អតីតគ្រូ Liverpool ប្ដេជ្ញាធ្វើឲ្យ Leicester មានមោទនភាព

2019-02-27 01:32:08
ព័ត៌មាន

2019-02-27 01:32:08
ចំនួនមតិ 0 | ចំនួនចែករំលែក 0

ចន្លោះមិនឃើញ

Brendan Rodgers ត្រូវបានតែងតាំងជាអ្នកចាត់ការទូទៅថ្មីរបស់ Leicester City ក្រោយសម្រេចចិត្តបោះបង់ចោលការងាររបស់លោកនៅ Celtic។

អ្នកចាត់ការសញ្ជាតិអៀរឡង់ខាងជើងបានចុះកុងត្រាជាមួយ Leicester ដល់ខែមិថុនាឆ្នាំ២០២២ ជំនួសលោក Claude Puel ដែលក្លឹបបណ្ដេញចេញក្រោយដឹកនាំបាន១៦ខែ។ នេះគឺជាការវិលមក Premier League វិញលើកទី៣ហើយរបស់លោក Rodgers បន្ទាប់ពីធ្លាប់ដឹកនាំ Liverpool និង Swansea City កាលពីអតីតកាល។

ក្រោយបានការងារថ្មីភ្លាមបុរសវ័យ ៤៦ឆ្នាំបានសន្យាថានឹង ធ្វើគ្រប់យ៉ាងដើម្បីឲ្យអ្នកគាំទ្រមានមោទនភាពចំពោះក្លឹបរបស់ពួកគេ។ Rodgers បានអង្គុយមើលក្រុម Leicester លេងកាលពីយប់មិញដែលបានយកឈ្នះ Brighton ២-១ បន្ទាប់មកលោកក៏បានចូលជួបកីឡាករទាំងអស់លើកដំបូងនៅបន្ទប់ផ្លាស់សំលៀកបំពាក់។

អំឡុងពេលនៅ Liverpool លោកសឹងតែដឹកនាំក្រុមឈ្នះ Premier League លើកដំបូងកាលពីឆ្នាំ២០១៤ ប៉ុន្តែបែរជាខកខានវិញនៅវិនាទីចុងក្រោយ ហើយត្រូវក្លឹបបណ្ដេញចេញ១រដូវកាលបន្ទាប់ពីនោះ។ Rodgers ត្រូវទៅដឹកនាំនៅ Celtic ក្នុងឆ្នាំ២០១៦ ហើយជួយក្លឹបឈ្នះពានក្នុងស្រុកសរុបទាំងអស់ចំនួន៧៕