- 2022-06-09 04:39:10
- បាល់ទះ
យុវតី លាន គីមឡាង ថាទន្ទឹងចាំការធ្វើតេស្តចូលជម្រើសជាតិបាល់ទះនារីច្រើនឆ្នាំហើយ
- 2022-06-09 04:39:10
- ចំនួនមតិ 0 | ចំនួនចែករំលែក 0
យុវតី លាន គីមឡាង ថាទន្ទឹងចាំការធ្វើតេស្តចូលជម្រើសជាតិបាល់ទះនារីច្រើនឆ្នាំហើយ
ចន្លោះមិនឃើញ
យុវតីកម្ពស់១,៧០ម៉ែត្រ លាង គីមឡាង មកពីខេត្តកំពង់ចាម បានបង្ហាញអារម្មណ៍ពេញចិត្តជាខ្លាំង សម្រាប់ការប្រកាសជ្រើសរើសកីឡាការិនីជម្រើសជាតិបាល់ទះរបស់សហព័ន្ធបាល់ទះកម្ពុជា ហើយគេក៏បានទន្ទឹងរង់ចាំឱកាសនេះច្រើនឆ្នាំហើយ។
ក្នុងឱកាសចូលធ្វើតេស្តជាមួយយុវតីជាច្រើននាក់មកពីតាមបណ្ដាខេត្តចំនួន១១ដែលបានដាក់ពាក្យចូលរួមនោះ គីមឡាង បានឲ្យដឹងថា ខ្លួនពិតជាសប្បាយចិត្តដែលអាចបង្ហាញសមត្ថភាពស្វែងរកឱកាសបំពេញក្ដីស្រមៃរបស់ខ្លួន។ កន្លងមកគេចេះតែទន្ទឹងរង់ចាំឱកាសនោះរហូតមក ព្រោះថាបាល់ទះជាវិស័យដែលខ្លួនស្រលាញ់បំផុតមួយ។
បើនិយាយពីបទពិសោធលេងបាល់ទះនេះ គីមឡាង បានប្រលូកតាំងពីក្មេងៗមកម្ល៉េះ ពោលគឺលេងតែជាមួយក្មេងប្រុសៗប៉ុណ្ណោះ ពីព្រោះដូចដែលប្រិយមិត្តបានដឹងហើយថា បាល់ទះកម្រមានក្រុមក្មេងស្រីៗលេងបាល់ទះមែនទែន។ ដោយសារខ្លួនធ្លាប់បានចូលរួមប្រកួតកម្មវិធីប្រកួតផ្លូវការច្រើនដងរួចមកហើយ និងបានលេងបាល់ទះនៅតាមភូមិស្រុករបស់ខ្លួនតាំងពីក្មេងមកនោះ ទើបធ្វើឲ្យយុវតីរូបនេះកើតចិត្តស្រលាញ់វិស័យបាល់ទះ និងចង់ក្លាយជាកីឡាការិនីជម្រើសជាតិបាល់ទះកម្ពុជា។
រំលឹកថា ការជ្រើសរើសកីឡាការិនីជម្រើសជាតិបាល់ទះនារីនេះជាការចាប់ផ្ដើមមួយ សម្រាប់សហព័ន្ធកីឡាបាល់ទះកម្ពុជាក្នុងគោលដៅដាក់ចូលក្នុងស៊ីហ្គេមឆ្នាំ២០២៣ដែលកម្ពុជាធ្វើជាម្ចាស់ផ្ទះ។ អ្វីដែលសហព័ន្ធត្រូវតែធ្វើនេះគឺនឹងបញ្ជូនកីឡាការិនី ព្រមទាំងគ្រូបង្វឹកចំនួន ១៥ នាក់ទៅហាត់នៅចិនមួយរយៈពេល ដែលនឹងចេញទៅឆាប់ៗនេះផងដែរ៕
