ក្លឹប​អារ៉ាប៊ីសាអ៊ូឌីត Al-Nassr បាន​ចេញ​មុខ​បកស្រាយ​ជា​សាធារណៈ​ពាក់ព័ន្ធ​នឹង​កុងត្រា​របស់​ខ្សែ​ប្រយុទ្ធ​ព័រទុយហ្គាល់​កីឡាករ Cristiano Ronaldo។

នៅ​ក្នុង​បណ្ដាញសង្គម​របស់​ខ្លួន​ ក្លឹប​អារ៉ាប​មួយ​នេះ​បាន​លើកឡើង​ថា «កុងត្រា​របស់​ Cristiano Ronaldo ជាមួយ​នឹង​ក្លឹប Al Nassr មិន​មាន​ជាប់​ពាក់​ព័ន្ធ​នឹង​កិច្ចការ​ណា​មួយ​របស់​ការ​ដេញ​ថ្លៃ​ [របស់​អារ៉ាប៊ីសាអ៊ូឌីត] ក្នុង​ការ​ធ្វើ​ជា​ម្ចាស់​ផ្ទះ​ World Cup នោះ​ទេ»។

ខាង​ក្លឹប​បាន​បន្ត​ថា៖ «ការងារ​ចម្បង​របស់​ Ronaldo គឺ​ផ្ដោត​លើ​ក្លឹប Al Nassr និង​សហការ​ជាមួយ​មិត្ត​រួម​ក្រុម​ក្នុង​ការ​ជួយ​ឱ្យ​ក្លឹប​ទទួល​បាន​ភាព​ជោគជ័យ»។

កន្លង​មក​មាន​សេចក្ដីរាយការណ៍​ជា​ច្រើន​បាន​ឱ្យ​ដឹង​ថា Ronaldo ជាប់​កុងត្រា​ជាមួយ​ក្លឹប​អារ៉ាប៊ីសាអ៊ូឌីត​រយៈពេល ៧ឆ្នាំ ដោយ​លេង​បាល់ទាត់​ ២ឆ្នាំ ហើយ​ធ្វើ​ជា​ទូត​សុច្ឆន្ទៈ​ក្នុង​ការ​លើក​មុខមាត់​ប្រទេស​មជ្ឈិមបូព៌ា ៥ឆ្នាំ​ទៀត ដើម្បី​ជួយ​ឱ្យ​ប្រទេស​នេះ​ឈ្នះ​សិទ្ធិ​ធ្វើ​ជា​ម្ចាស់​ផ្ទះ World Cup ឆ្នាំ២០៣០។

សម្រាប់​ព្រឹត្តិការណ៍ World Cup ឆ្នាំ២០៣០ អារ៉ាប៊ីសាអ៊ូឌីត​មាន​ផែនការ​សហការ​ធ្វើ​ជា​សហ​ម្ចាស់​ផ្ទះ​ជាមួយ​ក្រិក និង​អេហ្ស៊ីប៕

Al Nassr FC would like to clarify that contrary to news reports, Cristiano Ronaldo's contract with Al Nassr does not entail commitments to any World Cup bids.

His main focus is on Al Nassr and to work with his teammates to help the club achieve success.

— AlNassr FC (@AlNassrFC_EN) January 10, 2023