- 2022-05-20 02:31:53
- បាល់ទះ
ក្រុមបាល់ទះលើក្ដារ៖ ទោះដឹងថាឥណ្ឌូណេស៊ីខ្លាំងមែន តែពួកខ្ញុំមិនរាថយក៏មិនខ្លាច
- 2022-05-20 02:31:53
- ចំនួនមតិ 0 | ចំនួនចែករំលែក 0
ក្រុមបាល់ទះលើក្ដារ៖ ទោះដឹងថាឥណ្ឌូណេស៊ីខ្លាំងមែន តែពួកខ្ញុំមិនរាថយក៏មិនខ្លាច
ចន្លោះមិនឃើញ
នាម៉ោង២រសៀលនេះក្រុមបាល់ទះលើក្ដារកម្ពុជា នឹងត្រូវតស៊ូជាមួយក្រុមខ្លាំងឥណ្ឌូណេស៊ីក្នុងការប្រកួតព្រឹត្តិការណ៍ ស៊ីហ្គេម នៅប្រទេសវៀតណាម វគ្គពាក់កណ្ដាលផ្ដាច់ព្រ័ត្រ។ មុនការប្រកួតនេះចាប់ផ្ដើមស្មាត់ដេញបាល់លឿនរបស់កម្ពុជា មួន និមល បានបង្ហាញការតាំងចិត្តថា «ទោះដឹងថា ឥណ្ឌូណេស៊ី ខ្លាំងមែន តែពួកខ្ញុំមិនរាថយ ក៏មិនខ្លាច ហើយនឹងតស៊ូដណ្ដើមមេដាយជូនជាតិឲ្យបាន»។
ស្មាត់ដែលបានជាប់ជម្រើសជាតិទៅលេងស៊ីហ្គេមចំនួនពីរលើករួមទាំងលើកនេះខាងលើបានឲ្យដឹងថា ក្រុមទាំងមូលពិតជាសប្បាយចិត្តដែលអាចបង្ហាញឲ្យប្រទេសផ្សេងៗឃើញពីកម្រិតនៃការរីកចម្រើនរបស់ក្រុមបាល់ទះលើក្ដារកម្ពុជា។ រូបគេបានតាំងចិត្តថា នឹងបន្តប្រឹងប្រែងបន្ថែមទៀតទោះដឹងថា ឥណ្ឌូណេស៊ី ជាជើងខ្លាំងតែក្រុមមិនខ្លាចឡើយក្នុងការប្រកួតតំណាងជាតិមួយនេះ។
«ជាដំបូងខ្ញុំសូមគោរពដល់បងប្អូនប្រជាពលរដ្ឋទាំងអស់ ខ្ញុំបាទ មួន និមល ពិតជាមានអារម្មណ៍សប្បាយចិត្តជាខ្លាំង ដែលអាចមានឱកាសជួយជាតិក្នុងព្រឹត្តិការណ៍ដ៏សំខាន់មួយនេះ។ ម៉ោង ២ រសៀលនេះពួកយើងនឹងប៉ះក្រុមខ្លាំងឥណ្ឌូណេស៊ីហើយ ទោះដឹងថា ឥណ្ឌូណេស៊ី គេខ្លាំងមែនពួកខ្ញុំមិនរាថយ ក៏មិនខ្លាច ហើយបានតាំងចិត្តទាំងអស់គ្នាថា នឹងប្រឹងប្រែងតស៊ូ ដើម្បីយកជ័យជម្នះជូនកម្ពុជាឲ្យបាន ហើយនឹងយកមេដាយជូនកម្ពុជាឲ្យបាន»។
រំលឹកថា ក្រុមបាល់ទះឥណ្ឌូណេស៊ី ជាម្ចាស់មេដាយមាសស៊ីហ្គេមកាលឆ្នាំ២០១៩ ដែលធ្វើឡើងនៅហ្វីលីពីន ហើយក្រុមកម្ពុជាកាលនោះត្រូវបានគេដឹងថា ធ្លាក់ក្នុងវគ្គសន្សំពិន្ទុក្នុងពូល ៕
