- 2022-04-26 03:47:50
- ព័ត៌មាន
ប្លែកភ្នែកហើយ! កីឡាថាសហោះនឹងបើកទំព័រថ្មីឡើងវិញនាថ្ងៃទី៨ខែក្រោយនេះហើយ
- 2022-04-26 03:47:50
- ចំនួនមតិ 0 | ចំនួនចែករំលែក 0
ប្លែកភ្នែកហើយ! កីឡាថាសហោះនឹងបើកទំព័រថ្មីឡើងវិញនាថ្ងៃទី៨ខែក្រោយនេះហើយ
ចន្លោះមិនឃើញ
ក្រោយពីខកខានប្រកួតអស់រយៈពេលជាង២ឆ្នាំ ដោយសារការរីករាលដាលនៃជំងៃកូវីដ-១៩ នាថ្ងៃអាទិត្យទី៨ ខែឧសភា ឆ្នាំ២០២២ខាងមុខ កីឡាថាសហោះនៅកម្ពុជានឹងត្រូវបានបើកដំណើរការឡើងវិញ ដើម្បីប្រកួតដណ្ដើមពានរង្វាន់ កីឡាថាសហោះសសយករាជធានីភ្នំពេញ។
ការប្រកួតដែលនឹងធ្វើក្នុងសាលតូចនៅទីតាំងសសយករាជធានីភ្នំពេញនេះ មាន៨ក្រុមចូលរួមចែកចេញជា២ពូល។ ក្នុងក្រុមនីមួយៗតម្រូវឱ្យមានសមាជិក១១នាក់ (ស្រី៤នាក់)។ ការប្រកួតនេះទៀតសោតត្រូវលេងជាក្រុមពោលគឺ ៤នាក់ទល់៤នាក់ (បុរស២ស្រី២ ឬប្រុស៣ស្រី១)។
ការប្រកួតដណ្ដើមពានរង្វាន់ថាសហោះសសយករាជធានីភ្នំពេញនេះ ធ្វើឡើងក្នុងគោលបំណងធំៗ៣ ទី១ គឺស្វាគមន៍និងអប់អរក្នុងការដាក់បញ្ចូលកីឡាថាសហោះជាផ្នែកមួយនៃកម្មវិធីកីឡារបស់សសយករាជធានីភ្នំពេញ ទី២ អបអរការបើកទំព័រថ្មីនៃការដណ្ដើមពានរង្វាន់មួយនេះ បន្ទាប់ពីជាប់គាំងជាង២ឆ្នាំដោយជំងឺកូវីដ-១៩ និងទី៣ ដើម្បីផ្សព្វផ្សាយកីឡាថាសហោះឱ្យកាន់តែទូលំទូលាយ និងផ្ដល់ឱកាសដល់យុវជននិងមហាជននៅកម្ពុជាចូលរួមលេងឱ្យកាន់តែច្រើន។
តើកីឡាថាសហោះមានប្រភពមកពីណា និងមកដល់កម្ពុជានៅឆ្នាំណា?
កីឡាថាសហោះមានប្រភពមកពីសហរដ្ឋអាមេរិក និងបានចូលមកដល់កម្ពុជានៅឆ្នាំ២០០០ ដោយក្រុមជនជាតិបរទេស។ ពេលនោះមិនទាន់មានការផ្សព្វផ្សាយទូលំទូលាយទេ រហូតដល់ឆ្នាំ២០១១ លោក កូវ ពុទ្ធិរតន៍ ស្ថាបនិកក្រុមស្វាអាល់ធិមីតកម្ពុជា បានដឹកនាំនិងចាប់ផ្ដើមផ្សព្វផ្សាយកីឡាថាសហោះដល់សិស្សសាលារដ្ឋ និងឯកជនរហូតដល់បច្ចុប្បន្ន។ នៅកម្ពុជាមានក្រុមកីឡាថាសហោះ១១ក្រុម ៧ក្រុមនៅភ្នំពេញ និង៤ក្រុមនៅតាមបណ្ដាខេត្ត ដោយមានកីឡាករកីឡាការិនីចំនួន៣០០នាក់។
របៀបនៃការលេង
កីឡាថាសហោះ ឬ Ultimate Frisbee អាចលេងជាក្រុម៧នាក់ បុរសនិងបុរសស្ត្រីនិងស្ត្រី និងចំណុចពិសេសមួយទៀតអាចលេងចូលគ្នាជាក្រុមបាន (Mixed Team) ដោយតម្រូវឱ្យមានបុរស៤នាក់ និងនារី៣នាក់ក្នុងក្រុមតែមួយ។ គួរបញ្ជាក់ថាក្នុងតំបន់អាស៊ី គេនិយមលេងជា Mixed Team។ ការលេងជា Mixed Team គឺជាកត្តាមួយជម្រុញឱ្យស្ត្រីក្នុងតំបន់ និងប្រទេសមានការចូលរួមលេងច្រើន។ កីឡានេះមិនមានអាជ្ញាកណ្ដាលទេ គឺតម្រូវឱ្យកីឡាករមានទំនួលខុសត្រូវលើកំហុសខ្លួនឯង។
ការចាប់ផ្ដើមដំបូងនៃការប្រកួតគឺមាន២ក្រុម ដែលក្រុមមួយជាក្រុមការពារ និងក្រុមមួយទៀតជាក្រុមប្រយុទ្ធ ឈរទល់មុខគ្នាក្នុងតំបន់ End Zone របស់ខ្លួន។ ក្រុមការពារត្រូវគប់ថាសទៅឱ្យក្រុមម្ខាងទៀត ដើម្បីចាប់ផ្ដើមការប្រកួត។ ក្រុមប្រយុទ្ធត្រូវបណ្ដើរថាសពី End Zone របស់ខ្លួនទៅ End zone របស់គូបដិបក្ខ។ ក្នុងការប្រកួតពេលកីឡាករ ឬកីឡាការិនីំណាម្នាក់ទទួលបានថាស គឺមិនអាចបន្តទៅមុខបានទៀតទេ ហើយមានពេលតែ១០វិនាទីប៉ុណ្ណោះក្នុងការរក្សាថាសក្នុងដៃ។ បើ១០វិនាទីមិនអាចគប់ថាសចេញពីដៃទេ ថាសនឹងត្រូវប្ដូរឱ្យទៅក្រុមម្ខាងទៀតធ្វើការប្រយុទ្ធម្ដង។
តារាងនៃការប្រកួតកីឡាថាសហោះស្តង់ដារមានទំហំ ១០០ គុណ ៣៧ ម៉ែត្រ ចែកជា៣ Zone គឺ End Zone ពីរនិង Central Zone មួយ។ End Zone គឺជាតំបន់មួយក្នុងចំណោម២ដែលនៅចុងបញ្ចប់ទីលានប្រកួតទាំងសងខាង មានទំហំ ១៨ គុណ ៣៧ ម៉ែត្រដែលក្រុមងាចរកគ្រាប់បាល់បានដោយការចាប់ថាសក្នុងតំបន់នោះ៕