- 2020-11-27 08:55:56
- បាល់ទះ
ដឺមីអង្គរក្ស ៣១១ លន ចាន់នឿន ចង់រៀនតាម ផុល រតនៈ របស់វិសាខា
- 2020-11-27 08:55:56
- ចំនួនមតិ 0 | ចំនួនចែករំលែក 0
ដឺមីអង្គរក្ស ៣១១ លន ចាន់នឿន ចង់រៀនតាម ផុល រតនៈ របស់វិសាខា
ចន្លោះមិនឃើញ
កីឡាករបាល់ទះបញ្ជាការដ្ឋានអង្គរក្ស កងអន្តរាគមន៍ទី៣ការពារ៣១១ លន ចាន់នឿន បានទម្លាយឱ្យដឹងថា គេចង់រៀនសូត្រតាមកីឡាករ ផុល រតនៈ ដ្បិតដឺមីវ័យក្មេងរបស់ក្លឹបបាល់ទះវិសាខារូបនេះ មានទេពកោសល្យ សមត្ថភាពខ្ពស់ និងបច្ចេកទេសលេងល្អ។
លន ចាន់នឿន បានពន្យល់ថា ៖«អត់ដែលស្គាល់គាត់ផង និយាយទៅមានចំណាប់អារម្មណ៍លើគាត់ គឺគាត់ដេញរ៉ាពីតល្អ ហើយណាមួយមុខងារ (ខ្ញុំ) រ៉ាពីតចឹង ចង់រៀនតាមគាត់។ ដោយសារគាត់ក្មេង ហើយគាត់លេចធ្លោរ បាល់រ៉ាពីតរបស់គាត់ល្អមែនទែន គឺគាត់វៃលឿន...ហើយបាល់រ៉ាពីតស្រុកខ្មែរ គ្មានអ្នកណាដេញលើគាត់ទេ ព្រោះខ្ញុំក៏ដេញបាល់រ៉ាពីតដែរ»។
បើគិតពីអាយុកីឡាករមកពីខេត្តតាកែវ កម្ពស់១,៨៥ម៉ែត្រ មានវ័យ២៤ឆ្នាំ អាយុបង ផុល រតនៈ រហូតដល់ទៅបីឆ្នាំឯណោះ ប៉ុន្តែទោះជារៀមច្បង គេនៅតែចង់រៀនសូត្រតាមសិស្សប្អូន។
កីឡាករចូលហ្វឹកហាត់នៅកងអន្តរាគមន៍ទី៣ការពារ៣១១ តាំងពីឆ្នាំ២០១៨ បានលើកឡើងទៀតថា ការប្រកួតមិត្តភាពរវាងក្លឹបបាល់ទះវិសាខា និងកងអន្តរាគមន៍ទី៣ការពារ៣១១ កាលពីពេលថ្មីៗនេះ គឺ រតនៈ បានបង្ហាញសមត្ថភាពគួរឱ្យភ្ញាក់ផ្អើល។ រតនៈមិនត្រឹមតែវៃបាល់ដឺមីល្អប៉ុណ្ណោះទេ ថែមទាំងអាចធ្វើរនាំងល្អផងដែរ។
ទោះចាញ់វិសាខាបីសិតទល់សូន្យ ក្នុងលទ្ធផលពិន្ទុ ២៥-១៨, ២៥-១៩ និង ២៥-១១ ក្ដី ចាន់នឿន យល់ឃើញថាក្រុមរបស់ខ្លួនក៏ធ្វើបានល្អ ហើយអ្វីដែលខ្វះខាតគឺការចាប់សេវ៉ា និងការធ្វើរនាំង ខណៈក្រុមក៏ទទួលបានបទពិសោធន៍ ថ្មីៗច្រើនគួរសមពីការប្រកួតមួយនេះ។
គួរបញ្ជាក់ថាកីឡាករមកពីខេត្តព្រៃវែង ផុល រតនៈ ដែលចាន់នឿនកំពុងសរសើរនេះ បានចូលហាត់បាល់ទះនៅក្លឹបវិសាខាដំបូងនៅឆ្នាំ២០១៧។ គេជាស្មាត់ដេញកណ្ដាល (ដឺមី,រ៉ាពីត) ល្អបំផុតរបស់វិសាខា ដែលទទួលបានការសរសើរពីលោក សាន សុក្រិត្យ ជាគ្រូបង្វឹក។ រតនៈ ធ្លាប់ជាប់ជម្រើសជាតិបាល់ទះលើក្ដារចេញទៅលេងស៊ីហ្កេមនៅហ្វីលីពីនម្ដងអំឡុងឆ្នាំ២០១៩៕