- 2015-05-18 17:52:50
- ព័ត៌មាន
ហេតុផល៣យ៉ាងដែលអ្នកគាំទ្ររាប់ពាន់នាក់ សម្រុកទៅមើលបាល់ទាត់យប់មិញ
- 2015-05-18 17:52:50
- ចំនួនមតិ 0 | ចំនួនចែករំលែក 0
ហេតុផល៣យ៉ាងដែលអ្នកគាំទ្ររាប់ពាន់នាក់ សម្រុកទៅមើលបាល់ទាត់យប់មិញ
ចន្លោះមិនឃើញ
វាជារឿងដ៏គួរភ្ញាក់ផ្អើលមួយដែលអ្នកគាំទ្ររាប់ពាន់នាក់បានទៅមើលការប្រកួតបាល់ទាត់មិត្តភាពរវាងក្រុមបាល់ទាត់ជម្រើសជាតិកម្ពុជាឈុតធំ និងក្រុមកីឡាករជប៉ុនដែលប្រកបអាជីពបាល់ទាត់នៅប្រទេសកម្ពុជាកាលពីយប់មិញនៅពហុកីឡដ្ឋានជាតិអូឡាំពិក។
អ្នកគាំទ្រកាលពីយប់មិញ
ជាលទ្ធផលក្រុមកម្ពុជាបានលត់ក្រុមកីឡាករជប៉ុនដោយលទ្ធផល៤-១។ ទោះជាមុនការប្រកួតមិនសូវមានការផ្សព្វផ្សាយទូលំទូលាយយ៉ាងណាក៏ដោយ ក៏ប៉ុន្តែអ្នកស្នេហាវិស័យបាល់ទាត់កម្ពុជាបានទៅទស្សនាផ្ទាល់ច្រើនហួសពីការរំពឹងទុក។ ហេតុផល៣យ៉ាងខាងក្រោមអាចជាកត្តាធ្វើឲ្យអ្នកស្រលាញ់បាល់ទាត់បានទៅមើលច្រើនយ៉ាងនេះបែប។
១- ទីលានបាល់ទាត់ទើបជួសជុលថ្មី ទីលានបាល់ទាត់ក្នុងពហុកីឡដ្ឋានជាតិអូឡាំពិកទើបត្រូវបានបញ្ចប់ការជួសជុលកាលពីថ្ងៃទី១៥ ខែឧសភា ឆ្នាំ២០១៥ដោយគម្រោងរបស់សហព័ន្ធបាល់ទាត់ពិភពលោក (FIFA)។ ក្រៅពីជួសជុលទីលានប្រកួត ក្រសួងអប់រំ យុវជន និងកីឡាក៏បានជួសជុលហេដ្ឋារចនាសម្ព័ន្ធផ្សេងៗទៀតក្នុងពហុកីឡដ្ឋានដូចជាដាក់កៅអីជ័រសម្រាប់អង្គុយ ដាក់អំពូលភ្លើងថ្មី និងជួសជុលបន្ទប់ទឹកជាដើម។ ករជួសជុលថ្មីនេះមើលទៅស្រស់ស្អាតគួរឲ្យចាប់អារម្មណ៍ និងចង់ឃើញផ្ទាល់ភ្នែករបស់អ្នកស្នេហា កីឡាជាតិ។ បន្ទាប់ពីការជួសជុលរួចរាល់ទើបតែបាន២ថ្ងៃប៉ុណ្ណោះ ការប្រកួតមួយក៏បានចាប់ផ្តើមឡើងដើម្បីជាការសាកល្បងទីលានថ្មី។
២- លីកបាល់ទាត់ខកខានយូរ សកម្មភាពប្រកួតបាល់ទាត់ផ្លូវការមួយចំនួននៅពហុកីឡដ្ឋានជាតិអូឡាំពិកបានខកខានជាច្រើនខែមកហើយ បន្ទាប់ពីទីលានត្រូវបានជួសជុលកាលទី១៥ ខែវិច្ឆិកា ឆ្នាំ២០១៤កន្លងទៅ។ ព្រឹត្តិការណ៍បាល់ទាត់ធំពីរនៅកម្ពុជាគឺលីកបាល់ទាត់កំពូលកម្ពុជាត្រូវបានពន្យារមួយលើកជាពីរលើករហូតទៅដល់ខែកក្កដាខាងមុខទើបចាប់ផ្តើមរហូតកាលថ្មី២០១៥ ខណៈពាន Hun Sen Cup ឆ្នាំ២០១៥រៀបចំការប្រកួតនៅខេត្តស្វាយរៀង។ ចំណែកការប្រកួតជម្រុះបាល់ទាត់ពិភពលោកឆ្នាំ២០១៨ដែលកម្ពុជាទទួលម៉ាកាវរៀបចំនៅស្តាតចាស់។ ការគ្មានសកម្មភាពបាល់ទាត់នៅពហុកីឡដ្ឋានជាតិអូឡាំពិកជាច្រើនខែអាចបណ្តាលឲ្យអ្នកនិយមចូលចិត្តទស្សនាបាល់ទាត់ចង់ឃើញមានការប្រកួតនៅទីលានកណ្តាលក្រុងភ្នំពេញនេះ។
៣-ក្រុមបាល់ទាត់ឈុតធំត្រៀមជម្រុះបាល់ទាត់ពិភពលោក សកម្មភាពមួយគួរឲ្យកោតសរសើរចំពោះអ្នកគាំទ្របាល់ទាត់ខ្មែរគឺនៅពេលក្រុមបាល់ទាត់កម្ពុជាធ្វើម្ចាស់ផ្ទះទទួលភ្ញៀវម៉ាកាវសម្រាប់ការប្រកួតជម្រុះបាល់ទាត់ពិភពលោកឆ្នាំ២០១៨នៅស្តាតចាស់កាលពីប៉ុន្មានខែមុន។ នៅពេលនោះអ្នកគាំទ្រកម្ពុជាយ៉ាងច្រើនកុះករបានទៅទស្សនាដើម្បីលើកកម្លាំងចិត្តដល់ក្រុមបាល់ទាត់របស់ខ្លួនពេញស្តាតចាស់។ បន្ទាប់ពីដឹងថា ក្រុមបាល់ទាត់កម្ពុជាឈុតធំមានឱកាសឡើងទៅវគ្គជម្រុះបាល់ទាត់ពិភពលោកជុំទីពីរទៀត អ្នកគាំទ្រខ្មែរកាន់តែយកចិត្តទុកដាក់ និងចំណាយពេលកាន់តែច្រើនដើម្បីគាំទ្រ និងកម្លាំងចិត្តដល់ក្រុមបាល់ទាត់ជាតិ ខណៈពួកគេកំពុងត្រៀមខ្លួនទទួលភ្ញៀវពីរប្រទេសនៅក្នុងខែមិថុនាខាងមុខគឺថ្ងៃទី១១ ខែមិថុនាជួបសិង្ហបុរី និងថ្ងៃទី១៦ មិថុនា ជួបអាហ្វហ្គានីស្ថាននៅពហុកីឡដ្ឋានជាតិអូឡាំពិក៕
អត្ថបទ៖ ជាន ចាន់រ៉ា
