- 2019-07-27 00:02:00
- ប្រវត្តិ
ក្លឹបចំណាស់បំផុតមួយនឹងឡើងមកលេងនៅ Premier League ក្រោយអវត្តមានជាង១ទសវត្ស
- 2019-07-27 00:02:00
- ចំនួនមតិ 0 | ចំនួនចែករំលែក 0
ក្លឹបចំណាស់បំផុតមួយនឹងឡើងមកលេងនៅ Premier League ក្រោយអវត្តមានជាង១ទសវត្ស
ចន្លោះមិនឃើញ
អ្នកនឹងបានឃើញវត្តមាន Sheffield United លេងនៅក្របខ័ណ្ឌ Premier League រដូវកាល ២០១៩-២០២០។
ក្រោយធ្លាក់ចេញពីក្របខ័ណ្ឌកំពូលអង់គ្លេសលើកចុងក្រោយកាលពី១២ឆ្នាំមុន ក្លឹបបាល់ទាត់ចំណាស់បំផុតនៅលើពិភពលោកអាយុ១២០ឆ្នាំមួយនេះ ដែលធ្វើបានល្អដោយឈរលេខ២នៅ Championship កាលពីរដូវកាលមុនបានឡើងមកក្របខ័ណ្ឌកំពូលវិញហើយ។
ប៉ុន្តែតើអ្វីដែលពិសេសបំផុត ដែលនឹងធ្វើឲ្យអ្នកចង់តាមដានអំពីក្លឹបបាល់ទាត់ដែលមានប្រវត្តិសាស្ត្រចំណាស់បំផុតមួយនេះ?
Sheffield United មានកីឡដ្ឋាន Bramall Lane ដែលជាកីឡដ្ឋានដំបូងគេបង្អស់ត្រូវបានបង្កើតឡើងតាំងពី ១៦៤ ឆ្នាំមុន (ឆ្នាំ ១៨៥៥) និង នៅតែបន្តប្រើប្រាស់ជាកីឡដ្ឋានអាជីពរហូតមកដល់បច្ចុប្បន្ន។
ដំបូងឡើយ Bramall Lane គឺជាផ្ទះរបស់ Sheffield Wednesday រហូតដល់ឆ្នាំ ១៨៩៩ នៅពេលដែល Sheffield United ក្លាយទៅជាម្ចាស់ផ្ទះផ្តាច់មុខតែឯង។
Sheffield United គឺជាក្លឹបបាល់ទាត់ទី២នៅក្នុងទីក្រុងសេហ្វៀល (Sheffield) បង្កើតឡើងក្នុងឆ្នាំ ១៨៩៩ ពោលគឺកើតក្រោយ Sheffield Wednesday ៣២ឆ្នាំ ហើយវាក៏ជាក្លឹបដំបូងគេដែលយកពាក្យ “united” ធ្វើជាឈ្មោះ។ United សំដៅដល់ក្លឹបបាល់ទាត់ដែលបង្កើតឡើងដោយក្រុមច្រើននៅក្នុងទីក្រុងតែមួយ។
កីឡដ្ឋានរបស់ Sheffield United អាចផ្ទុកអ្នកទស្សនាបាន ៣២,៧០២ នាក់។ បច្ចុប្បន្ន Sheffield United គឺជាក្លឹបរបស់ព្រះអង្គម្ចាស់អារ៉ាប់រួម ដែលជាប់ខ្សែស្រឡាយជាមួយនឹងម្ចាស់ក្លឹប Man City។
Premier League មានប្រវត្តិដ៏យូរលង់ ជាកត្តាធ្វើឲ្យលីគនេះមានប្រជាប្រិយភាព
ក្របខ័ណ្ឌបាល់ទាត់កំពូលរបស់អង់គ្លេសត្រូវបានបង្កើតឡើងដំបូងក្នុងឆ្នាំ ១៨៨៨ កាលណោះមានឈ្មោះផ្លូវការថា Football League ( (១៨៨៨-១៨៩១) ហើយដំណាក់កាលទី២ពេញ រយៈពេល១០០ឆ្នាំ (១៨៩២-១៩៩២) មានឈ្មោះថា Football League First Division និង បច្ចុប្បន្នដែលស្ថិតក្នុងដំណាក់កាលទី៣ មានឈ្មោះ Premier League។
Premier League បង្កើតឡើងភ្លាមក្នុងឆ្នាំ ១៩៩២ Sheffield United បានលេង២រដូវកាលក្រោយមកក៏ធ្លាក់ទៅក្របខ័ណ្ឌទី២ អស់ជាច្រើនឆ្នាំទម្រាំបានឡើងមកលេងសាជាថ្មីនៅរដូវកាល ២០០៧-០៨ ហើយលេងនៅក្របខ័ណ្ឌកំពូលបានតែ១ឆ្នាំ បន្តធ្លាក់ទៅក្របខ័ណ្ឌទី២ និង ទី៣អស់ច្រើនឆ្នាំទៀតមុននឹងងើបរួចមកវិញនៅរដូវកាល ២០១៩-២០២០ នេះ។
ក្រៅពី Premier League ជាក្របខ័ណ្ឌបាល់ទាត់ដែលមានការប្រកួតប្រជែងខ្លាំងហើយ ប្រវត្តិសាស្ត្រដ៏ចំណាស់នៃបាល់ទាត់អង់គ្លេស ក៏ជាកត្តាដែលធ្វើឲ្យមនុស្សលើផែនដីចាត់ទុកវាជាលីគដែលមានប្រជាប្រិយភាពបំផុត។
ហើយរដូវកាលនេះ Sheffield United នឹងឡើងមកលេងនៅ Premier League ហើយអ្នកនឹងបានឃើញកីឡដ្ឋាន Bramall Lane និង ក្លឹបចំណាស់បំផុតបង្ហាញវត្តមាននៅក្របខ័ណ្ឌកំពូលអង់គ្លេស៕