Benitez ថា Real ស្មើ ០-០ ទល់ Valerenga ដោយសារគ្មាន Ronaldo

2015-08-10 15:57:44
បាល់ទាត់

2015-08-10 15:57:44
ចំនួនមតិ 0 | ចំនួនចែករំលែក 0

ចន្លោះមិនឃើញ

Rafael Benitez អ្នកចាត់ការក្រុម Real Madrid បានលើកឡើងថា ដោយសារតែក្រុមរបស់លោកអវត្តមាន Cristiano Ronaldo ទើបបានជាស្មើ ០-០ ទល់នឹងក្រុម Valerenga ក្នុងការប្រកួតមិត្តភាព កាលពីយប់មិញ។

Ronaldo បានអវត្តមានពីក្រុមស្ដេចស ក្នុងការប្រកួតមិត្តភាពចុងក្រោយយប់មិញ ដោយសារមានបញ្ហាខ្នងបន្តិចបន្តួច ខណៈដែលខ្សែប្រយុទ្ធ Karim Benzema ក៏អវត្តមានដែរ ដោយសាររបួសភ្លៅ។ យ៉ាងណាក្ដី លោក Benitez បានដាក់ Jese, Gareth Bale និង James Rodriguez ឲ្យលេងចាប់ដៃគូគ្នា នៅតំបន់ខាងលើ ប៉ុន្តែនៅតែមិនអាចស្វែងរកគ្រាប់បញ្ចូលទីបាន។

អ្នកចាត់ការសញ្ជាតិអេស្ប៉ាញ វ័យ៥៥ឆ្នាំ បាននិយាយថា៖ "ក្រុមរបស់យើងមានសមត្ថភាពគ្រប់គ្រាន់ ដើម្បីស្វែងរកគ្រាប់បាល់ ប៉ុន្តែយើងខ្វះនូវភាពច្បាស់លាស់។ យើងត្រូវគិតឡើងវិញថា យើងបានបាត់បង់កីឡាករដ៏សំខាន់បំផុត (CR7) ដែលជាអ្នកតែងតែស៊ុតចូលទីច្រើន។ ប៉ុន្តែក្រុមនឹងបន្តដំណើរទៅមុខទៀត និងគិតវិជ្ជមានជានិច្ច។ ខ្ញុំមិនទាន់ពេញចិត្តក្រុមរបស់យើង១០០% ដូច្នេះមុនទីផ្សារដោះដូរកីឡាករបិទនៅថ្ងៃទី៣១ ខែសីហា យើងសង្ឃឹមថានឹងមានសមាជិកក្រុមថ្មីបន្ថែម"។

ចំណែក Ronaldo វិញ កាលពីម្សិលមិញនេះដែរ បានបង្ហោះរូបភាពមួយសន្លឹកលើ Instagram ដោយស្លៀកខោខ្លីពណ៌លឿង ឈរនៅមាត់ឆ្នេរសមុទ្រ និងសរសេរជាសារថា៖ "Happy Sunday”។

ប្រកួតបន្ទាប់របស់ Real នឹងត្រូវប៉ះ Galatasaray ក្នុងការប្រកួតពានរង្វាន់ Santiago Bernabeu Trophy នាថ្ងៃទី១៨ ខែសីហា មុនធ្វើដំណើរទៅប៉ះ Sporting ប្រកួតបើកឆាករដូវកាលថ្មី La Liga នាថ្ងៃទី២៣ ខែសីហាខាងមុខ៕