- 2024-08-08 04:32:47
- កីឡាផ្សេងៗ
អ្នកចេះក្បាច់គុនខ្មែរមិនថាទម្រង់ណាទេឲ្យតែប្រាកដអាចចុះឈ្មោះប្រកួតពានរង្វាន់សម្ដេច ហ៊ុន ម៉ាណែត
- 2024-08-08 04:32:47
- ចំនួនមតិ 0 | ចំនួនចែករំលែក 0
អ្នកចេះក្បាច់គុនខ្មែរមិនថាទម្រង់ណាទេឲ្យតែប្រាកដអាចចុះឈ្មោះប្រកួតពានរង្វាន់សម្ដេច ហ៊ុន ម៉ាណែត
ចន្លោះមិនឃើញ
តាមសេចក្ដីប្រកាស និងបញ្ជាក់កាលពីថ្ងៃទី៧ ខែសីហា ឆ្នាំ២០២៤ ម្សិលមិញនេះដោយតំណាង NOCC បានលើកឡើងថាអ្នកដែលចេះក្បាច់គុនខ្មែរពិតប្រាកដមិនថាទម្រង់ក្បាច់គុនប្រយុទ្ធ ក្បាច់សម្ដែងដោយគ្មានអាវុធ និងមានអាវុធ បើមានបំណងចង់ចូលរួមប្រកួតពានរង្វាន់សម្ដេច ហ៊ុន ម៉ាណែត លើកទី១ អាចចុះឈ្មោះបានឥលូវនេះ។
ឯកឧត្ដម ថោង ខុន ប្រធានគណៈកម្មាធិការជាតិអូឡាំពិកកម្ពុជា និងជាប្រធានចំពោះកិច្ចដែលទទួលរៀបចំការប្រកួត «កីឡាយុទ្ធគុនចម្រុះខ្មែរបុរាណ» បានឲ្យដឹងថា ព្រឹត្តិការណ៍នេះគឺជាគំនិតផ្ដួចផ្ដើមរបស់សម្ដេចបវរធិបតីក្នុងគោលបំណងស្រាវជ្រាវគាស់រំលើងឡើងវិញក្បាច់បុរាណរបស់ខ្មែរគ្រប់ជំនាន់ក្រោមស្មារតីអភិរក្សដើម្បីអភិវឌ្ឍន៍ អភិវឌ្ឍន៍ដើម្បីអភិរក្ស។
ចំណែកឯកឧត្ដម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជាបានឲ្យដឹងថា ចំពោះកីឡាករ កីឡាការិនី និងមហាជនទូទៅដែលចេះក្បាច់គុនបុរាណនានាគ្រប់ទម្រង់ច្បាស់លាស់បើមានបំណងចង់ចូលរួមប្រកួតពានរង្វាន់សម្ដេច ហ៊ុម ម៉ាណែត លើកទី១ នេះចេះចុះឈ្មោះពីឥលូវនេះបាន។ មហាជនតាមស្រុកភូមិដែលមិនមានសហព័ន្ធ ឬក្លឹបនោះទេក៏អាចចុះឈ្មោះបានដែរដោយគ្រាន់តែបំពេញតាមលក្ខខ័ណ្ឌអត្តសញ្ញាណតាមតម្រូវការមួយចំនួនប៉ុណ្ណោះ។
ឯកឧត្ដមបញ្ជាក់បន្ថែមទៀតថា ការចូលរួមប្រកួតនេះគឺបានតែអ្នកដែលហ្វឹកហាត់ ឬចេះក្បាច់គុនខ្មែរប៉ុណ្ណោះ សម្រាប់កីឡាបរទេសផ្សេងៗទៀតមិនអនុញ្ញាតឲ្យចូលរួមប្រកួតប្រជែងក្នុងពានរង្វាន់នេះនោះឡើយ។ ចំពោះវិញ្ញាសាវិញមានផ្នែកប្រយុទ្ធ ផ្នែកសម្ដែងជាមួយអាវុធ និងសម្ដែងគ្មានអាវុធ។
បញ្ជាក់ដែរថា សេចក្ដីប្រកាស និងការផ្សព្វផ្សាយជាផ្លូវការនេះធ្វើឡើងកាលពីថ្ងៃទី៧ ខែសីហា ឆ្នាំ២០២៤ ម្សិលមិញនៅ NOCC។ ចំពោះការប្រកួត «កីឡាយុទ្ធគុនចម្រុះខ្មែរបុរាណ» លើកទី១ នេះនឹងធ្វើឡើងនៅថ្ងៃទី១៨ ដល់ ២០ ខែតុលា ឆ្នាំ២០២៤ ក្នុងវិមាននៃពហុកីឡដ្ឋានជាតិ៕