ទោះមិនត្រូវគ្នា Ten Hag សរសើរ Sancho

2024-05-03 00:05:13
បាល់ទាត់

2024-05-03 00:05:13
ចំនួនមតិ 0 | ចំនួនចែករំលែក 0

ចន្លោះមិនឃើញ

ទោះមានទំនាក់ទំនងមិនល្អនឹងគ្នា អ្នកចាត់ការក្លឹប Manchester United លោក Erik Ten Hag បានកោតសរសើរទម្រង់លេងរបស់ខ្សែប្រយុទ្ធ Jadon Sancho ក្នុងការជួយ Borussia Dortmund យកឈ្នះ Paris Saint Germain ក្នុងប្រកួតជើងទីមួយនៃវគ្គពាក់កណ្ដាលផ្ដាច់ព្រ័ត្រកម្មវិធី UEFA Champions League។

លោក Ten Hag បានប្រាប់អ្នកសារព័ត៌មានថា Sancho បានបង្ហាញទម្រង់លេងយ៉ាងល្អ។ ទម្រង់លេងដែល Sancho បានបង្ហាញក្នុងអំឡុងការប្រកួតរវាង Dortmund និង PSG គឺជាមូលហេតុដែលនាំឲ្យ Manchester United បាននាំចូលកីឡាកររូបនេះកាលពី ៣ ឆ្នាំមុន។ លោក Ten Hag នឹងពិចារណាថានឹងចាត់ចែងយ៉ាងណាពីអនាគតរបស់ Ten Hag នៅបិសាចក្រហម។

ក្នុងការប្រកួតរវាង Dortmund និង PSG កាលពីថ្មីៗកន្លងទៅ កីឡាករអង់គ្លេសវ័យ ២៤ ឆ្នាំ Sancho មានទម្រង់លេងយ៉ាងល្អ ដោយខ្សែស្លាបបានបង្កការលំបាកជាច្រើនដល់ខ្សែប្រយុទ្ធ PSG ហើយបង្កើតឱកាសស៊ុតជាច្រើនឲ្យក្រុម Dortmund។ ជាលទ្ធផល Sancho បានជាប់ឈ្មោះជាកីឡាករល្អបំផុតប្រចាំការប្រកួត ក្រោយប្រកួតចប់។

ចាប់ពីខែមករា ឆ្នាំ២០២៤ មក Sancho បានផ្ទេរពី Manchester United មកលេងឲ្យក្លឹប Borussia Dortmund ក្នុងនាមជាកីឡាករខ្ចីជើង។ ការផ្ទេរនេះ កើតឡើងក្រោយ Sancho មានបញ្ហាទាស់ទែងពាក្យសម្ដីជាសាធារណៈជាមួយអ្នកចាត់ការក្លឹប Manchester United លោក Erik Ten Hag កាលពីចុងខែសីហា ឆ្នាំ ២០២៣ កន្លងទៅ។ ការណ៍នេះធ្វើឲ្យ Sancho មិនបានចូលរួមលេងឲ្យក្លឹបប្រមាណជាង ៤ ខែ មុនមកលេងឲ្យ Dortmund។ តាំងពីមកអាល្លឺម៉ង់វិញ Sancho បានបង្ហាញទម្រង់ប្រសើរជាងពេលរូបគេលេងនៅអង់គ្លេស។ គិតមកទល់ពេលនេះ កីឡាករលេងឲ្យ Dortmund សរុប ១៧ ប្រកួត និងស៊ុតចូល ៣ គ្រាប់។

Sancho បានមកចូលរួមជាមួយបិសាចក្រហមពីក្លឹបអាល្លឺម៉ង់ Dortmundកាលពីពាក់កណ្ដាលឆ្នាំ ២០២១ ក្នុងតម្លៃប្រមាណ ៧០ លានផោន។ ជាង ៣ ឆ្នាំនៅ Man Utd នេះ កីឡាករមានទម្រង់លេងមិនសូវមានផ្លែផ្កាដូចពេលលេងឲ្យ Dortmund។ Sancho លេងសរុប ៨២ ប្រកួត និងស៊ុតចូល ១២ គ្រាប់ឲ្យបិសាចក្រហម។

ដោយឡែក និយាយពីរឿង Champions League វគ្គពាក់កណ្ដាលផ្ដាច់ព្រ័ត្រវិញ មួយគូទៀតពោលគឺការប្រកួតជើងទីមួយរវាង Real Madrid និង Bayern Munich បានបញ្ចប់ក្នុងលទ្ធផល ២ ទល់នឹង ២។ ការប្រកួតជើងទីពីរ នឹងចាប់ផ្ដើមនៅសប្ដាហ៍ក្រោយ៕

ប្រភព៖ theguardian អត្ថបទ៖ សេរី មង្គល