- 2016-01-05 20:39:51
- បាល់ទាត់
ហេតុផល៦យ៉ាង ដែល Benitez ត្រូវ Real បណ្ដេញចេញ
- 2016-01-05 20:39:51
- ចំនួនមតិ 0 | ចំនួនចែករំលែក 0
ហេតុផល៦យ៉ាង ដែល Benitez ត្រូវ Real បណ្ដេញចេញ
ចន្លោះមិនឃើញ
Rafa Benitez ត្រូវក្លិបយក្សអេស្ប៉ាញ Real Madrid បណ្ដេញចេញពីតំណែងអ្នកចាត់ការយប់មិញ បន្ទាប់ពីដឹកនាំបាន៧ខែ ខណៈដែលក្រុមកំពុងស្ថិតនៅលេខ៣ ក្នុងតារាង La Liga និងមានគម្លាត៤ពិន្ទុពីក្រុមកំពូលតារាង Atletico Madrid។
ការបណ្ដេញអតីតអ្នកចាត់ការក្រុម Liverpool រូបនេះ ធ្វើឲ្យសារព័ត៌មានមួយចំនួនធំយល់ថា អាចមកមូលហេតុមួយចំនួន។ ខាងក្រោមនេះ គឺជាហេតុផល៦យ៉ាងដែល ធ្វើឲ្យ Real បណ្ដេញបុរសសញ្ជាតិអេស្ប៉ាញវ័យ៥៥ឆ្នាំចេញ៖
១. មិនមែនជាបុគ្គលមានប្រជាប្រិយភាព៖ បន្ទាប់ពី Carlo Ancelotti ចេញ ហើយជំនួសវិញដោយ Benitez ទាំងកីឡាករក្រុម Real និងអ្នកគាំទ្រហាក់ពុំសូវឲ្យតម្លៃ ឬគាំទ្រពេញទំហឹងដល់អ្នកចាត់ការរូបនេះឡើយ។
២. មានបញ្ហាជាមួយកីឡាករ៖ Benitez ចាប់ផ្ដើមធ្វើឲ្យ Cristiano Ronaldo អន់ចិត្ត តាំងពីនិយាយថា កីឡាករជម្រើសជាតិព័រទុយហ្គាល់ជាកីឡាករម្នាក់ ក្នុងចំណោមកីឡាករល្អបំផុតលើលោក ដែលមានន័យថា លោកមិនយល់ថា CR7 ល្អបំផុតទេ ថែមទាំងឲ្យ Gareth Bale លេងនៅតំបន់កណ្ដាល។ អតីតអ្នកចាត់ការ Chelsea រូបនេះ ក៏បានខ្វែងគំនិតគ្នាជាមួយ Sergio Ramos និងមានបញ្ហារកាំរកូសជាមួយ James Rodriguez, Denis Cheryshev និង Jese Rodriguez ផងដែរ។
៣. បញ្ហាលើទីលាន៖ រដូវកាលនេះ Real បានឈ្នះគេច្រើនគ្រាប់ដូចជា ឈ្នះ Rayo ១០-២ និងឈ្នះ Malmo ៨-០ មែន ប៉ុន្តែពេលប៉ះក្រុមដូចជា Sevilla, Atletico Madrid, Villarreal, Valencia និង Barcelona ក្រុមស្ដេចស ធ្វើមិនបានល្អទេ ដែលនេះបង្ហាញថាក្រុមលេងលក្ខណៈឯកជនអាស្រ័យលើសមត្ថភាពកីឡាករម្នាក់ៗ និងគ្មានបច្ចេកទេស ឬយុទ្ធសាស្ត្រអ្វីឡើយ។
៤. ជំនួប El Clasico ចាញ់បាក់មុខក្នុងដីខ្លួនឯង៖ El Clasico ចុងក្រោយ កាលពីថ្ងៃទី២១ ខែវិច្ឆិកា ក្រុម Real Madrid ត្រូវបាន Barcelona លត់ទក់សាច់ ៤-០ នៅ Santiago Bernabéu ដែលធ្វើឲ្យអ្នកគាំទ្រខកចិត្តស្ទើរតែនិយាយមិនចេញ។
៥. Fans តែងស្រែកចំអកឲ្យ៖ អ្នកគាំទ្រ Real Madrid តែងតែបង្ហាញពីការមិនពេញចិត្តអ្នកចាត់ការ Benitez។ ជាក់ស្ដែងដូចកាលប្រកួតឈ្នះ Real Sociedad ៣-១ កាលចុងខែធ្នូ អ្នកគាំទ្រជាច្រើនបានស្រែកចំអកឲ្យ បន្ទាប់ពី Sociedad តាមស្មើ ១-១ មុននឹងទទួលជ័យជម្នះ។
៦. រឿងដកសិទ្ធចេញពី Copa del Rey៖ Real ត្រូវបានសហព័ន្ធបាល់ទាត់អេស្ប៉ាញ ពិន័យឲ្យធ្លាក់ចេញ Copa del Rey ដោយស្វ័យប្រវត្តិ បន្ទាប់ពីដាក់កីឡាករ Denis Cheryshev ដែលជាប់បម្រាមតាំងពីនៅក្រុមចាស់របស់គេឲ្យចូលលេង។ បញ្ហានេះក៏មិនមែនជាកំហុសរបស់ Benitez ទាំងស្រុងដែរ ហើយកីឡាករខ្លួនឯង ក៏គួរតែដឹងពីបញ្ហានេះ ប៉ុន្តែគ្រប់គ្នាបែរដាក់បន្ទុកលើអ្នកចាត់ការរូបនេះ។
ដូច្នេះសរុបមក កត្តាទាំងអស់ខាងលើនេះហើយ ដែលធ្វើឲ្យប្រធានក្លិប Real Madrid លោក Florentino Pérez សម្រេចចិត្តបណ្ដេញអ្នកចាត់ការរូបនេះចេញ និងជំនួសវិញដោយ Zinedine Zidane ដែលជាអ្នកចាត់ការ Real Madrid នៅឈុត B (Real Madrid Castilla)៕
-ចុចអាន៖ Zidane ប្ដេជ្ញាជួយ Real ពេញទំហឹង ក្រោយឡើងតំណែងអ្នកចាត់ការថ្មី
ប្រែសម្រួល៖ វិន ជីវ័ន្ត ប្រភព៖ sport-english | dailymail