Salah ញ៉ាំយ៉ាងម៉េច ទើបធ្វើឲ្យកីឡាករនេះពេញដោយថាមពលដូច្នេះ?

2018-05-20 07:41:08
បាល់ទាត់

2018-05-20 07:41:08
ចំនួនមតិ 0 | ចំនួនចែករំលែក 0

ចន្លោះមិនឃើញ

Mo Salah របស់ក្រុមហង្សក្រហមត្រូវការថាមពលច្រើនដើម្បីរត់លើតារាងបាល់ ដូច្នេះតើអ្វីជាម្ហូបចំណូលចិត្តដែលកីឡាករសញ្ជាតិអេហ្ស៊ីបទទួលទានដើម្បីបំពេញថាមពលឲ្យរាងកាយ?

Salah បានប្រាប់ទូរទស្សន៍ CNN ថាម្ហូបដែលខ្លួនចូលចិត្តជាងគេគឺ Kushari។ Kushari គឺជាម្ហូបដើមរបស់ជនជាតិអេហ្ស៊ីប មានដើមកំណើតតាំងពីសតវត្សទី១៩។ ម្ហូបនេះពេញនិយម និងមានលក់រាប់តាំងពីតាមរទេះលក់អាហារតាមចិញ្ចើមផ្លូវ រហូតដល់ហាងនានានៅអេហ្ស៊ីប ដែលជាប្រទេសកំណើតកីឡាករម្ចាស់ស្បែកជើងមាស Premiere League រដូវកាលនេះ។

“វាមានប៉ាស្តា(មីលាយស៊ុត) លាយបាយលាយប៉េងប៉ោះនិងម្ទេស ច្របល់ចូលគ្នា។ (ម្ហូបនេះ) វាស្មុគស្មាញបន្តិច តែសម្រាប់ខ្ញុំគឺជាអាហារល្អបំផុត" Salah បាននិយាយ។ Salah ថែមទាំងបានរំលឹកថានៅគ្រាមួយលោកត្រូវបង្ខំចិត្តឲ្យមិត្តភក្តិជួយទិញ Kushari ឲ្យពេលនៅព្រលានយន្តហោះ និង ដើម្បីកំបាំងពីភ្នែកមហាជន កីឡាករវ័យ ២៥ ឆ្នាំបានយកអាវទទូរក្បាលអង្គុយញ៉ាំក្នុងរថយន្ត។

តារាឆ្នើមអេហ្ស៊ីបកំពុងជោគជ័យខ្លាំងក្នុងអាជីពបាល់ទាត់នៅអង់គ្លេស បន្ទាប់ពីចាកចេញពីតោខៀវ មកក្រុម Liverpool ហើយបាននិងកំពុងធ្វើឲ្យពិភពលោកចាប់អារម្មណ៍កាន់តែខ្លាំង។ Salah បានជួយហង្សក្រហមឡើងទៅវគ្គផ្ដាច់ព្រ័ត្រ UEFA Champions League បន្ទាប់ពីក្លឹបអង់គ្លេសមួយនេះខកខានមិនបានឡើងដល់វគ្គផ្ដាច់ព្រ័ត្រលើកចុងក្រោយរបស់ខ្លួនកាលពី១១ឆ្នាំមុន។ Liverpool នឹងត្រូវប្រឈមជាមួយម្ចាស់ជើងឯកទ្វីបអឺរ៉ុបច្រើនជាងគេបំផុតចំនួន ១២សម័យ គឺក្លឹប Real Madrid នៅថ្ងៃទី២៧ ខែឧសភានេះ៕

ប្រភព៖ CNN ប្រែសម្រួល៖ សុខ លាងហ៊ត