Timo Werner មានមោទកភាព ពេលត្រូវគេភ្ជាប់ទៅក្លឹបខ្លាំង Liverpool

2020-02-20 04:37:40
បាល់ទាត់

2020-02-20 04:37:40
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែប្រយុទ្ធវ័យ២៣ឆ្នាំ Timo Werner កាន់តែធ្វើឱ្យក្លឹបធំៗចាប់អារម្មណ៍ ក្រោយរួបគេស៊ុតប៉េណាល់ទី១គ្រាប់ ជួយឱ្យ RB Leipzig ឈ្នះ Tottenham Hotspur ១-០ វគ្គ១៦ក្រុមចុងក្រោយជើងទី១ នៃពានរង្វាន់ Champions League។ ថ្មីៗនេះ Werner ត្រូវបានគេភ្ជាប់ទៅនឹងក្លឹប Liverpool និងមានសំណួរសួរថា តើរូបគេមានអារម្មណ៍យ៉ាងណា ក្រោយទទួលបានដំណឹងនេះ?

Timo Werner អបអរគ្រាប់បាល់ទាត់ចូល Spurs យប់មិញ

ខ្សែប្រយុទ្ធអាល្លឺម៉ង់ Werner បានឆ្លើយតបថា ៖«Liverpool ជាក្រុមល្អបំផុតក្នុងពិភពលោកនាពេលនេះ ហើយពេលខ្ញុំត្រូវបានគេភ្ជាប់ជាមួយក្រុមនេះ គឺធ្វើឱ្យខ្ញុំមានមោទកភាពខ្លាំងណាស់»។

ទោះបីជាយ៉ាងណា Werner ដែលស៊ុតបាន១១គ្រាប់ ក្នុង២៩ប្រកួតឱ្យអាល្លឺម៉ង់ និងត្រូវបានគេចាត់ទុកជាខ្សែប្រយុទ្ធដ៏គួរឱ្យចាប់អារម្មណ៍បំផុតនោះ បាននិយាយថា រូបគេនៅតែត្រូវការពង្រឹងសមត្ថភាពបន្ថែម ប្រសិនបើផ្លាស់ទៅទឹកដី Anfield របស់ Liverpool។

អតីតកីឡាករក្លឹប VfB Stuttgart បានបន្តថា ៖«វាជាក្ដីរីករាយ ប៉ុន្តែខ្ញុំដឹង Liverpool មានកីឡាករល្អៗច្រើន ហើយខ្ញុំត្រូវតែអភិវឌ្ឍខ្លួនឯង ត្រូវរៀនបន្ថែមរឿងជាច្រើនទៀត ដើម្បីដល់កម្រិតលេងនៅទីនោះ»។ គួរបញ្ជាក់ថាមួយគ្រាប់ RB Leipzig ឈ្នះ Tottenham Hotspur ១-០ យប់មិញ ជាគ្រាប់ទី២៦ របស់ Werner ក្នុងរដូវកាលនេះ។

ក្រៅពីក្លឹបហង្សក្រហម Liverpool ក្លឹបតោខៀវ Chelsea និងក្លឹបបិសាចក្រហម Manchester United ក៏ល្បីចង់បានខ្សែប្រយុទ្ធមុតស្រួចវ័យក្មេងរូបនេះដែរ៕

ប្រភព៖ BBC ប្រែសម្រួល៖ អ៊ុំ សុភក្តិ