FC Barcelona មាន​ប្រៀប​ក្នុង​ការ​ឡើង​ទៅ​វគ្គ​ផ្ដាច់ព្រ័ត្រ​ Champions League រដូវ​កាល​នេះ​ក្រោយ​យក​ឈ្នះ​ Liverpool ភ្លូក​ទឹក​ភ្លូក​ដី​ដោយ​ ៣​ទល់​នឹង​០។

អតីត​កីឡាករ​ Liverpool ផ្ទាល់​ Luis Suarez គឺ​ជា​ពេជ្ឈឃាដ​រក​គ្រាប់​ឲ្យ​ម្ចាស់​ផ្ទះ​ Barcelona នាំ​មុខ​១​គ្រាប់​មុន​នៅ​វគ្គ​ទី​មួយ​នាទី​​២៦​ខណៈ​ដែល​ នៅ​វគ្គ​ទី​ពីរ​ Suarez ដដែល​បាន​បង្កើត​ឱកាស​ឲ្យ​ Messi ស៊ុត​១​គ្រាប់​ដែរ​នៅ​នាទី៧៥។​ លុះ​ដល់​នាទី​៨២​ Messi បាន​ទាត់​ហ្វ្រ៊ី​ឃីដ​ពី​ចម្ងាយ​យ៉ាង​អស្ចារ្យ​ឲ្យ​ Barca នាំ​មុខ​៣-០​ក៏​ដូចជា​ឈ្នះ​ការ​ប្រកួត​នេះ។

Messi ប្រើ​ពេល​១៤​ឆ្នាំ​ដើម្បី​ស៊ុត​៦០០​គ្រាប់​ឲ្យ​ Barcelona ក្នុង​នោះ​គ្រាប់​ដំបូង​របស់​គេ​កើត​ឡើង​កាល​ពី​ខែ​ឧសភា​ឆ្នាំ​២០០៥ ទល់​នឹង​ Albacete។ កីឡាករ​សញ្ជាតិ​អាហ្សង់ទីន​រក​គ្រាប់​បាន​ពី​ការ​ទាត់​ ហ្វ្រ៊ី​ឃីដ​ ៨​លើក​​ច្រើន​ជាង​កីឡាករ​ដទៃ​ទៀត​នៅ​លីគ​ធំ​ទាំង​៥​នៅ​ទ្វីប​អឺរ៉ុប​២​ដង។​​

មាន​តែ​វីរបុរស​ Raul របស់​ Real Madrid ប៉ុណ្ណោះ​ដែល​ស៊ុត​បញ្ចូល​ទី​ក្លឹប​អាជីព​ផ្សេង​គ្នា​នៅ​ Champions League បាន​ច្រើន​ជាង​ Messi គឺ​ ៣៣​ក្រុម​ ដោយ​ឡែក​ Messi វិញ​បាន​៣២​ក្រុម​ផ្សេង​គ្នា៕