Pisey ក្មេងកំព្រាកម្ពុជា ឈ្នះមេដាយមាស នៅអាមេរិកក្នុងព្រឹត្តិការណ៍ USA Diving Winter

2017-12-18 03:57:06
ព័ត៌មាន

2017-12-18 03:57:06
ចំនួនមតិ 0 | ចំនួនចែករំលែក 0

ចន្លោះមិនឃើញ

Jordan Pisey Windle ដែលជាកុមារកំព្រាមានស្រុកកំណើតនៅខេត្តព្រៃវែង មានវាសនាទៅរស់នៅអាមេរិកតាំងពីអាយុ២ខួប និងជាកីឡាករលោតទឹកដ៏ឆ្នើមនៅអាមេរិក បានឈ្នះមេដាយមាស១ ប្រាក់១ និងសំរឹទ្ធ១ ពីព្រឹត្តិការណ៏ USA Diving Winter National Championships ។

បើតាមលោក Jerry Windle ដែលជាឪពុកចិញ្ចឹមរបស់ Jordan Pisey បានប្រាប់ Sabay ថាមេដាយទាំង៣នោះរួមមានមេដាយមាស Men's 10 meter platform មេដាយប្រាក់ Men's 3m Springboard និងមេដាយសំរឹទ្ធ Men's 1 Meter Springboard ។ ដោយនេះជាការចូលរួមប្រកួត៣វិញ្ញាសារបស់ Pisey ហើយទទួលបានមេដាយទាំង៣វិញ្ញាសាតែម្ដង។

Jordan Pisey Windle ជាកីឡាករលោតទឹកដ៏ឆ្នើមនៅអាមេរិក ដោយកាលពីអាយុ១២ឆ្នាំ រូបគេប្រកួតឈ្នះពានរង្វាន់ថ្នាក់ជាតិសម្រាប់វិញ្ញាសាកីឡាលោតទឹកចម្ងាយ១០ម៉ែត្រ។ ក្នុងឆ្នាំបន្តបន្ទាប់មកទៀត គាត់ក៏បានឈ្នះមេដាយមាសសម្រាប់ការប្រកួតថ្នាក់ជាតិនៅរដ្ឋ Arizona និងមេដាយប្រាក់ និងសំរឹទ្ធ សម្រាប់ការប្រកួតថ្នាក់ជាតិពីរផ្សេងទៀត។

Jordan Pisey មានប្រវត្តិជាកុមារកំព្រានៅខេត្តព្រៃវែង ហើយត្រូវបានដាក់ឲ្យរស់នៅក្នុងមណ្ឌលកុមារកំព្រាមួយកន្លែងនៅទីក្រុងភ្នំពេញ ក្រោយពេលដែលឪពុកម្តាយបង្កើតរបស់គេបានទទួលមរណភាព។ Jordan ត្រូវបានទទួលយកទៅចិញ្ចឹម និងរស់នៅសហរដ្ឋអាមេរិក តាំងពីមានអាយុត្រឹមតែជិត២ឆ្នាំប៉ុណ្ណោះ ដោយលោក Jerry Windle ជាអ្នកនាំទៅ។ អំឡុងខែឧសភាឆ្នាំ២០១៦កន្លងទៅ រូបគេក៏ធ្លាប់មកកម្ពុជាផងដែរ៕

អត្ថបទ៖ មុន្នីរម្យ