យុនចាប់ផ្ដើមឈឺចង្កេះជាថ្មី ស្របពេលការប្រកួតសំខាន់ៗនៅមានច្រើន

2021-12-29 05:03:36
បាល់ទះ

2021-12-29 05:03:36
ចំនួនមតិ 0 | ចំនួនចែករំលែក 0

ចន្លោះមិនឃើញ

កីឡាកររបស់ក្លឹបបាល់ទះស្នងការដ្ឋាននគរបាលរាជធានីភ្នំពេញ ទុយ កុសល ចាប់ផ្ដើមមានអាការៈឈឺចង្កេះជាថ្មីម្ដងទៀត ស្របពេលការប្រកួតសំខាន់នៅមានច្រើនដូចជាការប្រកួតវគ្គផ្ដាច់ព្រ័ត្រជាមួយក្រសួងមហាផ្ទៃ ដណ្ដើមមេដាយមាស «ក្រុមអធិរាជបាល់ទះ ISI PIPE-ISI PALM» និងពានរង្វាន់បាល់ទះក្រៅផ្លូវការ «៧មករា» ជាដើម។

ប៉ុន្មានម៉ោងមុននេះស្មាត់រហស្សនាមយុនស្រែស្រែ បានបង្ហោះរូបពីរសន្លឹកលើផេករបស់ខ្លួនភ្ជាប់ជាមួយសំណេរថា "សុំបាត់មុខមួយរយះសិនហើយបងប្អូន ដោយសារចង្កេះខ្ញុំមានបញ្ហាទៀតហើយ សម្រាកព្យាបាលចង្កេះ"។

សំណេររបស់ប្អូនប្រុសបង្កើតស្មាត់រាជ បានធ្វើឱ្យអ្នកគាំទ្រជាច្រើនមានការព្រួយបារម្ភ និងខំមិនផ្ញើសារជូនពរឱ្យស្មាត់មានដើមកំណើតមកពីខេត្តកំពត ឆាប់ជាសះស្បើយពីរបួសចង្កេះ។

តើរបួសចង្កេះស្មាត់យុនយ៉ាងម៉េចហើយនៅពេលនេះ? ពាក់ព័ន្ធនឹងបញ្ហារបួសនេះដែរស្មាត់លំដាប់ជួរមុខស្រុកខ្មែរ បានប្រាប់មកកាន់ Sabay ថារូបគេមិនអីទេ ហើយរបួសចង្កេះក៏បានធូរស្រាលច្រើនដែរ ប៉ុន្តែគេត្រូវផ្អាកលេងបាល់មួយរយះសិន។

យុនបង្ហើបយ៉ាងខ្លីថា ៖«ទៅពេទ្យព្យាបាលឥឡូវលែងអីហើយបងធម្មតាវិញហើយ គ្រាន់តែយើងផ្អាកលេង»។

គួរបញ្ជាក់ថា ស្មាត់យុនបានរងរបួសចង្កេះនៅឆ្នាំ២០២០ អំឡុងពេលលេងបាល់ទះក្រៅផ្លូវការនៅខេត្តកំពង់ធំ។ របួសចង្កេះបានធ្វើឱ្យរូបគេបាត់មុខពីពីពិភពបាល់ទះមួយរយះពេលធំ លុះដល់ឆ្នាំ២០២១ ទើបគេអាចចេញប្រឡូកវិញ ក្រោយរបួសបានធូរស្រាល៕

អត្ថបទ៖ អ៊ុំ សុភក្តិ