ម៉ាប់ឆ្វេង ទម្លាយកីឡាករ២រូបលេង៣ស្មើត្រូវជាមួយគេខ្លាំងណាស់

2024-06-18 06:00:00
បាល់ទះ

2024-06-18 06:00:00
ចំនួនមតិ 0 | ចំនួនចែករំលែក 0

ចន្លោះមិនឃើញ

តាំងពីប្រឡូកក្នុងអាជីពបាល់ទះក្រៅផ្លូវការមកដល់បច្ចុប្បន្ន គ្រឹល ម៉ាប់ ហៅបុរសសម្ដីផ្អែមសឺវីសឥតស្រមោលម៉ាប់ឆ្វេង បានចាប់អេគីប៣ច្រើនណាស់ដើរលេងមិនថាក្នុងស្រុកឬក្រៅប្រទេសឡើយ។ អ្នកស្នេហាវិស័យបាល់ទះក្រៅផ្លូវការច្បាស់ជាដឹងបីណាខ្លះជាមិនខាន។ ចុះលោកអ្នកដែលមិនទាន់ដឹងអាចទស្សទាយបានទេថាកីឡាករពីររូបណាដែលស្មាត់ឆ្វេងលំដាប់ស្រុកខ្មែររូបនេះចូលចិត្ត និងលេងសង់តង់គ្នាបំផុតនោះ?

ម៉ាប់ឆ្វេង

បើតាមការបញ្ជាក់របស់ ម៉ាប់ឆ្វេង អេគីប៣របស់គេដែលលេងសង់តង់គ្នាល្អបំផុតនោះគឺមានម៉ាប់ឆ្វេងផ្ទាល់ ថនប៉ះសេ និង វ៉េត សុវណ្ណនាថ។ កីឡាករបាល់ទះក្រៅផ្លូវការមានដើមកំណើតមកពីខេត្តកំពត បានលើកសរសើរថនប៉ះសេថាជាកីឡាករល្អគ្រប់គ្រឿងតែម្ដងទាំងប៉ះសេ ជើងក្រោម ថ្នក់ ស្មាត់ ចាប់សេវាបី ហើយថែមទាំងលោតគប់សេវាបានល្អទៀតផង។

ម៉ាប់ឆ្វេង បានបបញ្ជាក់យ៉ាងដូច្នេះ៖ "ថនខ្ញុំនិយាយពីចំណុចល្អរបស់គាត់ ទីមួយគាត់ប៉ះសេម្រាម ហើយបាល់ចេញពីម្រាមគាត់ទៅគឺច្បាស់ៗគឺធានា កាលនោះខ្ញុំវ៉ៃបាល់កោងក្រោយ ខ្ញុំអត់វ៉ៃបាល់ឡុងទេ ហើយកោងក្រោយរបស់គាត់គឺគាត់ប៉ះឥន្ធធនូ ល្អដាច់ជាងលិម៉ាទីអូ គឺនិយាយថាគាត់ហើយនិងខ្ញុំ ទោះបីខ្ញុំនៅចុងលីងក៏គាត់ប៉ះសេកោងឱ្យវ៉ៃបានដែរ ទីពីរថ្នក់របស់គាត់ច្បាស់ ថ្នក់របស់គាត់ចង់និយាយថាបើចំមិនថាបាល់វ៉ៃឬបាល់បោកទេ គឺអត់បែកគឺគ្មានងាយពីណាវ៉ៃរួចថ្នក់របស់គាត់ទេ ហើយគាត់ចេះជួយចាប់សឺវីសបី គាត់ស្មាត់បាន គាត់គប់សឺវីសបានគឺមួយចប់តែម្ដង"។

វ៉េត សុវណ្ណនាថ

ចំណែក វ៉េត សុវណ្ណនាថវិញ ម៉ាប់ឆ្វេង បានកោតសរសើរត្រង់ចំណុចចាប់សេវារឹង មានរនាំងធំល្អ ម៉ាត់ល្អ និងជាកីឡាករដែលស្រលាញ់សាច់បាល់។

ស្មាត់ឆ្វេងលំដាប់ Grad A ស្រុកខ្មែររូបនេះបានពន្យល់ទៀតថា ៖"សុវណ្ណនាថការលេងទីមួយគាត់រឹងសេវា ទីពីររនាំងរបស់គាត់ វ៉ៃបីបាំងតែមួយវ៉ៃបួនក៏បាំងមួយ គឺគាត់ពូកែដេញចាប់ ហើយរនាំងរបស់គាត់គឺគាត់ចាប់ច្បាស់ គាត់ម៉ាត់ល្អ ...ការម៉ាត់របស់គាត់គឺកាច គាត់លេងខ្នាញ់ជាមួយបាល់ គាត់គ្រឺតបាល់ បើយើងលេងមិនស្រលាញ់ មិនគ្រឺត គឺយើងលេងអត់អស់ទេ...ខ្ញុំមើលការលេងរបស់សុវណ្ណនាថ ទោះគាត់អំនួតបន្តិចមែន ប៉ុន្តែគាត់គឺគាត់បញ្ចេញឱ្យគូបដិបក្សខ្លាចគាត់តែម្ដង"។

ថនប៉ះសេល្អ សុវណ្ណនាថក៏ល្អ គួបផ្សំម៉ាប់ឆ្វេងល្អសេវានិងជើងក្រោមទៀត ធ្វើឱ្យអេគីបបីនេះខ្លាំងក្នុងវិស័យបាល់ទះក្រៅផ្លូវការ និងធ្វើឱ្យមហាជនអ្នកស្នេហាវិស័យកីឡាបាល់ទះកោតសរសើរគ្រប់ៗគ្នា។ ចុះប្រិយមិត្តយល់ថាបី ម៉ាប់ឆ្វេង ថនប៉ះសេ និងប្ដូរចង្កេះលើអាកាស វ៉េត សុវណ្ណនាថ ល្អដែរឬទេ?

អត្ថបទ៖ Um Sopheak