កីឡា Soft Tennis បង្កើតសហព័ន្ធផ្លូវការនៅស្រុកខ្មែរ

2014-10-27 17:14:21
ព័ត៌មាន

2014-10-27 17:14:21
ចំនួនមតិ 0 | ចំនួនចែករំលែក 0

ចន្លោះមិនឃើញ

កីឡាថ្មី សូហ្វតិន្នីស (Soft Tennis) ដែលរបៀបលេងស្រដៀងនឹងកីឡាវាយកូនបាល់ បានបង្កើតសហព័ន្ធជាផ្លូវការក្នុងប្រទេសកម្ពុជា កាលពីព្រឹកថ្ងៃទី២៦ ខែតុលា ម្សិលមិញនៅទីស្នាក់ការគណៈកម្មាធិការជាតិអូឡាំពិកកម្ពុជា។

លោក ជា ប៊ុនហេង អគ្គលេខាធិការសហព័ន្ធកីឡាចំណូលថ្មីមួយនេះបានលើកឡើងថា ដោយសារវិស័យកីឡាក្នុងមានការរីកចម្រើន ទើបថ្នាក់ដឹកនាំកីឡាជាតិ សម្រេចបង្កើតសហព័ន្ធកីឡា សូហ្វតិន្នីស ជារូបរាងឡើង។

ជំហានដំបូងសហព័ន្ធបានកំណត់យកបុគ្គលពាក់ព័ន្ធចំនួន១៥រូបដើម្បីគ្រប់គ្រងក្បាលម៉ាស៊ីនដែលមានអាណត្តិ៤ឆ្នាំម្ដង។ សមាជិកទាំង ១៥ រូបមានលោក ឈឹម ជួន ជាប្រធាន, លោក ប្រាក់ ផល្លា-លោក រស់ ចន្ដ្រានិត និង លោក ហែម ថុន ជាអនុប្រធាន, លោក ជា ប៊ុនហេង ជាអគ្គលេខាធិការ និង លោក ស្រ៊ុន ប៊ុនណារ៉ាត ជាអគ្គលេខាធិការរង, លោក ស៊ុយ សុខុម និងលោក គង់ ចាន់ធីណា ជាអគ្គហេរញ្ញិក ។ ចំណែកសមាជិកប្រតិបត្តិ៧រូបទៀត មានលោក ហី សារិន, ចាន់ ឆវីរ, ហេង សុខឆុន, ឆាយ បញ្ញាវុធ, ជា ចាន់ដារ៉ុង, ធន តុលា និងលោក មាន សាវ៉ាន ។

លោក ហែម ថុន ជាអនុប្រធានសហព័ន្ធ និងជាមន្រ្តីតំណាងគណៈកម្មាធិការជាតិអូឡាំពិកបានលើកឡើងថា សូហ្វតិន្នីស បានផ្ញើខ្លួនជាមួយសហព័ន្ធវាយកូនបាល់មួយរយៈពេលហើយ។ ក្រោយមកពីកីឡាប្រភេទថ្មីនេះ បានបង្ហាញសក្ដានុពលរបស់ខ្លួននៅព្រឹត្តិការណ៍កីឡា Asian Games លើកទី១៧ នៅសាធារណរដ្ឋកូរ៉េខាងត្បូង កាលពីពេលថ្មីៗ ដោយអាចប្រកួតប្រជែងជាមួយប្រទេសដទៃបាន ទោះមិនបានមេដាយក៏ដោយ៕

អត្ថបទ៖ ម៉ឺន រស្មី