- 2017-12-27 23:25:00
- ប្រវត្តិ
ត្រកូលឡៅទាំង៣ជោគជ័យស្ទើរគ្មានគូប្រៀបតាំងពីដំបូង
- 2017-12-27 23:25:00
- ចំនួនមតិ 0 | ចំនួនចែករំលែក 0
ត្រកូលឡៅទាំង៣ជោគជ័យស្ទើរគ្មានគូប្រៀបតាំងពីដំបូង
ចន្លោះមិនឃើញ
អ្នកលេងគុនខ្មែរត្រកូលឡៅ៣នាក់គឺ ឡៅ ស៊ីណាត ឡៅ ចន្ទ្រា និង ឡៅ ចិត្រាបានបោះជំហានចូលសង្វៀនប្រដាល់បង្ហាញភាពខ្លាំងស្ទើរដូចគ្នាតាំងពីចាប់ផ្តើមដំបូង និងទទួលបានជោគជ័យរៀងៗខ្លួន។
អតីតជើងខ្លាំង ឡៅ ស៊ីណាត
អ្នកតាមដានវិស័យកីឡាប្រដាល់ប្រហែលជាស្គាល់យ៉ាងច្បាស់ពីសមត្ថភាព ឡៅ ស៊ីណាតពេលដែលរូបគេលេចមុខលើសង្វៀន។ គេនៅចាំបានថា ប្រហែលជា២៥ប្រកួតដំបូង កីឡាកររូបនេះមិនទាន់ស្គាល់បរាជ័យម្តងណាឡើយ។ អ្វីដែលចាប់អារម្មណ៍ខ្លាំងបំផុតលើ ឡៅ ស៊ីណាតមានភាពល្បីល្បាញ២ចំណុចដែលធ្វើឲ្យកក្រើកខ្លាំងក្នុងពិភពប្រដាល់គុនខ្មែរ។
ទីមួយ រូបគេឈ្នះខ្សែក្រវាត់នៅសង្វៀនសង្វៀន CTN។ ពេល ឡៅ ស៊ីណាត ឈ្នះខ្សែក្រវាត់នៅសង្វៀន CTN អ្នករៀបចំកម្មវិធីបានរៀបចំឲ្យមានការប្រកួតដណ្ដើមខ្សែក្រវាត់បន្តបន្ទាប់ និងដាក់ឲ្យប្រកួតការពារខ្សែក្រវាត់ថែមទៀត។ ពេលនោះអតីតកីឡាកររូបនេះធ្វើបានយ៉ាងល្អ និងការពារខ្សែក្រវាត់របស់ខ្លួនបានជោគជ័យជាបន្តបន្ទាប់។ ទីពីរ ការប្រកួតរបស់គេទល់នឹងអ្នកលេងកណ្តាប់ដៃឥតស្រមោល ប៉ឹត ខាំ នៅសង្វៀនTV5។ ការប្រកួតរបស់អ្នកទាំងពីរពិតជាកក្រើកខ្លាំងណាស់។ ស៊ីណាបានផ្តួល ប៉ឹត ខាំ ឲ្យសន្លប់ ប៉ុន្តែ ឡៅ ស៊ីណាត ក៏ធ្លាប់សន្លប់របស់ប៉ឹត ខាំដែរ។
យ៉ាងណាភាពខ្លាំងរបស់ ឡៅ ស៊ីណាត បានធ្លាក់ចុះបន្តិចម្តងៗ នៅពេលរូបគេអាយុកាន់តែច្រើន។ មុនពេលឈប់ឡើងសង្វៀនក្លាយជាអាជ្ញាកណ្តាល រូបគេបានប្រកួតជាមួយកីឡាករបរទេសជាច្រើនដង ហើយចុងក្រោយបានរបួសបាក់ជើងរហូតឈប់ពីប្រដាល់កាលពីឆ្នាំ២០១៦។
ម្ចាស់ខ្សែក្រវាត់៣គ្រឿង ឡៅ ចន្ទ្រា
ប្អូនប្រុសរបស់ ឡៅ ស៊ីណាត នេះទទួលបានការចាប់អារម្មណ៍ពីមហាជនយ៉ាងខ្លាំងរហូតបុគ្គលល្បីៗមួយចំនួនហៅរូបគេថាជា អធិរាជកែងឆេះ ជង្គង់ហោះ ដែលស្នងពីលោក អេ ភូថង ទៀតផង។ ចាប់ផ្តើមឡើងសង្វៀនភ្លាម ឡៅ ចន្ទ្រា បានបង្កព្យុះភ្លៀងយ៉ាងខ្លាំងដែលប្រហែលជា២០ប្រកួតដំបូងមិនដែលចាញ់ឡើយដូច ឡៅ ស៊ីណាតដែរ។
អ្វីដែលគួរកត់សំគាល់ភាពខ្លាំងរបស់ ឡៅ ចន្ទ្រា តាមរយៈការឈ្នះខ្សែក្រវាត់៣ដងគឺខ្សែក្រវាត់នៅ PNN១ ឈ្នះខ្សែក្រវាត់នៅ CTN១ និងឈ្នះខ្សែក្រវាត់នៅបាយ័ន១។ ការប្រកួតឈ្នះខ្សែក្រវាត់ទាំង៣នេះគឺតាំងពីវគ្គសន្សំពិន្ទុរហូតដល់វគ្គផ្តាច់ព្រ័ត្រ រូបគេវ៉ៃឈ្នះទាំងអស់។ រឿងមួយទៀត ឡៅ ចន្ទ្រា ឈ្នះមេដាយមាសពីព្រឹត្តិការណ៍កីឡាជាតិ តែយ៉ាងណាមិនទៅប្រកួតកីឡាស៊ីហ្គេមទេ។
ចំពោះការប្រកួតជាមួយកីឡាករកម្ពុជាដូចគ្នាគឺ ផាន់ គ្រាន់ និង ផល សោភ័ណ្ឌ ដែលធ្វើឲ្យមហាជនចាប់អារម្មណ៍ខ្លាំង។ ក្រៅពីនោះរូបគេវ៉ៃជាមួយកីឡាករបរទេសរហូតដល់សព្វថ្ងៃនេះ និងសាងកេរ្តិ៍ល្បីរន្ទឺមិនថមថយឡើយ។ រូបគេនៅមានឱកាសសាងកេរ្តិ៍ឈ្មោះ និងបង្កើតស្នាដៃច្រើនឆ្នាំទៀត។
ម្ចាស់មេដាយសំរឹទ្ធស៊ីហ្គេម ឡៅ ចិត្រា
ម្ចាស់មេដាយសំរឹទ្ធស៊ីហ្គេមរូបនេះត្រូវបានគេស្គាល់កាលពីឆ្នាំ២០១៦ដោយគ្រាន់តែឡើងសង្វៀនភ្លាម ត្រូវបានគេចាប់អារម្មណ៍តែម្តង។ តាមរយៈកាយសម្បទាអំណោយផល និងស្នៀតវ៉ៃល្អ ព្រមទាំងទឹកចិត្តក្លាហានផងនោះបានធ្វើឲ្យរូបគេល្បីល្បាញយ៉ាងឆាប់រហ័ស និងវ៉ៃជាមួយកីឡាករបរទេសរហូត។
ឆ្នាំ២០១៦ ឡៅ ចិត្ រាទទួលបានជោគជ័យជាបន្តបន្ទាប់សម្រាប់ការប្រកួតជាមួយកីឡាករបរទេស និងឈ្នះមេដាយមាសពីព្រឹត្តិការណ៍កីឡាជាតិលើកទី១ដែលធ្វើឲ្យរូបគេមានឈ្មោះទៅប្រកួតកីឡាស៊ីហ្គេម។ ក្នុងព្រឹត្តិការណ៍កីឡាស៊ីហ្គេមនៅប្រទេសម៉ាឡេស៊ីរូបគេឈ្នះមេដាយសំរឹទ្ធដែលធ្វើឲ្យរូបគេកាន់តែល្បី។ ទាំងខ្លួននៅវ័យក្មេង រូបគេកម្រវ៉ៃជាមួយកីឡាករកម្ពុជាដូចគ្នាណាស់ ប៉ុន្តែទទួលស្វាគមន៍អ្នកលេងដែនរហូត ដោយសារសមត្ថភាពរបស់គេស្ទើររកកីឡាករកម្ពុជាណាវ៉ៃជាមួយបាន។
ពិសេសទៀតនោះ កីឡាករអាយុទើប១៨ឆ្នាំ កម្ពស់១.៧០ម៉ែត្រ និងធ្លាប់ប្រកួតបាន៥៥ដងបានធ្វើមហាជនស្គាល់កាន់តែច្បាស់ពីការប្រកួតឈ្នះកីឡាកររុស្ស៊ីដោយពិន្ទុក្នុងព្រឹត្តិការណ៍ Khmer Thai Fight។ ភាពល្បីល្បាញរបស់គេស្ទើរខ្លាំងជាងរៀមច្បង ឡៅ ស៊ីណាត និង ឡៅ ចន្ទ្រា ថែមទៀត ហើយនៅមានឱកាសយូរអង្វែងទៀតដែលរូបគេសាងកេរ្តិ៍ឈ្មោះថ្នាក់ជាតិ និងអន្តរជាតិ៕
