សម្ដេចធិបតីហ៊ុន ម៉ាណែតសង្ឃឹមថា បារាំងឈ្នះពាន Euro 2024

2024-07-09 11:00:57
ព័ត៌មាន

2024-07-09 11:00:57
ចំនួនមតិ 0 | ចំនួនចែករំលែក 0

ចន្លោះមិនឃើញ

សម្ដេចធិបតីហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា សង្ឃឹមថាក្រុមជម្រើសជាតិបាល់ទាត់បារាំងនឹងឈ្នះពានជើងឯកអឺរ៉ុបឆ្នាំ២០២៤ ឬ Euro 2024។ នេះបើតាមការលើកឡើងរបស់លោកនៅក្នុងថ្ងៃច័ន្ទកន្លងទៅ។

ថ្លែងនៅក្នុងវេទិការធុរកិច្ចកម្ពុជា-បារាំង សម្ដេច ហ៊ុន ម៉ាណែត បាននិយាយជាភាសាបារាំងថា៖ «មិនខុសពីបងប្អូន និងប្រិយមិត្តទាំងអស់គ្នា ខ្ញុំក៏ចូលចិត្តកីឡាបាល់ទាត់ផងដែរ។ ខ្ញុំសូមសាទរដល់ក្រុមជម្រើសជាតិបារាំង ដែលឡើងមកកាន់វគ្គពាក់កណ្ដាលផ្ដាច់ព្រ័ត្រ»។

សម្ដេចបានបន្ថែមថា៖ «ខ្ញុំសង្ឃឹមថាក្រុមជម្រើសជាតិបារាំងនឹងក្លាយជាជើងឯកនៃពានអឺរ៉ុបជាថ្មី»។

វេទិកាធុរកិច្ចកម្ពុជា-បារាំងនៅក្នុងឆ្នាំ២០២៤នេះ មានរយៈពេល ៣ថ្ងៃ ដោយចាប់ផ្ដើមកាលពីថ្ងៃច័ន្ទម្សិលមិញនេះ។ វេទិកានេះត្រូវបានរៀបចំឡើងដោយសភាពាណិជ្ជកម្មកម្ពុជា និងសភាពាណិជ្ជកម្ម និងឧស្សហកម្មបារាំង-កម្ពុជា ដោយមានការចូលរួមពីភ្ញៀវកិត្តិយសជាតិ អន្តរជាតិជាច្រើន ដោយក្នុងនោះក៏មានសម្ដេចធិបតីនាយករដ្ឋមន្ត្រីជាអធិបតីផងដែរ។

ងាកមកមើលព្រឹត្តិការណ៍អឺរ៉ូវិញ បារាំងនៅពេលនេះដែរ កំពុងតែស្ថិតនៅវគ្គពាក់កណ្ដាលផ្ដាច់ព្រ័ត្រ ដោយនឹងត្រូវប្រឈមជាមួយក្រុមជម្រើសជាតិអេស្ប៉ាញ។ បារាំងឡើងមកវគ្គនេះ ដោយរកបានតែ ១គ្រាប់ប៉ុណ្ណោះនៅក្នុងព្រឹត្តិការណ៍អឺរ៉ូទាំងមូល៕