ស្នងការប៉ូលិសឥណ្ឌូណេស៊ីត្រូវបានបណ្ដេញចេញពីតំណែង ក្រោយហេតុការណ៍រត់ជាន់គ្នានៅស្តាត

2022-10-05 01:31:00
ព័ត៌មាន

2022-10-05 01:31:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្នងការប៉ូលិសខេត្តម៉ាឡាង ភាគខាងកើតកោះជ្វា ឥណ្ឌូណេស៊ីត្រូវបានដកចេញពីតំណែង ក្រោយមានព្រឹត្តិការណ៍សោកនាដកម្មរត់ជាន់គ្នានៅកីឡដ្ឋានកាន់ជូរូហាន់ ដែលស្ថិតក្នុងខេត្តនេះ កាលពីថ្ងៃសៅរ៍កន្លងទៅ។ ក្រៅពីលោកស្នងការ ប៉ូលិសក្នុងកងកម្លាំងពិសេស ៩រូបទៀតក៏ត្រូវបានដេញចេញ ហើយប៉ូលិស ១៨រូប ដែលបានបាញ់ឧស្ម័នបង្ហៀរទឹកភ្នែក កំពុងស្ថិតក្រោមការស៊ើបអង្កេត។ នេះបើតាមការចុះផ្សាយរបស់សារព័ត៌មាន AP។

កាលពីថ្ងៃសៅរ៍ មនុស្ស ១២៧នាក់បានបាត់បង់ជីវិត ដោយការរត់ជាន់គ្នា ក្រោយប្រកួតរវាងក្រុមម្ចាស់ផ្ទះ Arema ទល់នឹងក្រុមភ្ញៀវ Persebaya។ ខាងភ្ញៀវបានយកឈ្នះក្រុមម្ចាស់ផ្ទះ ជាលើកដំបូងក្នុងរយៈពេលជាង ២ទសវត្សក្នុងលទ្ធផល ៣-២ ដែលបណ្ដាលឱ្យក្រុមអ្នកគាំទ្រ Arema ខឹងសម្បារយ៉ាងខ្លាំង ហើយរត់ចូលសំដៅទៅក្នុងទីលាន។

សារព័ត៌មាន AP បានចុះផ្សាយថា ក្រុមអ្នកគាំទ្រក្លឹប Arema រាប់ម៉ឺនបង្ហាញក្ដីខឹងសម្បារ ដោយរត់ចូលទីលាន ហើយគប់ដបទឹកទៅកាន់មន្ត្រីរៀបចំការប្រកួត។ ពេលនោះហើយ ក្នុងគោលបំណងរក្សាសណ្ដាប់ធ្នាប់ ប៉ូលិសបានចូលទៅបំបែកហ្វូង ដោយប្រើឧស្ម័នបង្ហៀរទឹកភ្នែក។ ផ្ទុយទៅវិញ ក្រោយពីប៉ូលិសបាញ់ឧស្ម័ននេះ មនុស្សជាច្រើនបានសម្រុកចេញពីទីលាន បណ្ដាលឱ្យមនុស្សរាប់សិបនាក់បាត់បង់ជីវិត។

នៅពេលនេះដែរ ប្រធានាធិបតីឥណ្ឌូណេស៊ី លោក ចូកូ វីដូដូ បានដាក់បទបញ្ជាផ្អាកការប្រកួតលីគកំពូលឥណ្ឌូណេស៊ី ហើយបញ្ជាឱ្យសមត្ថកិច្ចជំនាញបន្តធ្វើការស៊ើបអង្កេត៕

អត្ថបទ៖ សេរី មង្គល