កីឡាករអាហ្សង់ទីនឆ្នើមម្នាក់ប្រកាសក្ដែងៗថា ខ្លួនអាចលេងត្រូវជើងជាមួយ Messi

2018-06-20 11:32:56
បាល់ទាត់

2018-06-20 11:32:56
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែប្រយុទ្ធ Paulo Dybala បាននិយាយថា ខ្លួនអាចលេងត្រូវជើងជាមួយ Lionel Messi។

ថ្លែងក្នុងសន្និសីទសារព័ត៌មានកាលពីថ្ងៃអង្គារ Dybala បាននិយាយថា ខ្សែប្រយុទ្ធ Messi គឺជាកីឡាករដែលមិនអាចជំនួសបាន ដូច្នេះហើយខ្លួនត្រូវតែរកវិធីដើម្បីសម្របទម្រង់លេងរបស់ខ្លួនទៅនឹងខ្សែប្រយុទ្ធ Barcelona។ Dybala គិតថា ខ្លួនអាចលេងត្រូវគ្នា ជាមួយ Messi។

កីឡាករ Juventus និយាយ៖ "Messi ជាកីឡាករដែលមិនអាចមានកីឡាករជំនួសបាន ទាំងនៅ Barcelona និងនៅក្រុមណាផ្សេងទៀតនៅលើពិភពលោក។ ដូច្នេះហើយ ខ្ញុំគិតថា ខ្ញុំអាចលេងត្រូវជើងជាមួយគេ"។

យ៉ាងនេះក្ដី Dybala មិនបានបកស្រាយបន្តទេថា ខ្លួនអាចលេងត្រូវទម្រង់ជាមួយ Messi ដោយរបៀបណានោះទេ។ កីឡាករបានបែរទៅអំពាវនាវឲ្យថ្នាក់ដឹកនាំក្រុមជម្រើសជាតិអាហ្សង់ទីនឲ្យរិះរកវិធីដើម្បីបើកផ្លូវឲ្យខ្លួនបានចូលលេងក្នុងក្រុម។

សូមបញ្ជាក់ផងដែរថា កាលពីពេលកន្លងទៅ គ្រូបង្វឹកជម្រើសជាតិអាហ្សង់ទីន លោក Jorge Sampaoli ធ្លាប់បានអះអាងថា ពេលវេលាសមស្របដែល Messi និង Dybala លេងជាមួយគ្នា "មិនទាន់មកដល់នៅឡើយទេ"។

Messi និង Dybala ត្រូវបានមជ្ឈដ្ឋានបាល់ទាត់ជាច្រើនមើលឃើញថា លេងក្នុងតួនាទីដូចគ្នា ដែលនេះអាចជាមូលហេតុមួយដែលនាំឲ្យលោក Sampaoli សម្រេចមិនទាន់ដាក់ឲ្យពួកគេទាំងពីរលេងជាមួយគ្នា។

Dybala បានត្រឹមអង្គុយលើបង់ កាលពីប្រកួតស្មើ ១ ទល់ ១ ជាមួយអ៊ីស្លង់កាលពីថ្ងៃសៅរ៍កន្លងទៅ។