Mbappe សុខចិត្តកាត់ប្រាក់ឈ្នួលដើម្បីចូលរួមជាមួយ Real Madrid

2024-05-15 12:49:48
បាល់ទាត់

2024-05-15 12:49:48
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែប្រយុទ្ធ Kylian Mbappe ត្រូវបានរាយការណ៍ថាសុខចិត្តកាត់ប្រាក់ឈ្នួលដើម្បីចូលរួមជាមួយ Real Madrid។

Mbappe បានប្រកាសជាសាធារណៈក្នុងសប្ដាហ៍នេះ ថានឹងមិនតកុងត្រាទៀតទេជាមួយក្លឹបយក្សបារាំង Paris Saint Germain។ ដោយកុងត្រាបច្ចុប្បន្នរបស់កីឡាករនៅជាមួយក្លឹបនឹងអស់សុពលភាពនៅខែមិថុនា ឆ្នាំ ២០២៤ នេះមានន័យថា កីឡាករនឹងចាកចេញពីក្លឹបនៅពេលចប់រដូវកាល ២០២៣/២០២៤។

បន្ទាប់ពី Mbappe ប្រកាសបែបនេះ មានការចុះផ្សាយសេចក្ដីរាយការណ៍ជាច្រើនអំពីក្លឹបថ្មីរបស់ខ្សែប្រយុទ្ធបារាំងវ័យ ២៥ ឆ្នាំរូបនេះ។ ខ្លះអះអាងថា កីឡាករនឹងមកលេងនៅក្លឹបយក្សៗនៅលីគកំពូលអង់គ្លេស។

ទោះជាយ៉ាងណា របាយការណ៍ដែលមានសភាពច្បាស់លាស់ជាងគេ គឺបានលើកឡើងថា Mbappe នឹងទៅលេងនៅក្លឹប Real Madrid ដោយការចរចាទូទៅ និងការឯកភាពគ្នារវាងភាគីកីឡាករ និងក្លឹបយក្សអេស្ប៉ាញ ត្រូវបានរាយការណ៍ថា បានចប់សព្វគ្រប់ទៅហើយតាំងពីខែកុម្ភៈ ឆ្នាំនេះមកម៉្លេះ។ សូម្បីតែប្រធានលីគកំពូលអេស្ប៉ាញ La Liga លោក Javier Tebas ក៏បានបញ្ជាក់ថាបានទទួលព័ត៌មានប្រហាក់ប្រហែលនេះផងដែរ។ ប្រសិនជាមិនមានអ្វីប្រែប្រួលធំដុំនោះទេ កីឡាករ Mbappe នឹងមកលេងឲ្យ Real Madrid នៅរដូវកាលថ្មី។

យោងតាមព័ត៌មានដែល BBC ទទួលបានឲ្យដឹងថា កុងត្រារបស់ Mbappe ជាមួយ Real Madrid គឺមានរយៈពេល ៥ ឆ្នាំ ក្នុងនោះមួយឆ្នាំកីឡាករទទួលបានប្រាក់ឈ្នួលប្រមាណ ១៦ លានដុល្លារសហរដ្ឋអាមេរិកក្នុងមួយឆ្នាំ។ កីឡាករក៏ទទួលបានផងដែរ ប្រាក់លើកទឹកចិត្តដល់ទៅប្រមាណ ១៦០ លានដុល្លារសហរដ្ឋអាមេរិកពីក្លឹប។ កីឡាករទទួលសិទ្ធិក្នុងការប្រើប្រាស់រូបថតរបស់ខ្លួន ដល់ទៅ ៨០ ភាគរយ ហើយសិទ្ធិនេះនឹងរកចំណូលជាច្រើនបន្ថែមទៀតសម្រាប់កីឡាករផ្ទាល់។

បើនិយាយពីប្រាក់ឈ្នួល បើប្រៀបធៀបជាមួយកុងត្រាចុងក្រោយរបស់ Mbappe នៅពេលលេងឲ្យ PSG គឺមានសភាពតិចឆ្ងាយណាស់។ ពេលនៅជាមួយ PSG កីឡាករ Mbappe មានប្រាក់ឈ្នួលប្រចាំឆ្នាំដល់ទៅជិត ៨០ លានដុល្លារសហរដ្ឋអាមេរិកឯណោះ។ នេះមានន័យថា កីឡាករសុខចិត្តកាត់ប្រាក់ឈ្នួល ដើម្បីមកចូលរួមជាមួយ Real Madrid។

គិតមកទល់ពេលនេះ Mbappe មិនទាន់និយាយយ៉ាងណាទេអំពីការផ្ទេរមួយនេះ។ ក៏ប៉ុន្តែ បើយោងតាមការវិភាគមួយចំនួន បានឲ្យដឹងថា មូលហេតុដែល Mbappe ចង់មកចូលរួមជាមួយ Real Madrid បែបនេះ ក៏ដោយសារកីឡាករបានឈ្នះពានធំៗគ្រប់បែបយ៉ាងទៅហើយនៅ PSG លើកលែងតែពាន Champions League ក្រោយរួមរស់ជាមួយគ្នាជាង ៧ ឆ្នាំ។ ដូច្នេះការមកចូលរួមជាមួយ Real Madrid គឺជាឱកាសដ៏ប្រសើរមួយ សម្រាប់កីឡាករក្នុងការមានលទ្ធភាពខ្ពស់ក្នុងការឈ្នះពានកំពូលអឺរ៉ុបមួយនេះ។ ណាមួយ ក្លឹប Real Madrid គឺជាក្លឹបដែល Mbappe ស្រលាញ់គាំទ្រតាំងពីតូចមក ដូច្នេះកត្តាផ្ទាល់ខ្លួននេះ អាចជាកត្តាជំរុញយ៉ាងសំខាន់មួយក្នុងការទាញចិត្តកីឡាករបារាំងរូបនេះមកចូលរួមជាមួយ Real Madrid៕