សម្ដេចហ៊ុន សែន៖ បាល់មូលសូមជ្រើសរើសដោយសេរី តែសូមកុំលេងភ្នាល់ដាក់លុយប្រយ័ត្នសុីសៀង

2024-07-03 12:55:45
ព័ត៌មាន

2024-07-03 12:55:45
ចំនួនមតិ 0 | ចំនួនចែករំលែក 0

ចន្លោះមិនឃើញ

សម្ដេចតេជោ ហ៊ុន សែន ប្រធានព្រឹទ្ធសភា បានលើកឡើងនៅក្នុងថ្ងៃនេះថា ពាក់ព័ន្ធនឹងព្រឹត្តិការណ៍បាល់ទាត់អឺរ៉ុប Euro 2024 បាល់មានរាងមូល ហេតុដូច្នេះហើយ សូមរើសអ្នកឈ្នះដោយសេរី តែកុំភ្នាល់ដាក់លុយ ប្រយ័ត្នស៊ីសៀង។

សម្ដេចបានផ្ដាំថា៖ «បាល់មូលសូមជ្រើសរើសដោយសេរី តែសូមកុំលេងភ្នាល់ដាក់លុយប្រយ័ត្នសុីសៀង»៕ នេះបើតាមសារមួយ ដែលបានបង្ហោះនៅលើបណ្ដាញសង្គមរបស់លោកនៅក្នុងថ្ងៃនេះ។

បន្ថែមពីនេះទៀត សម្ដេចមិនហ៊ានថា អាល្លឺម៉ង់យកឈ្នះទៀតទេ ក្រោយឡើងមកកាន់វគ្គ ៨ក្រុមចុងក្រោយនៃព្រឹត្តិការណ៍បាល់ទាត់អឺរ៉ុប Euro 2024។

នៅវគ្គ ១៦ក្រុមចុងក្រោយ អាល្លឺម៉ង់បានយកឈ្នះ ក្រុមជម្រើសជាតិដាណឺម៉ាកក្នុងលទ្ធផល ២ ទល់នឹង ០។ ក្រុមជម្រើសជាតិដែលមានរហស្សនាមឥន្ទ្រីយដែកមួយនេះនឹងប៉ះក្រុមជម្រើសជាតិអេស្ប៉ាញនៅវគ្គ ៨ក្រុមចុងក្រោយ ដែលគូនេះនឹងធ្វើឡើងនៅយប់ថ្ងៃសុក្រសប្ដាហ៍នេះ វេលាម៉ោង ១១យប់ (ម៉ោងនៅកម្ពុជា)។

ទាក់ទិននឹងរឿងទាយលទ្ធផលបាល់ សម្ដេចបានបង្ហោះនៅលើហ្វេសប៊ុកថា៖ «កាលពីថ្ងៃ២៨ មិថុនា ២០២៤ ខ្ញុំបាននិយាយលេងទៅកាន់អង្គមទ្ទិញថាអាល្លឺម៉ង់នឹងឈ្នះ។ ការនិយាយថាអាល្លឺម៉ង់នឹងឈ្នះ សំដៅលើការប្រកួតវគ្គ១៦ក្រុមប៉ុណ្ណោះមិនសំដៅទៅលើការលើកពានបាល់ទាត់អឺរ៉ុប២០២៤ នោះឡើយ»។

ក្រោយពេលដែលអាល្លឺម៉ង់បានឡើងមកកាន់វគ្គ ៨ក្រុមចុងក្រោយ សម្ដេចមិនហ៊ានថា អាល្លឺម៉ង់ឈ្នះទៀតទេ។ សម្ដេចក៏ព្រលយថែមថា៖ «សូមកុំបន្ទោសខ្ញុំ ប្រសិនបើមានអ្នកគាំទ្រអាល្លឺម៉ង់ភ្នាល់ចាញ់»។

ទាក់ទិននឹងព្រឹត្តិការណ៍យូរូ ២០២៤ សម្ដេចក៏ភ្នាល់បាល់ជាមួយមិត្តភក្ដិរបស់លោកដែរ ជាពិសេសអ្នកដែលធ្លាប់លេងកូនហ្គោលជាមួយគ្នា។ សម្ដេចបាននិយាយថា៖ «៨ប្រកួតកន្លងទៅ ខ្ញុំឈ្នះ៦ប្រកួត និងចាញ់២ប្រកួតជាមួយសត្រូវរបស់ខ្ញុំដែលតែងប្រកួតជាមួយខ្ញុំពិសេសវាយកូនគោល»៕

អត្ថបទ៖ សេរី មង្គល