គំរូល្អ! អេលេក្ស ជើងខ្លាំងដើរហូបតាមភូមិពាយ ប្រកាន់ភ្ជាប់មិនលេងបាល់ទះស្អិតជាប់ដៃ

2024-02-26 06:05:00
បាល់ទះ

2024-02-26 06:05:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្របពេលកីឡាបាល់ទះក្រៅផ្លូវការត្រូវបាននឹងកំពុងលេងស្អិតជាប់ដៃនៅតាមតារាងបាល់ទះនានានៅកម្ពុជា កីឡាករ សាវុត អេលេក្ស និងក្រុមលេងតាមភូមិរបស់គេបានប្រកាន់ភ្ជាប់ការមិនលេងបែបនេះឡើយ ព្រោះគេយល់ឃើញថាជាគំរូមិនល្អ។ ផ្ទុយទៅវិញការលេងវ៉ៃបោះប៉ះសេដាច់ៗធ្វើឱ្យបាល់ទះល្អមើលនិងជក់ចិត្ត។

ស្មាត់ឆ្វេងដ៏ល្អនៅខេត្តបាត់ដំបងដែលទើបជួយឱ្យក្លឹបកីឡាបាល់ទះបាត់ដំបងលើកពាន Wurkz Special Volleyball Cup 4x4 2024 ភូមិភាគបាត់ដំបងកាលពីថ្ងៃទី២៥ កុម្ភៈ ឆ្នាំ២០២៤ក្ដៅៗនេះ បានទម្លាយប្រាប់ដូច្នេះថា ៖"...អត់ចេះលេងបោកទេ មិត្តរួមក្រុមខ្ញុំក៏អត់មានអ្នកបោកដែរ ឆ្វេងស្ដាំអត់មានណាចេះបោកទេ វ៉ៃបោះ! អត់ចេះបោកទេគ្នាខ្ញុំលេង..."។

ដោយប្រកាន់ភ្ជាប់បែបនេះ កីឡាករវ័យ១៩ឆ្នាំបានសំណូមពរអ្នកលេងបាល់ទះក្រៅផ្លូវការជួយកែតម្រូវគ្នាដូចជាប៉ះសេកុំឱ្យជាប់ពេក កុំស្អិតពេក កុំបោកខុសបច្ចេកទេស ពីព្រោះធ្វើឱ្យការប្រកួតមិនល្អមើល។

គួរបញ្ជាក់ថាកីឡាករ សាវុត អេលេក្ស ជាសមាជិកក្រុមដ៏ឆ្នើមមួយរូបរបស់ក្លឹបបាល់ទះបាត់ដំបង ដែលបានជួយឱ្យក្រុមមួយនេះលើកពាន Wurkz Special Volleyball Cup 4x4 2024 កាលពីពេលថ្មីៗ ក្រោយយកឈ្នះក្រសួងមហាផ្ទៃ B នៅវគ្គផ្ដាច់ព្រ័ត្រ២សិតទល់១សិត។ ក្រុមរបស់គេទទួលបានពាន១ ប្រាក់រង្វាន់១១លានរៀល និងមានកៅអីទៅប្រកួតនៅភ្នំពេញ ខណៈលេខ២បានប្រាក់រង្វាន់៥លានរៀល និងទទួលបានកៅអីទៅប្រកួតនៅភ្នំពេញដូចគ្នា។

ចំណាត់ថ្នាក់លេងខ៣ បានទៅលើស្នងការរដ្ឋាននគរបាលខេត្តបាត់ដំបងទទួលបានប្រាក់រង្វាន់២លានរៀលនិងលេខ៣ បានលើស្នងការរដ្ឋាននគរបាលខេត្តបន្ទាយមានជ័យ ទទួលបានប្រាក់រង្វាន់១លានរៀល។ សម្រាប់ក្រុមទាំងអស់ដែលបានចុះឈ្មោះលេងក្នុងព្រឹត្តិការណ៍នេះ សហព័ន្ធកីឡាបាល់ទះកម្ពុជា បានផ្ដល់ប្រាក់លើកទឹកចិត្តក្នុងមួយក្រុមចំនួន១លានរៀល៕

អត្ថបទ៖ Um Sopheak