អាន ស៊ីណែត ថាប្រទេសនេះជាក្ដីបារម្ភសម្រាប់ខ្លួនក្នុងការការពារមេដាយមាស

2023-05-31 05:02:24
ព័ត៌មាន

2023-05-31 05:02:24
ចំនួនមតិ 0 | ចំនួនចែករំលែក 0

ចន្លោះមិនឃើញ

អាន ស៊ីណែត កីឡាការិនីបាល់បោះជិះរទះ (Wheelchair Basketball) កម្ពុជា មានទំនុកចិត្តក្នុងការការពារមេដាយមាសប៉ារ៉ាហ្គេមរបស់ខ្លួន ប៉ុន្តែក៏នៅខ្វល់ខ្លះចំពោះគូប្រជែងប្រទេសថៃផងដែរ។

អាន ស៊ីណែត បានខំប្រឹងជម្នះតស៊ូ ឆ្លងកាត់ឧបសគ្គរាប់មិនអស់ក្នុងនាមជនពិការភាពម្នាក់ រហូតអាចអភិវឌ្ឍខ្លួន ក្លាយជាអត្តពលិកជម្រើសជាតិ ហើយមានសមត្ថភាពដណ្តើមបានមេដាយមាស និងមេដាយប្រាក់ជូនប្រទេសជាតិ ពីការប្រកួតអាស៊ានប៉ារ៉ាហ្គេមលើកទី១១ នៅប្រទេសឥណ្ឌូណេស៊ី ឆ្នាំ២០២២។ ខណៈដែលអាស៊ានប៉ារ៉ាហ្គេមលើកទី១២ដែលកម្ពុជាធ្វើជាម្ចាស់ផ្ទះ ស៊ីណេត ក៏នឹងមានតួនាទីការពារមេដាយរបស់ខ្លួនផងដែរ។

មុនការប្រកួតដែលនឹងចាប់ផ្ដើមនៅថ្ងៃទី៣ខែមិថុនាឆ្នាំ២០២៣ខាងមុខនេះ ស៊ីណែត បានបង្ហាញចំណាប់អារម្មណ៍ថា៖ “ខ្ញុំសង្ឃឹមថាយើងនឹងទទួលបានមេដាយជូនជាតិ ប៉ុន្តែមិនទាន់ច្បាស់ថាបានមេដាយមាសឬប្រាក់នោះទេ។ បច្ចុប្បន្នយើងបានហាត់ជាមួយគ្នាច្រើន សាមគ្គីគ្នាជាក្រុមបានល្អ។ តែយ៉ាងណាគេក៏ហាត់យើងក៏ហាត់ ដូច្នេះមិនអាចធានាបាន១០០%នោះទេ។ សម្រាប់ប្រទេសដែលជាគូប្រជែងរបស់យើង ខ្ញុំគិតថាជាប្រទេសថៃ ព្រោះសមត្ថភាពពួកគាត់ល្អទាំងការស៊ុតជិត និងឆ្ងាយ”។

រំលឹកថាអាស៊ានប៉ារ៉ាហ្គេមលើកទី១២នៅកម្ពុជា មាន១៤ប្រភេទកីឡា និង៤៣១វិញ្ញាសា។ ប្រទេសអាស៊ានទាំង១១បានចុះឈ្មោះអត្តពលិក និងមន្ត្រីសរុប ២ ៦៩២នាក់។ ការប្រកួតនឹងចាប់ផ្ដើមពីថ្ងៃទី៣ដល់៩ខែមិថុនាឆ្នាំ២០២៣ខាងមុខ៕

អត្ថបទ៖ ប្រុស យុទ្ធ