ក្រុមជម្រើសជាតិឈុតធំអាចបំបាក់ ក្រុម African All Star បានអត់ល្ងាចនេះ?

2015-05-28 17:42:12
បាល់ទាត់

2015-05-28 17:42:12
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមបាល់ទាត់ជម្រើសជាតិឈុតធំកម្ពុជានឹងត្រូវជួបប្រកួតមិត្តភាពជាមួយក្រុមកីឡាករអាហ្វ្រិកកំពុងប្រកបអាជីពនៅកម្ពុជាវេលាម៉ោង៦:០០ ល្ងាចនេះហើយ នៅពហុកីឡដ្ឋានជាតិអូឡាំពិកកម្ពុជា។

ពីរប្រកួតចុងក្រោយរបស់ក្រុមជម្រើសជាតិឈុតធំកម្ពុជាធ្វើបានយ៉ាងល្អដោយកាលពី ៤ សប្ដាហ៍មុនបានឈ្នះក្រុម Cambodian Tiger FC ដោយលទ្ធផល២-១ នៅទីលានវេស្ទើន និងកាលពីថ្ងៃអាទិត្យ ទី១៧ កន្លងទៅនេះបានប្រកួតឈ្នះក្រុមកីឡាករជប៉ុនដែលប្រកបអាជីពនៅ កម្ពុជាដោយលទ្ធផល៤-១ទៀត។ ចំពោះក្រុមកីឡាករអាហ្វ្រិកប្រកបអាជីពនៅកម្ពុជាវិញក៏មិនធម្មតាដែរកាលពីដើមខែនេះ បានបំបាក់ក្រុមឈុត U-23 កម្ពុជាដែលត្រៀមទៅស៊ីហ្គេមយ៉ាងចាស់ដៃដោយលទ្ធផល៤-០មុនពេលលត់ក្រុមស្វាយរៀងដោយលទ្ធផល ២-០ កាលពីថ្ងៃទី ១៨ ខែ ឧសភា ឆ្នាំ ២០១៥ នៅកីឡដ្ឋានជាតិអូឡាំពិក។

ក្រុមកីឡាករអាហ្វ្រិកដែលប្រកបអាជីពតាមបណ្តាក្លិបនានានៅប្រទេសកម្ពុជាសំបូរដោយកីឡាករល្អ និងមានល្បឿនលឿន ដូច្នេះប្រសិនបើក្រុមកម្ពុជាអាចយកឈ្នះបាននោះពិតជាសំខាន់ណាស់ម្រាប់ការត្រៀមខ្លួនប្រកួតមិត្តភាពអន្តរជាតិជាមួយប្រទេសឡាវនៅថ្ងៃទី២ ខែមិថុនា មុនពេលធ្វើដំណើរទៅប្រកួតមិត្តភាពមួយទៀតនៅប្រទេសថៃដើម្បីបង្កើនទំនុកចិត្តពេលប្រកួតជម្រុះ World Cup នាពេលខាងមុខនេះ។

តើក្រុមកម្ពុជាអាចបំបាក់ក្រុមកីឡាករអាហ្វ្រិកដែលប្រកបអាជីពនៅកម្ពុជាបានអត់ វេលាម៉ោង៦:០០ នៅពហុកីឡដ្ឋានជាតិអូឡាំពិក?

អត្ថបទ៖ ស្រី សុវណ្ណដារ៉ា