មិនស្គាល់ទើបចម្លែក! នេះហើយស្មាត់ ហ៊ុប ធ្លាប់តឱ្យអ្នកបុរីកីឡា ៣ ទល់ ៧ នាក់

2021-05-06 03:03:08
បាល់ទះ

2021-05-06 03:03:08
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក សោម ភក្តី ហៅស្មាត់ ហ៊ុប ចាប់ផ្ដើមលេងបាល់ទះល្អក្នុងឆ្នាំ ២០១០ នៅអាយុ២២ឆ្នាំ ហើយលេងឡើងខ្លាំងបំផុតនៅអំឡុងឆ្នាំ ២០១៣ និង ២០១៤។

លោក សោម ភក្ដី ហៅស្មាត់ហ៊ុប

ការប្រកួតក្រៅផ្លូវការ និងមិនអាចបំភ្លេចបាន

អំឡុងឆ្នាំ២០១២-២០១៣ស្មាត់ហ៊ុប លោកគ្រូ សោម ចំណាប់ និង កែម រតនា ហៅកូនឳ ធ្លាប់តឱ្យក្រុមបុរីកីឡា ៣ ទល់នឹង ៧ នាក់ឯណោះនៅតារាងបាល់ទះវត្តភ្នំ។

អតីតកីឡាករមានដើមកំណើតនៅខណ្ឌឫស្សីកែវ បានប្រាប់មកកាន់ Sabay ដូច្នេះថា ៖«កាលខ្ញុំចាប់ដៃគូលេង ខ្ញុំបីនាក់សោមចំណាប់ ខ្ញុំ និងរតនាហ្នឹង ខ្ញុំតឱ្យបុរីកីឡាបីដប់…នៅតារាងវត្តភ្នំ…បីដប់ហ្នឹងខ្ញុំចាញ់គេមួយសិត ហើយដកបីចេញសល់៧ខ្ញុំឈ្នះវិញ…»។

មិនតែប៉ុណ្ណោះបើក្រឡេកមើលឆ្នាំ២០១៥ លោកនិងទូចអង្គរក្ស ក៏ធ្លាប់តឱ្យអ្នកខេត្តសៀមរាបពីរប្រាំ និងឈ្នះពួកគេក្នុងលទ្ធផលពិន្ទុ ១៥ ទល់នឹង ៧។ ក្រោយឈ្នះការប្រកួតនេះ ស្មាត់វ័យ៣០ឆ្នាំត្រូវគេណាត់ឱ្យពីរប្រាំ តទល់ជាមួយក្រុមស្មាត់ឆាមកពីខេត្តបន្ទាយមានជ័យបន្តទៀត។ ចុងក្រោយស្មាត់ហ៊ុបនៅតែទទួលបានជ័យជម្នះដដែល។ ជំនួបពីរប្រាំនេះហើយជាការប្រកួតដ៏ជក់ចិត្ត ដែលធ្វើឱ្យស្មាត់រូបនេះចាំមិនភ្លេច។

បើគិតដល់ចំណុចពិសេសវិញ បុរសកម្ពស់១,៨៦ម៉ែត្ររូបនេះ មានជំនាញល្អក្នុងការម៉ាត់ ធ្វើរនាំង ចាប់សេវារឹង និងវាយសេវា។ ជារួមល្អមួយចប់តែម្ដង។ ចំពោះការម៉ាត់ផ្ដាច់ ហ៊ុបមានបច្ចេកទេសវ៉ៃខុសគេ ពោលគឺវ៉ៃលិច៨ម៉ែត្រចុងលីង មិនពន្លិចនៅខាងមុខឡើយ។

ដៃគូដ៏សង់តង់របស់លោកគ្រូចំណាប់ កូនឪ និងចាន់ សារ៉ន បានពន្យល់ទៀតថា ៖«បាល់ខ្ញុំលេងដាច់ស្មាត់ល្អហ្នឹង គឺខ្ញុំវ៉ៃលិចតែ៨ៗម៉ែត្រទេ លីងក្រោយវាមាន៩ម៉ែត្រ តែខ្ញុំវ៉ៃហ្នឹងខ្ញុំយកតែលីង៨ៗម៉ែត្រទេបង ខ្ញុំខុសគេបង ខ្ញុំប្រើតែកដៃ ហើយភ្នែកខ្ញុំវ៉ៃខ្ញុំមើលឃើញ (ដីឬប្រឡោះស៊ី)»។

បើតាមអ្នកតាមដានបាល់ទះមួយរូបបានឱ្យដឹងថា ស្មាត់ហ៊ុបលេងល្អទាំងបាល់ប្រកួតផ្លូវការ និងមិនអាជីព ហើយថែមទាំងជួយក្រុមលើកពានផ្លូវការខ្លះដែរដូចជាពានរង្វាន់ខួបកងទ័ព ពានរង្វាន់ទូទាំងប្រទេស និងពានរង្វាន់ស្រាបៀរលីអូ។

ក្លឹបនិងស្នាដៃ

ចូលមកដល់បាល់ទះអាជីព ស្មាត់ហុបដែលល្បីខ្លាំងកាលពី១០ឆ្នាំមុន ធ្លាប់លេងឱ្យក្លឹបក្រសួងការពារជាតិ ក្លឹបឆ័ត្រយោង៩១១ ក្លឹបក្រសួងមហាផ្ទៃ និងក្លឹបស្នងការនគរបាលខេត្តបាត់ដំបង។

លោកជួយឱ្យក្លឹបឆ័ត្រយោង៩១១ បានចំណាតថ្នាក់លេខ២ នៃពានរង្វាន់ខួបកងទ័ព (មិនចាំឆ្នាំ) ជួយក្រសួងមហាផ្ទៃបានលេខ១ នៃពានរង្វាន់ទូទាំងប្រទេស (មិនចាំឆ្នាំ) និងជួយស្នងការខេត្តបាត់ដំបងទទួលបានចំណាត់ថ្នាក់លេខ១ ពានរង្វាន់ស្រាបៀរលីអូក្នុងឆ្នាំ២០១៤ នៅពហុកីឡដ្ឋានជាតិ។

ប្រវត្តិជាប់ជម្រើសជាតិ

មានសមត្ថភាពក្នុងឆ្នាំ២០១១ លោក សោម ភក្ដី បានជាប់ជម្រើសជាតិបាល់ទះឆ្នេរខ្សាច់ និងជម្រើសជាតិបាល់ទះក្នុងសាល ចេញទៅលេងស៊ីហ្គេមនៅប្រទេសឥណ្ឌូណេស៊ី ក្រោមការគ្រប់គ្រងរបស់អាណាព្យាបាលសហព័ន្ធបាល់ទះកម្ពុជា។

ស្មាត់ហ៊ុបបានបញ្ចប់អាជីពបាល់ទះរបស់ខ្លួននៅត្រឹមឆ្នាំ ២០១៧ ហើយបើតាមការសាកសួរ ព្រោះលោកអស់និស្ស័យ។ បច្ចុប្បន្នសមត្ថភាពរបស់លោកនៅសល់ត្រឹមតែ២០%ប៉ុណ្ណោះបើធៀបនឹងពីមុន៕