាប់អន្តរជាតិ។
កាកា បានឡើងប្រកួតលើសង្វៀនកម្រិតអន្តរជាតិ One ២ដង ដែលលើកទី១ ចាញ់កីឡាករថៃ Leadsila ដោយពិន្ទុ កាលពាក់កណ្ដាលឆ្នាំ ២០១៨។ បន្ទាប់មក សង្វៀនដដែលនេះតម្រូវឲ្យមានការប្រកួតសងសឹក ប៉ុន្តែ កាកា នៅតែចាញ់ពិន្ទុ លើកីឡាករថៃដដែល ក្នុងជំនួបសងសឹកកាលចុងឆ្នាំ ២០១៨។
អគ្គលេខាធិការសហព័ន្ធកីឡាយុទ្ធគុនចម្រុះកម្ពុជារំពឹងថា សុខ ធី អាចនឹងបង្ហាញមុខលើសង្វៀន One នាពេលឆាប់ៗខាងមុខ។
សុខ ធី ត្រូវបានសហព័ន្ធកីឡាប្រដាល់គុនខ្មែរពិន័យរយៈពេល៦ខែកាលដើមខែធ្នូ ឆ្នាំ ២០១៨ មិនឲ្យឡើងសង្វៀនប្រដាល់ទាំងក្នុង និង ក្រៅប្រទេស ពាក់ព័ន្ធរឿងតវ៉ាមិនព្រមទទួលយកលទ្ធផលនៃការប្រកួតកាលពីពេលកន្លងទៅទល់នឹងកីឡាករថៃនៅសង្វៀន ស៊ីអិនស៊ី ក្នុងការប្រកួតវគ្គជម្រុះដណ្ដើមខ្សែក្រវាត់មួយ៕
ទស្សនាប្រវត្តិ សុខ ធី