មោទកភាពចំពោះក្រុមបាល់ទះកម្ពុជាជាថ្មី! ៥ប្រកួតមិនចាញ់សោះឈ្នះពានសម្ដេចបវរ និងកៅអី SEA V League

2024-09-03 03:14:06
បាល់ទះ

2024-09-03 03:14:06
ចំនួនមតិ 0 | ចំនួនចែករំលែក 0

ចន្លោះមិនឃើញ

ពិតជាមានមោទកភាពចំពោះក្រុមបាល់ទះជម្រើសជាតិកម្ពុជាជា ដែលបានបង្ហាញទម្រង់លេងយ៉ាងល្អពិសេសការនាំជ័យជម្នះមុខមាត់ជូនប្រជាជនកម្ពុជាតាមរយៈការឈ្នះប្រាក់រង្វាន់ ១០០ លានរៀល ក្នុងព្រឹត្តិការណ៍បាល់ទះពានរង្វាន់សម្តេចមហាបវរធិបតី ហ៊ុន ម៉ាណែត ឆ្នាំ២០២៤ និងឡើងទៅប្រកួតបន្តក្នុងពានរង្វាន់ SEA V.League ឆ្នាំ២០២៥ ក្នុងនាមជាម្ចាស់ផ្ទះពានរង្វាន់ 2024 SEA V.League Challenge។

រូបភាពលើផេកសហព័ន្ធ

សម្រាប់ការប្រកួតដែលធ្វើឡើងនៅវិមានពហុកីឡដ្ឋានជាតិដែលចាប់ប្រកួតពីថ្ងៃទី៣០ខែសីហា ដល់ថ្ងៃទី១ ខែកញ្ញា ឆ្នាំ២០២៤ មានក្រុមចូលរួមចំនួន៤ រួមមានម្ចាស់ផ្ទះកម្ពុជា ម៉ាឡេស៊ី សិង្ហបុរី និងឡាវ ខណៈការប្រកួតរបស់ក្រុមជម្រើសជាតិកម្ពុជា ទទួលបានជ័យជម្នះគ្រប់ការប្រកួត។

ពានរង្វាន់ 2024 SEA V.League Challenge

ថ្ងៃទី៣០ សីហា ២០២៤ កម្ពុជា ឈ្នះ ម៉ាឡេស៊ី ៣-១

ថ្ងៃទី៣១ សីហា ២០២៤ កម្ពុជា ឈ្នះ ឡាវ ៣-០

ថ្ងៃទី១ កញ្ញា ២០២៤ កម្ពុជា ឈ្នះសិង្ហបុរី ៣-១

រូបភាពលើផេកសហព័ន្ធ

ពានរង្វាន់សម្តេចមហាបវរធិបតី នៅថ្ងៃទី២ ខែកញ្ញា ឆ្នាំ២០២៤

វគ្គពាក់កណ្តាលផ្ដាច់ព្រ័ត្រ កម្ពុជា ឈ្នះ ឡាវ ៣-០

វគ្គផ្ដាច់ព្រ័ត្រ កម្ពុជា ឈ្នះ ម៉ាឡេស៊ី ៣-០

សរុបចំណាត់ថ្នាក់និងប្រាក់រង្វាន់ក្នុងពានរង្វាន់សម្ដេចមហាបវរធិបតី ហ៊ុន ម៉ាណែត 2024មាន៖

លេខ១ ក្រុមកម្ពុជា ទទួលទឹកប្រាក់លើកទឹកចិត្តចំនួន ១០០ លានរៀល

លេខ២ ក្រុមម៉ាឡេស៊ី ទទួលទឹកប្រាក់លើកទឹកចិត្តចំនួន ៣០ លានរៀល

លេខ៣ ក្រុមសិង្ហបុរី ទទួលទឹកប្រាក់លើកទឹកចិត្តចំនួន ២០ លានរៀល

លេខ៤ ក្រុមឡាវ ទទួលទឹកប្រាក់លើកទឹកចិត្តចំនួន ១០ លានរៀល

រូបភាពលើផេកសហព័ន្ធ

បញ្ជាក់ដែរថា នៅឆ្នាំ២០២៤ នេះសហព័ន្ធកីឡាបាល់ទះអាស៊ាន បានរៀបចំការប្រកួតបាល់ទះក្នុងតំបន់ជា២កម្រិត ដោយកម្រិតទី១ ពានរង្វាន់ SEA V.League Challenge មានក្រុមកម្ពុជា ឡាវ ម៉ាឡេស៊ី និងសិង្ហបុរី និងកម្រិតទី២ ពានរង្វាន់ SEA V.League មានថៃ ឥណ្ឌូណេស៊ី ហ្វីលីពីន និងវៀតណាម។ ដោយឡែកកម្ពុជា នឹងឡើងទៅជំនួសកៅអីវៀតណាម នៅ SEA V.League នៅឆ្នាំ២០២៥ ខាងមុខ ក្រោយក្រុមវៀតណាម នៅបាតតារាងក្នុងការប្រកួតឆ្នាំ២០២៤ និងត្រូវធ្លាក់មកលេងពាន SEA V.League Challenge នៅឆ្នាំ២០២៥៕