Burn X Flash រំពឹងធ្វើបានល្អក្នុងការប្រកួត M4 ដែលប្រាក់រង្វាន់សរុប៨០ម៉ឺនដុល្លារ

2022-12-20 06:51:54
ព័ត៌មាន

2022-12-20 06:51:54
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមកីឡាអេឡិចត្រូនិកតំណាងកម្ពុជា Burn X Flash នឹងចូលរួមកីឡាអេឡិចត្រូនិកកម្រិតពិភពលោក M4 World Championship ហៅកាត់ M4 សម្រាប់វិញ្ញាសា Mobile Legends: Bang Bang រៀបចំឡើងដោយក្រុមហ៊ុន Moonton នៅប្រទេសឥណ្ឌូនេស៊ី។

ការប្រកួតត្រូវបានបែងចែកជាពីរដំណាក់កាលគឺវគ្គសន្សំពិន្ទុក្នុងពូល ចាប់ពីថ្ងៃទី១ ដល់ទី៤ ខែមករា និងវគ្គចាញ់ធ្លាក់ ឈ្នះឡើងរហូតដល់វគ្គផ្តាច់ព្រ័ត្រ ចាប់ពីថ្ងៃទី៧ ដល់ទី១៧ ខែមករា ឆ្នាំ២០២៣។ព្រឹត្តិការណ៍អន្តរជាតិនេះមានក្រុមចំនួន១៦មកពីប្រទេសផ្សេងៗ ទូទាំងពិភពលោក និងត្រូវបានបែងចែកជា៤ពូល ហើយក្នុង១ពូលមាន៤ក្រុម។ ដោយឡែកសម្រាប់ក្រុមកម្ពុជា Burn X Flash ស្ថិតនៅក្នុង A ដែលមានក្រុមខ្លាំងៗដូចជា Blacklist International របស់ប្រទេសហ្វីលីពីនជាក្រុមការពារតំណែងជើងឯកឆ្នាំចាស់ ក្រុម Falcon Esports ជាជើងខ្លាំងរបស់ប្រទេសមីយ៉ាន់ម៉ា និងក្រុម Incendio Supremacy របស់តួកគី។

ក្រុម Burn X Flash មុនចេញទៅប្រទេសឥណ្ឌូណេស៊ីបានបញ្ជាក់ថាពួកគេត្រៀមរួចហើយក្នុងការប្រកួតខាងមុខនេះ ជាពិសេសការប៉ះក្រុមខ្លាំងៗជាច្រើនដូចជា Blacklist និង Falcon Esport ជាដើម។ ជាក់ស្ដែង Falcon Esport នេះក៏ទើបលើកពានអន្ដរជាតិមួយនៅកម្ពុជាកាលពីពេលកន្លងទៅនេះដែរ ដោយយកឈ្នះក្រុមខ្លាំងៗនៅកម្ពុជាជាច្រើន។ ដូច្នេះ Burn X Flash រំពឹងថាអ្នកគាំទ្រនឹងគាំទ្រពួកគេខ្លះដើម្បីយកឈ្នះសងសឹកឱ្យក្រុមកម្ពុជាវិញបាន។

សម្រាប់ព្រឹត្តិការណ៍នេះ មានប្រាក់រង្វាន់សរុបចំនួន ៨០ម៉ឺនដុល្លារអាមេរិក ($800,000 USD) ដែលមានការបែងចែកប្រាក់រង្វាន់ទាំងនេះទៅតាមចំណាត់ថ្នាក់ចាប់ពីលេខ១ ដល់លេខ១៦។

វគ្គក្នុងពូល

- ពូល A៖ Blacklist International (ហ្វីលីពីន), Burn X Flash (កម្ពុជា), Falcon Esports (មីយ៉ាន់ម៉ា) និង Incendio Supremacy (តួកគី)។

- ពូល B៖ Malvinas Games (អាហ្សង់ទីន), MDH Esports (វៀតណាម), ONIC Esports (ឥណ្ឌូនេស៊ី) និង TODAK (ម៉ាឡេស៊ី)។

- ពូល C៖ ECHO (ហ្វីលីពីន), Occupy Thrones (អេហ្ស៊ីប), RRQ Hoshi (ឥណ្ឌូនេស៊ី), និង RSG Singapore (សិង្ហបុរី)។

- ពូល D៖ RRQ Akira (ប្រេស៊ីល), S11 Gaming Angentina (ប៊ូឡាវី), Team HAQ (ម៉ាឡេស៊ី), និង The Valley (អាមេរិកខាងជើង)។

កាលពីឆ្នាំ២០២១ ដែលជាព្រឹត្តិការណ៍ M3 ឆ្នាំ២០២១ រៀបចំការប្រកួតនៅប្រទេសសិង្ហបុរី ក្រុមកម្ពុជា See You Soon ធ្វើបានល្អដែរ ដោយទទួលបានចំណាត់ថ្នាក់លេខ៩ ក្នុងចំណោម១៦ក្រុម ដោយទទួលបានប្រាក់រង្វាន់ ១៥ ០០០ដុល្លារអាមេរិក៕

អត្ថបទ៖ ប្រុស យុទ្ធ