- 2015-01-13 23:22:02
- ព័ត៌មាន
ថោង ខុន ស្រណោះ ហែម ថុន មិនបានសម្រេចបំណងដល់ស៊ីហ្គេម ២០២៣
- 2015-01-13 23:22:02
- ចំនួនមតិ 0 | ចំនួនចែករំលែក 0
ថោង ខុន ស្រណោះ ហែម ថុន មិនបានសម្រេចបំណងដល់ស៊ីហ្គេម ២០២៣
ចន្លោះមិនឃើញ
ឯកឧត្តម ថោង ខុន ប្រធានគណៈកម្មាធិការជាតិអូឡាំពិកកម្ពុជា (NOCC) សោកស្ដាយអតីតកីឡាករហែលទឹកជើងចាស់ គឺ លោក ហែម ថុន ជាខ្លាំងដែលមិនបានសម្រេចបំណងបន្តជីវិតដល់ពេលប្រទេសកម្ពុជា ធ្វើជាម្ចាស់ផ្ទះក្នុងព្រឹត្តិការណ៍កីឡាស៊ីហ្គេម នៅឆ្នាំ ២០២៣ ខាងមុខ។
ឯកឧត្តម ថោង ខុន ចូលរួមក្នុងពិធីបុណ្យសពព្រឹកមិញនេះ
ថ្លែងនៅមុខអ្នកសារព័ត៌មានក្នុងឱកាសចូលរួមពិធីបុណ្យសពលោក ហែម ថុន ព្រឹកមិញនេះ ឯកឧត្តម ថោង ខុន បានបន្ថែមថា លោក ហែម ថុន ធ្លាប់ប្រាប់ឯកឧត្ដមថាលោកចង់ឃើញព្រឹត្តិការណ៍កីឡាស៊ីហ្គេម ដែលកម្ពុជាធ្វើជាម្ចាស់ផ្ទះនៅ ៨ ឆ្នាំខាងមុខ ព្រោះលោកធ្លាប់ចូលរួមកម្មវិធី 1st Asian GANEFO រួចហើយកាលពីឆ្នាំ ១៩៦៦។
ឯកឧត្តមប្រធាន NOCC បានចាត់ទុកលោក ហែម ថុន ជាព្រឹទ្ធាចារ្យក្នុងវិស័យកីឡាដ៏សំខាន់មួយព្រោះលោកធ្លាប់ផ្ដល់គំនិតយោបល់ ក្នុងការអភិវឌ្ឍន៍ និងកែទម្រង់វិស័យកីឡាជាតិ ជាពិសេសលោកគឺជាក្បាលម៉ាស៊ីនដ៏សំខាន់ក្នុងវិស័យកីឡាហែលទឹក។
រឿង ៣ សំខាន់ដែលលោក ហែម ថុន កំពុងតែធ្វើតែមិនទាន់បានសម្រេចនោះគឺ ទី១ លោកបានចំណាយពេលចងក្រងសៀវភៅឯកសារកីឡាជាតិពីសង្គមចាស់។ ចំណែកទី២ លោកបានសហការជាមួយ ឯកឧត្តម ស៊ុន ចាន់ថុល រដ្ឋមន្ត្រីក្រសួងពាណិជ្ជកម្ម កសាងអាងហែលទឹកខ្នាតអន្តរជាតិមួយនៅខេត្តកំពង់ចាម និង ទី៣ លោកដាក់គម្រោងចង់ឱ្យកីឡាហែលទឹកឈ្នះមេដាយថ្នាក់តំបន់អាស៊ាន។
សព្វថ្ងៃលោក ហែម ថុន ជាអគ្គលេខាធិការសហព័ន្ធខ្មែរកីឡាហែលទឹក និង ជាអគ្គលេខាធិការរងគណៈកម្មាធិការជាតិអូឡាំពិកកម្ពុជា។ បើតាមថ្នាក់ដឹកនាំកំពូលរបស់ស្ថាប័នកំពូលលើផ្នែកកីឡាជាតិ ខាងលើ សមាជិកប្រតិបត្តិរបស់ NOCC នឹងធ្វើការកោះប្រជុំដើម្បីស្វែងរកអ្នកធ្វើការជំនួសលោក ហែម ថុន ក្នុងនាមជាអគ្គលេខាធិការរង NOCC។ ចំណែកតំណែងរបស់នៅក្នុងសហព័ន្ធខ្មែរកីឡាហែលទឹក នោះទុកឱ្យសហព័ន្ធដោះស្រាយខ្លួនឯង។
ក្នុងពិធីបុណ្យសពលោក ហែម ថុន ព្រឹកនេះមានការចូលរួមពីឯកឧត្តម ថោង ខុន ប្រធាន NOCC , ឯកឧត្តម សៅ សុខា ប្រធានសហព័ន្ធកីឡាបាល់ទាត់កម្ពុជា, ឯកឧត្តម ហង់ ជួនណារ៉ុន រដ្ឋមន្រ្តីក្រសួងអប់រំយុវជននិងកីឡា, ឯកឧត្តម ស៊ុន ចាន់ថុល រដ្ឋមន្ត្រីក្រសួងពានិជ្ជកម្ម និង ជាប្រធានសហព័ន្ធខ្មែរកីឡាហែលទឹក ព្រមទាំងមន្រ្តីក្រោមឱវាទជាច្រើនរូបទៀត។
លោក ហែម គីរី កូនប្រុសបង្កើតបានប្រាប់ថាឪពុករបស់ខ្លួនបានលាចាកលោកនៅថ្ងៃទី ១២ មករា ម្សិលមិញដោយរោគាពាធ វេលាម៉ោង៦:៤៥នាទីល្ងាច ក្នុងអាយុ ៧៣ ឆ្នាំ។ ក្រុមគ្រួសារនឹងរៀបចំពិធីបុណ្យ ៧ ថ្ងៃនៅថ្ងៃទី ១៧ មករា ឆ្នាំ ២០១៥ នៅគេហដ្ឋាន អ៊ុក សាម៉ុច នៅផ្ទះលេខ ១៨៩ ផ្លូវលំ ភូមិត្រពាំងល្វា សង្កាត់កាកាប ខណ្ឌពោធិសែនជ័យ រាជធានីភ្នំពេញ៕
អត្ថបទ៖ ម៉ឺន រស្មី
