ដានិតលីប្រូ បង្ហើបអេគីប៣ឈ្នះម្ចាស់ខ្សែក្រវ៉ាត់ វ៉េត សុវណ្ណនាថ និងស្មាត់ធំៗ

2024-06-08 03:55:00
បាល់ទះ

2024-06-08 03:55:00
ចំនួនមតិ 0 | ចំនួនចែករំលែក 0

ចន្លោះមិនឃើញ

អិន ដានិត ឬប្រិយមិត្តស្គាល់ដានិតលីប្រូកងពល ជាកីឡាករឆ្នើមមួយរូបក្នុងវិស័យបាល់ទះទាំងក្នុងនិងក្រៅផ្លូវការនៅកម្ពុជា។ ថ្ងៃនេះ Sabay សូមបង្ហាញពីអេគីប៣របស់គេដែលធ្លាប់ឈ្នះស្មាត់ធំៗលំដាប់ៗនិងឈ្នះម្ចាស់ខ្សែក្រវ៉ាត់ វ៉េត សុវណ្ណនាថ ផាន់ណា និងលិម៉ាទីអូទៀតផង។ តើអេគីប៣របស់កីឡាករជំនាញលីប្រូរូបនេះមានអ្នកណាខ្លះ?

ដានិតលីប្រូ

អេគីប៣របស់ដានិតមានឥន្ទ្រីពិឃាដ ឌូក និងផ្ការីកគ្រប់រដូវ ហួត សុភា។ អំឡុងឆ្នាំ ២០១៧-២០១៨ ពួកគេធ្លាប់លេងជាមួយម្ចាស់ខ្សែក្រវ៉ាត់ វ៉េត សុវណ្ណនាថ ផាន់ណា និងលិម៉ាទីអូ នៅតារាងបាល់ទះលោកគង់នៅវត្តប្រាសាទ។ បានជាដានិតហៅក្រុមសុវណ្ណនាថថាម្ចាស់ខ្សែក្រវ៉ាត់ ព្រោះបីនេះឈ្នះស្ទើរតែអស់គូទៅហើយ។ កាលនោះដានិតបានលើកសរសើរពីផាន់ណាថា ជាកីឡាករល្អម៉ាត់ផុងដី និងរឹងចាប់សេវា ចំណែក សុវណ្ណនាថ និងលិម៉ាទីអូ លេងយល់ចិត្តគ្នាខ្លាំងណាស់។ ទោះបីជាយ៉ាងណាជាលទ្ធផលក្រុមដានិត ឌូក និង ហួត សុភា បានយកឈ្នះក្រុមសុវណ្ណនាថមួយសិតសូន្យ។ ចាញ់មិនអស់ចិត្តក្រុមសុវណ្ណនាថបានសុំសងសឹក ប៉ុន្តែការប្រកួតដំណើរការបានតែពាក់កណ្ដាលសិតប៉ុណ្ណោះ ក៏ប្រកែកគ្នានិងលុបចោលការប្រកួតតែម្ដង។

ឥន្ទ្រីពិឃាដឌូក

ក្រោមមកទៀតក្រុមដានិតបានលេងបីស្មើជាមួយស្មាត់រ៉ា ដែលកាលនោះស្មាត់ធំរូបនេះត្រូវបានគេឱ្យរហស្សនាមថាបិសាចសេវា។ ក្រុមស្មាត់រ៉ាមានអធិរាជប្រអប់ស្មាត់រាជ និង ហុងប៉ះសេ។ បើតាមការឱ្យពីដានិត អ្នកណាៗក៏ទទួលស្គាល់សេវាស្មាត់រ៉ាដែរ ព្រោះលឿន ធ្ងន់ ដែលពិបាកក្នុងការចាប់ ប៉ុន្តែក្រុមដានិតបានយកឈ្នះក្រុមស្មាត់រ៉ា ២ សិតសូន្យដោយគ្មានការតបតនៅតារាងបាល់ទះលោកគង់នៅវត្តប្រាសាទ។

“ពេលហ្នុងគឺបិសាចសឺវីសក៏ស៊ីអស់ដែរ ព្រោះពេលហ្នុងស្មាត់រ៉ាឡើងណាស់ សឺវីសគាត់ចូលមិនងាយចាប់ទេ ប៉ុន្តែដល់ពេលមកជួបខ្ញុំនិងស្មាត់ឌូក គាត់គ្រវីក្បាលត្រង់ថាបាល់ដែលគាត់ត្រូវវ៉ៃស៊ី ដល់ដៃខ្ញុំ ត្រឹមខ្ញុំផ្លុងល្មមៗក៏ឡើង ពេលខ្លះសឺវីសល្អហើយយើងចាប់បានចឹង ធ្វើឱ្យគាត់វ៉ៃសឺវីសខូចរហូត ប៉ុន្តែកាលហ្នុងស្មាត់ឌូកអត់ទាន់បាក់ដៃទេ ក៏ស្មាត់ឌូកបាំងល្អដែរ ស្មាត់ឌូកចាប់ស្មាត់រ៉ាត្រឹលៗដែរ"។ នេះបើតាមការបញ្ជាក់បន្ថែមពីដានិត។

ហួត សុភា លេខ២ សុខ រ៉ាដូ លេខ១១

ក្រោមមកទៀតឥន្ទ្រីពិឃាដឌូកបានរបួសបាក់ម្រាមដៃ គ្មានដៃគូលេង ដានិត ក៏ចាប់ដៃគូជាមួយឥន្ទ្រីស្លាបដែក សុខ រ៉ាដូ និងប៉ាវប៉ះសេ។ អេគីបនេះបានលេងជាមួយស្មាត់រ៉ា រាជ និង ហុងប៉ះសេ ហើយពួកគេបានឈ្នះពីរសិតទៀតនៅតារាងបាល់ទះសួន។ ឈ្នះមួយប្រកួត សុខ រ៉ាដូ ចាប់ផ្ដើមល្អៗទាំងរនាំង ការចាប់សេវា និងស្មាត់។

ដានិតលីប្រូ បានរំលឹកទៀតថានៅដើមឆ្នាំ២០១៨នៅតារាងបាល់ទះលោកគង់នៅវត្តប្រាសាទដដែលរូបគេ ទង់ប៉ះសេ និង សុខ រ៉ាដូ បានយកឈ្នះយុនស្រែស្រែ ស្មាត់វ៉ា និងហុងប៉ះសេ ក្រោយក្រុមស្មាត់យុនឈ្នះម៉ាប់ឆ្វេងមួយសិតហើយនោះ។ ស្មាត់យុន ស្មាត់វ៉ា ឆ្នាំនោះកំពុងពេញឡើងខ្លាំង ប៉ុន្តែក្រោយដានិតយកឈ្នះយុន បីរបស់ពួកគេចាប់ផ្ដើមត្រូវបានគេខ្លាចរអាច្រើន។ បើនិយាយពីម៉ាប់ឆ្វេង និងសុវណ្ណនាថវិញ លេងមិនដែលឈ្នះដានិត រ៉ាដូ និងទង់ប៉ះសេឡើយ៕

អត្ថបទ៖ Um Sopheak