ក្រុមលេខ១ដល់៤តេជោលីគ ចាំនៅភ្នំពេញប្រកួតវិលជុំពាន៤ស្មើ Wurkz Special Volleyball Cup

2024-02-21 04:50:00
បាល់ទះ

2024-02-21 04:50:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមចំណាត់ថ្នាក់ពីលេខ១ដល់លេខ៤ នៃពានរង្វាន់តេជោលីគដែលទើបបញ្ចប់ទៅកាលពីពេលថ្មីៗនេះនឹងទទួលបានមួយកៅអី ដើម្បីវិលជុំសន្សំពិន្ទុក្នុងពូលនៃការប្រកួតប្រជែងដណ្ដើមពានរង្វាន់ព្រឹត្តិការណ៍៤ស្មើទូទាំងប្រទេស Wurkz Special Volleyball Cup 4x4 2024 នៅភូមិភាគរាជធានីភ្នំពេញ។

លោកបណ្ឌិត អាំង សិរីពិសិដ្ឋ

បើតាមប្រសាសន៍របស់លោកបណ្ឌិត អាំង សិរីពិសិដ្ឋ អនុប្រធាននិងជាអគ្គលេខាធិការសហព័័ន្ធកីឡាបាល់ទះកម្ពុជា ក្នុងសន្និសីទសារព័ត៌មានកាលពីថ្ងៃទី២០ ខែកុម្ភៈ ឆ្នាំ២០២៤ នៅផ្សារទំនើបជីពម៉ុង ២៧១ សហព័ន្ធកីឡាបាល់ទះកម្ពុជាបានផ្ដល់សិទ្ធិពិសេសដល់ក្លឹបអាជីពដែលមានចំណាត់ថ្នាក់លេខ១ដល់លេខ៤នៅក្នុងពានរង្វាន់តេជោលីគពោលគឺមាន១កៅអីចាំនៅភូមិភាគរាជធានីភ្នំពេញ។

លោកបណ្ឌិត អាំង សិរីពិសិដ្ឋ បានពន្យល់ថា ៖"យើងផ្ដល់សិទ្ធិពិសេសទៅដល់ក្លឹបអាជីពដែលលេងនៅក្នុងតេជោលីគគឺអាច Stand By ចាំបើគាត់ចង់ចូលលេង មិនមែនជាការបង្ខំទេណា ប៉ុន្តែយើងឱ្យកូតាមួយគឺក្លឹបដែលលេងនៅតេជោលីគ ១ ២ ៣ ៤ ហ្នឹងគឺគាត់អាចមានសិទ្ធិមានមួយកៅអីនៅចាំនៅរាជធានីភ្នំពេញតែម្ដង ហើយបើសិនគាត់មិនចូលរួមអាហ្នឹងជាសិទ្ធិរបស់គាត់"។

ក្រុមចំណាត់ថ្នាក់លេខ១ដល់លេខ៤នៃព្រឹត្តិការណ៍តេជោលីគឆ្នាំ២០២៣-២០២៤ មានក្លឹបបញ្ជាការដ្ឋានអង្គរក្ស សមាគមបាល់ទះវិសាខា ក្លឹបបាល់ទះស្នងការដ្ឋាននគរបាលរាជធានីភ្នំពេញ និងសមាគមបាល់ទះក្រសួងមហាផ្ទៃ។

ងាកមកព្រឹត្តិការណ៍ប្រកួត៤ស្មើឯណេះវិញ Wurk Special Volleyball Cup 4x4 2024 មាន៤២ក្រុម ធ្វើឡើងនៅ៥ភូមិភាគផ្សេងគ្នារួមមានភូមិភាគខេត្តបាត់ដំបង (២៤-២៥ កុម្ភៈ ឆ្នាំ២០២៤) សៀមរាប (០២-០៣ មីនា ឆ្នាំ២០២៤) កំពង់ចាម (០៩-១០ មីនា ឆ្នាំ២០២៤) ព្រៃវែង (១៦-១៧ មីនា ឆ្នាំ២០២៤) និងខេត្តព្រះសីហនុ (២៣-២៤ មីនា ឆ្នាំ២០២៤)។ កីឡាករមានយ៉ាងតិច៦នាក់ច្រើនបំផុត៨នាក់ និងគណៈប្រតិភូគ្រូបង្វឹក៣នាក់ក្នុងមួយក្រុម។

ការប្រកួតតាមភូមិភាគនីមួយៗធ្វើតាមរួបមន្តជម្រុះចាញ់ធ្លាក់ មានតែបីប្រកួតប៉ុណ្ណោះ (The Best of 3) ឈ្នះពីរប្រកួតឈ្នះការប្រកួត ខណៈចំណាត់ថ្នាក់មានពីលេខ១ដល់លេខ៤ ប៉ុន្តែយកត្រឹមលេខ១លេខ២ប៉ុណ្ណោះ ឡើងមកប្រកួតវិលជុំនៅភូមិភាគរាជធានីភ្នំពេញ។ ចំណាត់ថ្នាក់នៅតាមភូមិភាគទាំង៥ លេខ១បានពានមួយនិងប្រាក់រង្វាន់១១លានរៀល ខណៈលេខ២ដល់លេខ៤មិនទទួលបានពានឡើយតែមានថវិកាអម។

ចំណែកការប្រកួតនៅរាជធានីភ្នំពេញធ្វើឡើងតាមរូបមន្តវិលជុំសន្សំពិន្ទុក្នុងពូល និងមានចំនួន៥សិត (The Best of 5) ឈ្នះ៣សិតឈ្នះការប្រកួត យកត្រឹមចំណាត់ថ្នាក់លេខ១ដល់លេខ៣ ចំណែកក្រុមឈ្នះជើងឯកបានពានមួយនិងប្រាក់រង្វាន់៥០លានរៀល៕

អត្ថបទ៖ Um Sopheak