ការលេងបាល់ទះក្រៅផ្លូវការនៅកម្ពុជា ហាក់មានសភាពអាក្រក់ឡើងៗចាប់តាំងពីមានការផ្សព្វផ្សាយទូលំទូលាយតាមបណ្ដាញសង្គម ដែលជាហេតុធ្វើឲ្យmមាន​ការ​ចោទសួរទៅកាន់សហព័ន្ធកីឡាបាល់ទះ​កម្ពុជា​ថា ហេតុអ្វីបានសហព័ន្ធ​មិនមានចំណាត់ការផ្លូវ​ច្បាប់​តឹងរឹង​ណាមួយ​លើបញ្ហា​នេះ​​?

ទាក់ទងនឹងសំណួរនេះលោកបណ្ឌិត អាំង សិរីពិសិដ្ឋ អនុប្រធាននិងជាអគ្គលេខាធិការសហព័ន្ធកីឡាបាល់ទះកម្ពុជាបានលើកឡើងថា មិនមែនសហព័ន្ធគ្មានចំណាត់ការទេ ប៉ុន្តែសហព័ន្ធកំពង់រងចាំច្បាប់ចេញសិន ដើម្បីដាក់បន្ទុកលើក្រុមលេងខុសបច្ចេកទេស​និង​អ្នកពាក់ព័ន្ធ​ផ្សេងទៀត​ដែល​នាំ​ឱ្យ​ខូច​មុខ​មាត់​ប្រទេស​ជាតិ​។

ប៉ុន្មាន​ឆ្នាំ​ចុងក្រោយ​សហព័ន្ធ​បាន​ខិតខំ​ប្រឹងប្រែង​យ៉ាង​ខ្លាំង​ក្នុង​ការ​អភិវឌ្ឍ​វិស័យ​បាល់ទះ​កម្ពុជា​។ ដូចជា​បណ្ដុះបណ្ដាល​ថ្នាល​យុវជន បង្កើត​ឱ្យ​មាន​ព្រឹត្តិការណ៍​ប្រកួត​បាល់​ទះ​នានា​ដូចជា​​ពាន​រង្វាន់​ឯកឧត្ដម​អភិសន្តិបណ្ឌិត ស សុខា ពាន​រង្វាន់​សម្ដេច​ក្រឡាហោម​ ស ខេង ពាន​រង្វាន់​តេជោលីគ និង​ការប្រកួត​មិត្ត​ភាព​អន្តរជាតិ​ជាច្រើនទៀត។ ដើម្បី​ជួ​យកាត់​បន្ថយ​និង​កែតម្រូវ​ការ​លេងបាល់ទះ​ខុស​បច្ចេកទេស ថ្មីៗ​នេះ​សហព័ន្ធ​បាន​បង្កើត​ព្រឹត្តិការណ៍​៤ស្មើទូទាំងប្រទេស WURKZ Special Volleyball Cup 4x4 ឆ្នាំ​២០២៤​។ ព្រឹត្តិការណ៍នេះបាន​ជម្រុញឲ្យពលរដ្ឋកម្ពុជាងាកមកលេងបាល់ទះបែបបច្ចេកទេ និងផលិត​បាន​ធនធានកីឡាករបាល់ទះកម្ពុជា​ជា​ច្រើន​។

លោកបណ្ឌិត អាំង សិរីពិសិដ្ឋ បានបន្ថែមទៀតថា សហព័ន្ធកីឡាបាល់ទះកម្ពុជាកំពុងតែដើរផ្លូវត្រូវ។ លោកមើលឃើញថាការលេងបាល់ទះខុសបច្ចេកទេសនៅតាមសហគមន៍ភូមិស្រុកនាពេលបច្ចុប្បន្ន ចាប់ផ្ដើមកាត់បន្ថយបន្តិចម្ដងៗ ហើយលោករំពឹងថ្ងៃណាមួយឬអាចនឹងឆ្នាំក្រោយៗការលេងបែបទម្លាប់អាក្រក់នេះនឹងត្រូវលុបបំបាត់បានទាំងស្រុង។

ការកែទម្លាប់លេងបាល់ទះអាក្រក់តាមរយៈការស្ម័គ្រចិត្តរបស់ក្រុមអ្នកលេងបាល់ទះនៅកម្ពុជាគឺ​ជាអ្វីដែលលោកបណ្ឌិត អាំង សិរីពិសិដ្ឋ ចង់បាននិងឃើញជាជាងការបង្ខិតបង្ខំ ហើយលោកសំណូមពរឲ្យអ្នកស្នេហាវិស័យកីឡាបាល់ទះជួយកែតម្រូវគ្នា ដើម្បីឱ្យ​វិស័យបាល់ទះកម្ពុជាយើងកាន់​តែ​រីកចម្រើន៕