លោក Lionel Scaloni គ្រូបង្វឹកដែលឈ្នះពាន World Cup ជាមួយក្រុមជម្រើសជាតិអាហ្សង់ទីន និយាយថាលោកកំពុងពិចារណាលាលែងពីតំណែង បន្ទាប់ពីបានកាន់តួនាទីនេះអស់រយៈពេល 5 ឆ្នាំ។

Scaloni បានធ្វើសេចក្តីប្រកាសដ៏គួរឱ្យភ្ញាក់ផ្អើលបន្ទាប់ពីការប្រកួតជម្រុះ World Cup របស់អាហ្សង់ទីនដោយលទ្ធផលយកឈ្នះ 1-0 លើប្រេស៊ីលក្នុងទីក្រុង Rio de Janeiro កាលពីថ្ងៃអង្គារ។ គ្រូបង្វឹកវ័យ 45 ឆ្នាំរូបនេះក៏បានដឹកនាំអាហ្សង់ទីនទៅកាន់ពានរង្វាន់ Copa America ក្នុងឆ្នាំ 2021 មុនពេលឈ្នះពាន World Cup របស់ពួកគេនៅប្រទេសកាតាកាលពីឆ្នាំមុន។

គ្រូបង្វឹកអាហ្សង់ទីនរូបនេះ បាននិយាយថា "អាហ្សង់ទីនត្រូវការគ្រូបង្វឹកដែលមានថាមពល ហើយអ្នក ដែលមានសុខភាពល្អ" ។ “ខ្ញុំត្រូវ ចាប់ផ្តើមគិត ខ្ញុំមានរឿងជាច្រើនដែលត្រូវគិតក្នុងអំឡុងពេលនេះ។ “វាមិនមែនជាពាក្យលា ឬអ្វីនោះទេ ប៉ុន្តែខ្ញុំត្រូវតែគិត ពីព្រោះឧបសគ្គខ្ពស់ណាស់ ហើយវាមានភាពស្មុគស្មាញក្នុងការបន្តទៅមុខ ហើយវាស្មុគស្មាញក្នុងការបន្តឈ្នះប្រកួតខាងមុខ ដូច្នេះខ្ញុំត្រូវគិតអំពីរឿងនេះមួយរយៈសិន។ ខ្ញុំនឹងនិយាយជាមួយប្រធាន FA និងកីឡាករបន្ទាប់មក"។

ការឈ្នះពាន World Cup របស់អាហ្សង់ទីន នៅប្រទេសកាតា កាលពីឆ្នាំ 2022 គឺជាការឈ្នះពានរង្វាន់បាល់ទាត់ពិភពលោកជាលើកទីបីរបស់ពួកគេ និងជាលើកដំបូង បើគិតចាប់តាំងពីឆ្នាំ 1986។

ដោយឡែកខ្សែការពារអាហ្សង់ទីន និង Tottenham Cristian Romero បាននិយាយថា "យើងប្រាកដហើយសង្ឃឹមថា Scaloni នឹងបន្ត" ។ "ចាំមើលឥឡូវនេះលោក នឹងមានពេលគិត លោកមិនបាននិយាយអ្វីនៅក្នុងបន្ទប់ផ្លាស់ប្តូរសម្លៀកបំពាក់ទេ។ យើងនឹងព្យាយាមបញ្ចុះបញ្ចូលលោក Scaloni"។

គួរឱ្យដឹងថា ការទទួលជ័យជម្នះលើប្រេស៊ីល កាលពីថ្ងៃអង្គារគឺជាជ័យជម្នះក្រៅដីលើកដំបូងមិនធ្លាប់មានរបស់អាហ្សង់ទីនលើគូប្រជែងរបស់ពួកគេក្នុងវគ្គជម្រុះ World Cup ហើយបានធ្វើឱ្យពួកគេនាំមុខពីរពិន្ទុនៅលើកំពូលតារាងក្នុងពូល៕

SabayOne កម្មវិធីកម្សាន្តថ្មីរបស់ Sabay បើកឲ្យប្រើសាកល្បងពីពេលនេះ! ចុះឈ្មោះតាមរយៈតំណភ្ជាប់នេះ https://bit.ly/3QVlYVB