មហាសេដ្ឋីបច្ចេកវិទ្យា លោក Elon Musk បានបង្ហាញអំពីចំណាប់អារម្មណ៍ក្នុងការទិញយក ក្លឹបបាល់ទាត់ Liverpool ដែលកំពុងប្រកបអាជីពនៅលីកកំពូលអង់គ្លេស Premier League។ នេះបើយោងតាមកិច្ចសន្ទនា នៅក្នុងកម្មវិធីវិទ្យុមួយ ដែល លោក Errol Musk ត្រូវជាឪពុក លោក Elon Musk បានអះអាងថា កូនប្រុសរបស់លោក ចាប់អារម្មណ៍ ក្រុមហង្សក្រហម។

នៅពេលត្រូវបានសម្ភាសន៍ ក្នុងកម្មវិធី Times Radio ឪពុក Elon Musk លោក Errol Musk បាននិយាយថា “ជាការពិត Elon Musk ចាប់អារម្មណ៍ក្នុងការដេញថ្លៃទិញយកក្លឹប Liverpool។” លោក បន្តថា “ប្រាកដណាស់ថា បើមានឱកាស អ្នកណាក៏ចង់ទិញយកក្លឹប ហង្សក្រហម ដែរ មិនថាទេគេ ឫ ក៏រូបខ្ញុំនោះទេ”។

មួយវិញទៀត គ្រួសាររបស់លោក Elon Musk មានទំនាក់ទំនងជ្រាលជ្រៅ នៅទីក្រុង Liverpool ដោយសារតែលោកយាយ ខាងឪពុករបស់ លោក Musk បានកើតនៅទីក្រុងអង់គ្លេសមួយនេះ មុនពេលដែលបានផ្លាស់ប្តូរទៅរស់នៅ អាហ្វ្រិកខាងត្បូង។

ណាណាមិញ ការបង្ហាញអំពីចំណាប់អារម្មណ៍របស់ ម្ចាស់ក្រុមហ៊ុន Tesla រូបនេះ អាចនឹងធ្វើឱ្យ Fenway Sports Group ដែលជាម្ចាស់ភាគហ៊ុនរបស់ Liverpool តម្លើងថ្លៃ លក់ក្លឹបនេះ។

គួរឱ្យដឹងថា នេះមិនមែនជាលើកទី១ ទេ ដែល Elon Musk បង្ហាញអំពីគោលបំណង បោះលុយវិនិយោគលើវិស័យបាល់ទាត់។ ជាក់ស្តែង កាលពីឆ្នាំ ២០២២ កន្លងទៅ មហាសេដ្ឋីលុយវាល់លានរូបនេះ ក៏បានបង្ហាញអំពីចំណាប់អារម្មណ៍ ទិញយកក្លឹបបិសាចក្រហម Manchester United ផងដែរ៕