ប្រុសសង្ហាក្រុមជម្រើសជាតិ ចុះបង្រៀនក្មេងៗឲ្យសម្រេចសុបិនក្លាយជាកីឡាករបាល់ទាត់អាជីព

2018-05-21 10:23:09
ព័ត៌មាន

2018-05-21 10:23:09
ចំនួនមតិ 0 | ចំនួនចែករំលែក 0

ចន្លោះមិនឃើញ

អេសស៊ីជី (SCG) គាំទ្រដល់កុមារមានទេពកោសល្យផ្នែកកីឡាបាល់ទាត់នៅកម្ពុជា តាមរយៈកម្មវិធី “Kick and Share”

ថ្ងៃទី ២០ ខែឧសភា ឆ្នាំ ២០១៨ - ក្រុមហ៊ុន អេសស៊ីជី (SCG) បន្តបង្ហាញ នូវសេចក្តីតាំងចិត្តរបស់ខ្លួនក្នុងការគាំទ្រដល់កុមារកម្ពុជាដែលចាប់អារម្មណ៍លើកីឡាបាល់ទាត់ តាមរយៈកម្មវិធីហ្វឹកហាត់កីឡាបាល់ទាត់ “Kick and Share” ហើយនៅថ្ងៃនេះមានកុមារប្រមាណ ៣០០ នាក់បានចូលរួមនៅក្នុងវគ្គហ្វឹកហាត់នៅឯទីលានបាល់ទាត់ក្លឹបភ្នំពេញក្រោន ជាមួយនឹងការជួយណែនាំពីសំណាក់កំពូលកីឡាករកម្ពុជាដូចជាលោក អន ចាន់ប៉ូលីន សឿត បារាំង និងអ៊ុក សុវណ្ណ។

អេសស៊ីជី ដែលជាក្រុមហ៊ុនពហុសាជីវកម្ម ឈានមុខគេនៅក្នុងតំបន់អាស៊ាន បានជួយគាំទ្រជាហូរហែរដល់ការអភិវឌ្ឍន៍កុមារកម្ពុជាដែលអាចក្លាយជាតារាបាល់ទាត់នៅថ្ងៃអនាគត ក៏ដូចជាជួយជំរុញដល់យុវជនទូទាំងប្រទេសឲ្យចំណាយពេលទំនេរចូលរួមនៅក្នុងសកម្មភាពវិជ្ជមាន។

លោក វ៉ារុត តេចាសុផាតគុល (Varut Techasupatkul) ប្រធានផ្នែកម៉ាកយីហោ និងទីផ្សាររបស់ក្រុមហ៊ុនអេសស៊ីជី មានប្រសាសន៍ថា៖ “ព្រឹត្តិការណ៍នាថ្ងៃនេះបង្ហាញឲ្យឃើញពីការប្ដេជ្ញាចិត្ត និងសេចក្តីតាំងចិត្តរបស់យើងក្នុងការធ្វើជាក្រុមហ៊ុនដ៏ល្អនៅក្នុងសហគមន៍ដែលយើងធ្វើប្រតិបត្តិការអាជីវកម្ម តាមរយៈការជួយបង្កើនឱកាសដល់កុមារកម្ពុជា ដែលមានចំណាប់អារម្មណ៍ក្នុងការពង្រឹងទេពកោសល្យផ្នែកកីឡាបាល់ទាត់របស់ខ្លួន ហើយដែលសង្ឃឹមចង់សម្រេចក្តីសុបិនរបស់ខ្លួនក្នុងការក្លាយជាកីឡាករបាល់ទាត់អាជីព”។

កីឡាបាល់ទាត់ជាកីឡាមានការពេញនិយមទូទាំងតំបន់ ហើយជាកីឡាដែលមានប្រជាជនកម្ពុជារាប់លាននាក់លេង និងចូលចិត្តទស្សនា។ ក្រុមហ៊ុន អេសស៊ីជី បានបង្កើតនូវកម្មវិធីឧបត្ថម្ភជាច្រើនសម្រាប់ការអភិវឌ្ឍកីឡាបាល់ទាត់នៅកម្ពុជា ដូចជា ការឧបត្ថម្ភដល់ក្រុមកីឡាករជម្រើសជាតិ និងការរៀបចំការប្រកួតលក្ខណៈមិត្តភាពរវាង ក្រុមកីឡាករចម្រុះ K-Cement All Stars ដែលប្រមូលផ្ដុំទៅដោយកីឡាករប្រចាំក្លឹបនៅកម្ពុជា ជាមួយនឹងក្លឹបបាល់ទាត់ SCG Muangthong United ដែលជាក្លឹបបាល់ទាត់ឈានមុខគេរបស់ប្រទេសថៃ។

កាលពីឆ្នាំមុន កីឡាករបាល់ទាត់មកពីក្លឹប SCG Muangthong United បានចំណាយពេលវេលាដ៏មមាញឹក មកជួយបណ្ដុះបណ្ដាលកុមារកម្ពុជារាប់រយនាក់នៅឯពហុកីឡាដ្ឋានអូឡាំពិកក្នុងរាជធានីភ្នំពេញ ដែលនេះជាផ្នែកមួយនៃដំណើរទស្សនកិច្ចរបស់ក្លឹបបាល់ទាត់នេះក្នុងតំបន់អាស៊ាន។ លោក វ៉ារុត តេចាសុផាតគុល បានបន្ថែមថា៖ “ក្រុមហ៊ុនអេសស៊ីជីមានសេចក្តីតាំងចិត្តក្នុងការជួយផ្ដល់អត្ថប្រយោជន៍ផ្សេងផ្សេងៗដល់សង្គម ដែលយើងធ្វើការជាមួយ និងធ្វើប្រតិបត្តិការអាជីវកម្ម ហើយយើងមានជំនឿយ៉ាងមុតមាំថា កីឡា និងសកម្មភាពកម្សាន្តនានា គឺជាផ្នែកដ៏មានតម្លៃនៅក្នុងជីវិតរបស់យើងគ្រប់គ្នា។ ដោយមូលហេតុនេះហើយ ទើបបានជាយើងបានផ្ដួចផ្ដើមនូវគម្រោងអភិវឌ្ឍន៍ធនធានមនុស្សជាច្រើន ដើម្បីជួយបង្កើតអនាគតភ្លឺត្រចះត្រចង់ដល់ប្រជាពលរដ្ឋដែលរស់នៅក្នុងបណ្ដាប្រទេសដែលយើងធ្វើប្រតិបត្តិការអាជីវកម្ម ដោយរាប់បញ្ចូលទាំងប្រទេសកម្ពុជាផង។ យើងសង្ឃឹមថា កម្មវិធី ‘Kick and Share’ នេះនឹងបំផុសកុមារឲ្យចូលរួមកាន់តែច្រើនក្នុងសកម្មភាពកីឡា ហើយក្លាយជាកីឡាករល្បីរបស់កម្ពុជាទៅថ្ងៃអនាគត”។

កម្មវិធីហ្វឹកហាត់បាល់ទាត់ “Kick and Share” គឺជាកិច្ចសហការរវាងក្រុមហ៊ុនអេសស៊ីជី និងក្លឹបបាល់ទាត់ភ្នំពេញក្រោន ដែលជាក្លឹបបាល់ទាត់ឈានមុខគេនៅកម្ពុជា។ គ្រូបង្វឹក និងកីឡាកររបស់ក្លឹបបានជួយផ្ដល់នូវគន្លឹះ និងបច្ចេកទេសនានានៃការលេងបាល់ទាត់ ដល់កុមារដែលបានចូលរួម។ បន្ទាប់ពីការហ្វឹកហាត់ ក្រុមហ៊ុនអេសស៊ីជីក៏បានឧបត្ថម្ភសម្ភារកីឡាបាល់ទាត់ដល់កុមារ ដើម្បីជួយឲ្យពួកគេហ្វឹកហាត់នូវបច្ចេកទេសថ្មីៗនៅអំឡុងពេលទំនេរ។

ក្រុមហ៊ុន អេសស៊ីជី បានអនុវត្តកម្មវិធីហ្វឹកហាត់បាល់ទាត់ “Kick and Share” នេះជាច្រើនឆ្នាំមកហើយ ដោយក្នុងនោះ កុមាររាប់រយនាក់មកពីទីកន្លែងផ្សេងៗនៅក្នុងប្រទេសកម្ពុជា ដូចជានៅរាជធានីភ្នំពេញ ខេត្តស្វាយរៀង និងខេត្តកំពតជាដើម បានទទួលអត្ថប្រយោជន៍ពីពីវគ្គហ្វឹកហាត់នេះ។

វគ្គហ្វឹកហាត់នេះ ជូយបំពេញបន្ថែមដល់គម្រោងផ្នែកអប់រំរបស់ក្រុមហ៊ុន អេសស៊ីជី ដែលបានផ្ដល់អាហារូបករណ៍ជាង ៨០០ កន្លែងដល់យុវជនកម្ពុជា តាមរយៈកម្មវិធីអាហារូបករណ៍ “អេសស៊ីជី ចែករំលែកក្តីសុបិន”។ គម្រោងទាំងពីរនេះ ជាតឹកតាងបង្ហាញអំពីសេចក្តីប្ដេជ្ញាចិត្តរបស់ក្រុមហ៊ុន អេសស៊ីជី ក្នុងការជួយអភិវឌ្ឍជីវភាពរស់នៅរបស់ប្រជាពលរដ្ឋដែលរស់នៅក្នុងទីកន្លែងដែលមានប្រតិបត្តិការរបស់ក្រុមហ៊ុន ហើយក៏បានបង្ហាញឲ្យឃើញពីការយកចិត្តទុកដាក់របស់ក្រុមហ៊ុនចំពោះយុវជន ដែលដើរតួនាទីសំខាន់សម្រាប់អនាគតរបស់ប្រទេសកម្ពុជា។

ដោយ៖ ថា ម៉ាលីដា