អាជ្ញាកណ្ដាលកម្ពុជា លោក ទុយ វិច្ឆិកា នឹងបង្ហាញមុខក្នុងជំនួបជម្រុះ World Cup រវាងកូរ៉េខាងត្បូងប៉ះឡាវ

2015-09-02 17:30:20
ព័ត៌មាន

2015-09-02 17:30:20
ចំនួនមតិ 0 | ចំនួនចែករំលែក 0

ចន្លោះមិនឃើញ

អាជ្ញាកណ្ដាលកម្រិតអន្តរជាតិ (FIFA) របស់កម្ពុជាមួយរូបគឺលោក ទុយ វិច្ឆិកា នឹងបង្ហាញមុខក្នុងការប្រកួតជម្រុះពូល G នៃពានរង្វាន់បាល់ទាត់ពិភពលោក 2018 FIFA World Cup Russia ប្រចាំទ្វីបអាស៊ីរវាងក្រុមម្ចាស់ផ្ទះកូរ៉េខាងត្បូង និង ក្រុមភ្ញៀវឡាវ នៅថ្ងៃព្រហស្បតិ៍ ទី ៣ ខែ កញ្ញា ឆ្នាំ ២០១៥ ស្អែកនេះ។

លោក ទុយ វិច្ឆិកា (ទី៣ រាប់ពីឆ្វេង) ក្នុងជំនួបរវាង Buriram United FC (ថៃ) ជាមួយ Gamba Osaka (ជប៉ុន) ក្នុងពាន AFC Champion League 2015 កន្លងទៅ

យោងតាមវិបសាយផ្លូវការរបស់ FIFA អាជ្ញាកណ្ដាលលើទីលានក្នុងការប្រកួតនេះគឺលោក Jumpei IIDA មកពីប្រទេសជប៉ុន ហើយជំនួយការអាជ្ញាកណ្ដាលគឺលោក Shinji OCHI និងលោក Hiroshi YAMAUCHI មកពីប្រទេសជប៉ុនដូចគ្នា ស្របពេលលោក ទុយ វិច្ឆិកា ជាមន្រ្តីទី៤ ប្រចាំការប្រកួត។

ក្រុមយក្សប្រចាំតំបន់អាស៊ី កូរ៉េខាងត្បូង ត្រូវប្រកួតសន្សំពិន្ទុក្នុងជុំទី២ ប្រចាំទ្វីបជាមួយក្រុមឡាវ នៅវេលាម៉ោង ២០:០០ (ម៉ោង១៨:០០ នៅកម្ពុជា) នៅកីឡដ្ឋានHwaseong Stadium ក្នុងទីក្រុង Hwaseong ដែលអាចផ្ទុកទស្សនិកជនជិត ៤ ម៉ឺននាក់។

លោក ទុយ វិច្ឆិកា ជាអាជ្ញាកណ្ដាលជនជាតិខ្មែរតែម្នាក់ដែលបង្ហាញមុខក្នុងវគ្គជម្រុះពានរង្វាន់បាល់ទាត់ពិភពលោក 2018 FIFA World Cup Russia ក្នុងវគ្គនេះ ហើយលោកបានធ្វើដំណើរទៅប្រទេសកូរ៉េខាងត្បូង តាំងពីថ្ងៃទី ៣១ ខែ សីហា មកម៉្លេះ ដើម្បីត្រៀមខ្លួនបង្ហាញមុខក្នុងការប្រកួតបាល់ទាត់ជម្រុះពានរង្វាន់ពិភពលោកមួយនេះ ជាមួយនឹងអាជ្ញាកណ្ដាលដែលជាដៃគូ ៣ នាក់ផ្សេងទៀតមកពីជប៉ុន។

បុរសវ័យ ៣៥ ឆ្នាំរូបនេះបានជាប់ឈ្មោះក្នុងបញ្ជីអាជ្ញាកណ្ដាលអន្តរជាតិ FIFA ប្រចាំនៅប្រទេសកម្ពុជា តាំងពីឆ្នាំ ២០១១ មកម៉្លេះ ហើយលោកតែងតែបង្ហាញមុខក្នុងព្រឹត្តិការណ៍អន្តរជាតិទាំងប្រចាំតំបន់អាស៊ាន និង ទ្វីបអាស៊ីជាដើម៕

អត្ថបទ៖ ម៉ឺន រស្មី រូបថត៖Buriram United FC