Mbappe ប្រកាសចាកចេញពី PSG ក្រោយរួមរស់អស់ ៧ឆ្នាំ

2024-05-13 12:20:08
ព័ត៌មាន

2024-05-13 12:20:08
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែប្រយុទ្ធសញ្ជាតិបារាំងកីឡាករ Kylian Mbappe ប្រកាសចាកចេញពីក្លឹបយក្សបារាំង Paris Saint-Germain ក្រោយពីរួមរស់ជាមួយក្លឹបនេះអស់រយៈពេល ៧ឆ្នាំ។ នេះបើតាមវីដេអូសារសំឡេងរបស់សាមីខ្លួនផ្ទាល់បង្ហោះនៅបណ្ដាញសង្គមរបស់ខ្លួន កាលពីថ្ងៃសៅរ៍កន្លងទៅ។

កីឡាកររូបនេះបានចូលមកលេងនៅ PSG ដំបូងក្នុងលក្ខខណ្ឌជាកីឡាករខ្ចីជើងពីក្លឹប Monaco កាលពីឆ្នាំ២០១៧ លុះក្រោយមក ខាង PSG បានទិញដាច់ក្នុងតម្លៃ ១៩៤លានដុល្លារអាមេរិក។

នៅក្នុងវីដេអូដែលខ្លួនបង្ហោះផ្ទាល់ Mbappe បាននិយាយថា៖ «នេះជាឆ្នាំចុងក្រោយរបស់ខ្ញុំជាមួយ Paris Saint-Germain។ ខ្ញុំនឹងមិនបន្តកុងត្រាទេ ហើយដំណើររួមគ្នានេះនឹងបញ្ចប់នៅប៉ុន្មានសប្ដាហ៍ខាងមុខនេះ»។

ខ្សែប្រយុទ្ធកើតឆ្នាំ១៩៩៨រូបនេះបានលេងប្រកួតចុងក្រោយរបស់ខ្លួននៅកីឡដ្ឋាន Parc de Prince ដោយរកបានមួយគ្រាប់ឱ្យ PSG ក្នុងប្រកួតចុងក្រោយក្នុងលីគបារាំង ប៉ុន្តែជាអកុសល PSG បានចាញ់ក្លឹប Toulous ក្នុងលទ្ធផល ៣ ទល់នឹង ១។

អ្នកគាំទ្រមួយចំនួនបានចំអកដាក់ Mbappe នៅកីឡដ្ឋានតែម្ដង ចំណែកឯក្លឹបវិញនៅស្ងាត់ឈឹង ដោយមិនបានសរសេរសារអ្វីណាមួយអរគុណ និងជូនពរ Mbappe ឡើយ។

សូមជម្រាបផងដែរថា Mbappe នឹងចប់កុងត្រាជាមួយ PSG នៅថ្ងៃទី៣០ ខែមិថុនា ខាងមុខនេះ។ មានសារព័ត៌មានជាច្រើនបានឱ្យដឹងថា កីឡាកររូបនេះអាចនឹងផ្លាស់ទៅលេងនៅក្លឹបអេស្ប៉ាញ Real Madrid៕