Mahrez ខំបំពេញបំណងឪពុក តែស្ដាយលោកមិនបានឃើញ

2016-02-18 14:30:07
បាល់ទាត់

2016-02-18 14:30:07
ចំនួនមតិ 0 | ចំនួនចែករំលែក 0

ចន្លោះមិនឃើញ

Riyad Mahrez ខ្សែបម្រើឆ្នើមរបស់ក្រុម Leicester City ដែលកំពុងឈរកំពូលតារាង Premier League បានសម្រេចគោលបំណងរបស់ឪពុក ដែលចង់ឲ្យខ្លួនក្លាយជាកីឡាបាល់ទាត់អាជីព ប៉ុន្តែគួរឲ្យស្ដាយ ឪពុករបស់កីឡាករវ័យ២៤ឆ្នាំរូបនេះ បានបាត់បង់ជីវិតមុនសម្រេចបំណង តាំងពីរូបគេនៅវ័យ១៥ឆ្នាំមកម្ល៉េះ។

ឪពុកចង់ឲ្យក្លាយជាកីឡាករអាជីព មុនពេលស្លាប់៖

Ahmed Mahrez ឪពុករបស់ Riyad Mahrez សញ្ជាតិអាល់ហ្សេរី បានស្លាប់នៅវ័យ៥៤ឆ្នាំ ដោយសារជំងឺគាំងបេះដូង ខណៈដែលពេលនោះ Mahrez មានអាយុត្រឹម១៥ឆ្នាំប៉ុណ្ណោះ។ មុនពេលស្លាប់ Ahmed ដែលធ្លាប់ជាកីឡាករលេងនៅក្លឹបតូចមួយនៅប្រទេសអាល់ហ្សេរី តែងជួយបង្វឹកកូន និងទៅមើលកូនលេងបាល់ជានិច្ច ព្រោះលោកចង់ឃើញ Mahrez ក្លាយជាកីឡាករបាល់ទាត់អាជីពមួយរូប នាពេលអនាគត។

“ឪពុករបស់ខ្ញុំ តែងតែគាំទ្រខ្ញុំជានិច្ច។ គាត់ចង់ឃើញខ្ញុំក្លាយជាកីឡាករបាល់ទាត់អាជីព ហើយគាត់តែងនៅក្បែរខ្ញុំ។ គាត់តែងទៅមើលខ្ញុំលេងគ្រប់ប្រកួតកាលខ្ញុំនៅតូច ដើម្បីជួយណែនាំខ្ញុំ។ គាត់ធ្លាប់លេងនៅក្លឹបតូចមួយនៅប្រទេសអាល់ហ្សេរី និងបារាំង ដូច្នេះគាត់ដឹងរឿងច្រើនពីបាល់ទាត់ ហើយខ្ញុំតែងស្ដាប់គាត់។ ប៉ុន្តែក្រោយពេលគាត់ស្លាប់ ខ្ញុំគិតថាខ្ញុំត្រូវតែចាប់ផ្ដើមខិតខំខ្លួនឯង និងត្រូវធ្វើអ្វីឲ្យបានច្រើន ជាងអ្វីដែលគាត់រំពឹងពីខ្ញុំ”។ Mahrez បានប្រាប់ដល់ Guardian។

គ្រូបង្វឹកភាគច្រើនថា ស្គមពេកមិនអាចក្លាយជាកីឡាករ៖

Mahrez ចាប់ផ្ដើមដំបូងលេងឲ្យក្រុមនៅក្នុងស្រុក Sarcelles មុនពេលផ្ទេរទៅលេងឲ្យក្រុម Quimper និង Le Havre II នៅលីគកម្រិតទាបប្រទេសបារាំង លុះដល់ឆ្នាំ២០១១ ទើបបានជាប់ឈុតធំក្រុម Le Havre លេងនៅលីគ Ligue 2 របស់បារាំង មុនពេលផ្ទេរទៅអង់គ្លេសឆ្នាំ២០១៣ លេងឲ្យ Leicester នៅលីគលំដាប់ទី២ Championship។

“មានអ្នកចាត់ការក្រុមជាច្រើន ថាខ្ញុំស្គមពេក ហើយនឹងឆាប់ដួលបើគូប្រកួតប៉ះ ដូច្នេះខ្ញុំមិនអាចក្លាយជាកីឡាករអាជីពបានទេ។ ប៉ុន្តែគ្រូពីរទៅបីនាក់ យល់ថាខ្ញុំមានបច្ចេកទេសល្អ តែកាយសម្បទាមិនរឹងមាំ ដូច្នេះគាត់ផ្ដល់ឱកាសឲ្យខ្ញុំសាកល្បងខំប្រឹងប្រែង ទើបខ្ញុំអាចបង្ហាញសមត្ថភាពជាបន្តបន្ទាប់ រហូតមានថ្ងៃនេះ”។

ក្លាយជាកីឡាករលេចធ្លោខ្លាំងនៅ Premier League បច្ចុប្បន្ន៖

Mahrez ជាតួអង្គដ៏សំខាន់បំផុត (Key Player) ដែលជួយឲ្យក្រុម Leicester ឈរកំពូលតារាងលីគកំពូលអង់គ្លេសបច្ចុប្បន្ន បន្ទាប់ពីរូបគេស៊ុតបាន១៤គ្រាប់ និង Assists ១០ ក្នុងការបង្ហាញខ្លួន២៥ប្រកួតនៅ Premier League រដូវកាលនេះ និងធ្វើឲ្យក្លឹបយក្សអេស្ប៉ាញ FC Barcelona បង្ហាញការចាប់អារម្មណ៍ផងដែរ។

រៀបការជាមួយនារីអង់គ្លេស កាលឆ្នាំ២០១៥៖

កីឡាករជម្រើសជាតិអាល់ហ្សេរី ដែលមានម្ដាយសញ្ជាតិម៉ារ៉ុករូបនេះ បច្ចុប្បន្នកំពុងរស់នៅទីក្រុង Leicester ប្រទេសអង់គ្លេស និងទើបតែរៀបការជាមួយនារីអង់គ្លេសម្នាក់ កាលចុងឆ្នាំ២០១៥កន្លងទៅ មុនពេលចុះកុងត្រាជាមួយក្លឹប Leicester ដល់ឆ្នាំ២០១៩។

ដូច្នេះសរុបមក Mahrez មិនត្រឹមតែសម្រេចបំណងរបស់ឪពុកក្លាយជាកីឡាករបាល់ទាត់អាជីពប៉ុណ្ណោះទេ ពោលគឺថែមទាំងក្លាយខ្លួនជាកីឡាករល្បីនៅលីគកំពូលអង់គ្លេស ដែលមានទស្សនារាប់លាននាក់ជុំវិញពិភពលោកទៀត ប៉ុន្តែអ្វីដែលធ្វើឲ្យកីឡាកររូបនេះសោកស្តាយ គឺឪពុករបស់គេ ពុំបានឃើញភាពជោគជ័យរបស់គេទាំងអស់នេះឡើយ៕

-ចុចអាន៖ Mahrez បង្ហើបប្រាប់រឿងចង់ផ្ទេរទៅលេងឲ្យ Barcelona

ប្រែសម្រួល៖ វិន ជីវ័ន្ត ប្រភព៖ theguardian | wiki