វេស្ទើនមិនមានកីឡាករបរទេសទៅប្រកួតកីឡាសាកលវិទ្យាល័យអាស៊ាន

2014-11-26 16:46:42
បាល់ទាត់

2014-11-26 16:46:42
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមបាល់ទាត់វេស្ទើនមិនមានកីឡាករបរទេសធ្វើដំណើរទៅជាមួយក្រុមដើម្បីចូលរួមប្រកួតព្រឹត្តិការណ៍សាកលវិទ្យាល័យអាស៊ានទេដោយសារក្រសួងអប់រំ យុវជន និងកីឡាជាអ្នកកំណត់។ នេះបើតាមការឲ្យដឹងពីលោក ឡាយ សុធា អ្នកចាត់ការក្លិបសាកលវិទ្យាល័យមួយនេះ។

លោក ឡាយ សុធា បានឲ្យដឹងថា ក្រសួងអប់រំបានកំណត់មិនឲ្យបញ្ចូលកីឡាករបរទេសក្នុងក្រុមសម្រាប់ការចេញទៅប្រកួតព្រឹត្តិការណ៍កីឡាសាកលវិទ្យាល័យអាស៊ានឡើយ។ ការកំណត់នេះគឺដើម្បីប្រើប្រាស់ និងពង្រឹងសមត្ថភាពកីឡាករក្នុងស្រុកពិតៗ។ ទោះជាយ៉ាងណាខាងក្រសួងមិនបានបញ្ជាក់ថាតើបណ្តាប្រទេសអាស៊ានផ្សេងទៀតមិនមានកីឡាករបរទេសឬយ៉ាងនោះទេ។

លោកបាននិយាយថា ៖«ខ្ញុំអត់ដឹងច្បាស់ដែរ មិនដឹងថាក្រុមសាកលវិទ្យាល័យពីប្រទេសផ្សេងៗនៅអាស៊ានអត់មានកីឡាករបរទេសឬយ៉ាងណានោះទេ ពីព្រោះខាងក្រសួងអត់មានបញ្ជាក់ប្រាប់ផងគឺគ្រាន់តែប្រាប់ថា មិនឲ្យបញ្ចូលកីឡាករបរទេសពេលទៅចូលរួមប្រកួតកីឡាសាកលវិទ្យាល័យអាស៊ាននៅឥណ្ឌូណេស៊ី»។

វេស្ទើន ប្រកួតមិត្តភាពនឹងណាហ្គាខប

និយាយពីការត្រៀមខ្លួនរបស់ក្រុមវេស្ទើនយូនីអែហ្វស៊ី នៅដើមរដូវកាលនេះវិញ ហាក់ធ្វើបានល្អប្រសើរច្រើន ហើយលទ្ធផលឈ្នះ និងស្មើ មិនដែលចាញ់កន្លងមកគឺជាទុនមួយដ៏សំខាន់ក្នុងការជម្រុញទឹកចិត្តដល់កីឡាករដើម្បីបោះជំហានទៅប្រជែងយកជើងឯកកីឡាបាល់ទាត់សាកលវិទ្យាល័យអាស៊ាននៅប្រទេសឥណ្ឌូណេស៊ីនាខែធ្នូខាងមុខនេះ។

ថ្នាក់ដឹកនាំក្លិបមួយនេះបានប្រាប់ថា លទ្ធផលប្រកួតមិត្តភាពមិនដែលចាញ់កន្លងមកជាសញ្ញាវិជ្ជមានមួយសម្រាប់ក្រុមទៅប្រជែងយុទ្ធនាការពានសាកលវិទ្យាល័យអាស៊ាន។

បន្ទាប់ពីត្រឡប់មកពីការប្រកួតពានរង្វាន់ខាងលើក្រុមសាកលវិទ្យាល័យមួយនេះនឹងត្រូវចូលរួមប្រកួតពានរង្វាន់សម្ដេចហ៊ុនសែននៅដើមខែមករា ឆ្នាំ២០១៥ ខាងមុខ ហើយក៏ឈានចូលដល់លីករដូវកាល២០១៥ផងដែរ។

លទ្ធផលប្រកួតមិត្តភាពបីប្រកួតកន្លងមក៖

វេស្ទើន ១-០ អគ្គស្នងការនគរបាលជាតិ (ប៉ូលិស)

វេស្ទើន ០-០ ណាហ្គាខប

វេស្ទើន ០-០ Albirex Niigata Phnom Penh

ដោយឡែក ថ្ងៃស្អែកនេះ វេស្ទើន នឹងត្រូវសាកជើងជាមួយក្រុមត្រាយអាស៊ី វេលាម៉ោង៤រសៀល នៅកីឡដ្ឋានស្តាតចាស់៕

អត្ថបទ៖ អៀង សូទ្រី

រូបថត៖ ក្លិបវេស្ទើនយូនីអែហ្វស៊ី