- 2015-03-25 15:51:09
- បាល់ទាត់
វេស្ទើនសម្រេចប្រើ U-19 ស្វាយរៀងសម្រាប់លីកកម្ពុជារដូវកាលនេះ
- 2015-03-25 15:51:09
- ចំនួនមតិ 0 | ចំនួនចែករំលែក 0
វេស្ទើនសម្រេចប្រើ U-19 ស្វាយរៀងសម្រាប់លីកកម្ពុជារដូវកាលនេះ
ចន្លោះមិនឃើញ
ក្រុមបាល់ទាត់វេស្ទើនយូនីអេស្វស៊ីនឹងប្រើប្រាស់កីឡាករអាយុក្រោម១៩ឆ្នាំរបស់ក្លិបស្វាយរៀងសម្រាប់ចូលរួមប្រកួតក្នុងព្រឹត្តិការណ៍លីកបាល់ទាត់កំពូលកម្ពុជានារដូវកាលឆ្នាំ២០១៥នេះដោយសារពុំមានថវិកាគ្រប់គ្រាន់ដើម្បីសម្រាប់ប្រើប្រាស់កីឡាករផ្ទាល់ខ្លួន។
លោក ឡៃ សុធា អ្នកចាត់ការទូទៅរបស់ក្លិបវេស្ទើនបានប្រាប់ថា សម្រាប់លីកបាល់ទាត់កំពូលកម្ពុជារដូវកាលឆ្នាំ២០១៥នេះ វេស្ទើនមិនមានក្រុមកីឡាករផ្ទាល់ខ្លួនសម្រាប់ចូលរួមប្រកួតឡើយ ដូច្នេះក្លិបរបស់លោកនឹងប្រើកីឡាករឈុតក្រោម១៩ឆ្នាំរបស់ក្លិបស្វាយរៀងដើម្បីចូលរួមប្រកួតក្នុងលីករដូវកាលនេះ។
ក្រុម U-19 ស្វាយរៀងហាត់លើកីឡដ្ឋានវេស្ទើន (រូបថត វេស្ទើន)
លោកបានលើកឡើងថា ៖«វេស្ទើននឹងប្រើកីឡាករអាយុក្រោម១៩ឆ្នាំរបស់ស្វាយរៀងសម្រាប់លីកឆ្នាំនេះ ប៉ុន្តែប្រាក់ចំណូល ឬប្រាក់ខែរបស់កីឡាករទាំងនោះមិនមែនវេស្ទើនជាអ្នកចំណាយទេ គឺខាងស្វាយរៀងជាអ្នកចំណាយឲ្យកីឡាករ។ លើកលែងតែកីឡាករចាស់របស់វេស្ទើនពីរបីនាក់ដែលវេស្ទើននឹងផ្តល់ប្រាក់ឲ្យពួកគេ។ ក្លិបយើងមិនមានចំណូលសម្រាប់ជួលកីឡាករទេ អីចឹងយើងមានតែប្រើជម្រើសនេះសិន»។
លោកបានបញ្ជាក់ថា ពេលវេស្ទើនយកឈុត១៩ឆ្នាំរបស់ស្វាយរៀងមកប្រើប្រាស់គឺគ្មានអ្វីទាស់នឹងក្រុមឈុតធំរបស់ស្វាយរៀងឡើយ ពីព្រោះឈុត១៩ឆ្នាំ និងឈុតធំគឺដាច់ដោយឡែកពីគ្នា។ លោកបន្ថែមថា ទោះជាយ៉ាងណា វេស្ទើនមិនទាន់ពិភាក្សាគ្នាជាមួយសហព័ន្ធកីឡាបាល់ទាត់កម្ពុជានៅឡើយទេ។
រហូតដល់ពេលនេះ Sabay នៅមិនអាចទាក់ទងទៅសហព័ន្ធកីឡាបាល់ទាត់កម្ពុជាដើម្បីបំភ្លឺជុំវិញការប្រើប្រាស់យុវជនអាយុ១៩ឆ្នាំរបស់វេស្ទើនឡើយ។ កាលពីប៉ុន្មានថ្ងៃមុន វេស្ទើនបានបង្ហាញក្រុមកីឡាកររបស់ខ្លួនហ្វឹកហាត់នៅកីឡដ្ឋានថ្មីជាលើកដំបូង បន្ទាប់ពីកសាងហើយ ប៉ុន្តែនៅពេលនោះត្រូវបានគេមើលឃើញថា ក្រុមកីឡាករនោះជាឈុត១៩ឆ្នាំរបស់ស្វាយរៀង។
ឆ្នាំ២០១៥នេះ វិស័យកីឡាបាល់ទាត់នៅស្រុកខ្មែរមានការប្រែប្រួលគួរឲ្យចាប់អារម្មណ៍ទាំងផ្នែកវិជ្ជមាន និងអវិជ្ជមានពោលគឺក្លិបខ្លះកំពុងបង្កើនទាំងសមាជិកក្រុម គ្រូបង្វឹក និងកីឡដ្ឋានសម្រាប់រៀបចំការប្រកួតក្រៅដី និងក្នុងដី ខណៈក្រុមខ្លះក៏ស្ងប់ស្ងាត់រហូតដកខ្លួនចេញពីលីកកំពូលកម្ពុជាទៀតផង។ ទោះជាយ៉ាងណា ក្រុមបាល់ទាត់ជម្រើសជាតិកម្ពុជាបានបង្ហាញសញ្ញាវិជ្ជមានគួរឲ្យកត់សំគាល់៕
កីឡដ្ឋានវេស្ទើន (រូបថត វេស្ទើន)
អត្ថបទ៖ ជាន ចាន់រ៉ា