ឃើញប្រវត្តិនេះហើយ អ្នកប្រាកដជាស្ញើចសរសើរ ម៉ា សេរី ដែលមានលើសពីអ្វីដែលធ្លាប់ដឹង

2017-02-10 02:21:48
ប្រដាល់

2017-02-10 02:21:48
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក ម៉ា សេរី ជាអ្នកផលិតកម្មវិធីកីឡាពោរពេញដោយបទពិសោធន៍និងគំនិតច្នៃប្រឌិត ព្រមទាំងជាពិធីករជើងចាស់ដ៏ល្បីល្បាញប្រកបដោយវោហារសាស្ត្រផ្នែក ខាងកីឡាប្រចាំ CBS ដែលទទួលបានការគាំទ្រយ៉ាងខ្លាំងពីសំណាក់មហាជនអ្នកស្នេហា វិស័យកីឡា។ លោកកើតនៅថ្ងៃទី១០ ខែ មេសា ឆ្នាំ១៩៦០ ក្នុងត្រកូលកសិករមួយស្ថិតក្នុងភូមិខ្នុរ ឃុំ ស្វាយអង្គ ស្រុកស្វាយរៀង ខេត្ត ស្វាយរៀងដែលមាន ឪពុកឈ្មោះ ម៉ា ជូ និងម្ដាយឈ្មោះពៅ អ៊ុត។ លោកជាកូនទី៦ក្នុងចំណោមបងប្អូន៧នាក់(ប្រុសទាំងអស់)។ បងប្រុសទី១ឈ្មោះ ម៉ា សារឿន បងប្រុសទី២ឈ្មោះ ម៉ា សារិន បានស្លាប់នៅសហរដ្ឋអាមេរិក បងប្រុសទី៣ឈ្មោះ ម៉ា សារ៉ន បងប្រុសទី៤ឈ្មោះ ម៉ា សារី និងបងប្រុសទី៥ឈ្មោះ ម៉ា សារ៉េត បានស្លាប់ក្នុងសម័យខ្មែរក្រហម និងប្អូនពៅឈ្មោះ ម៉ា សារ៉ាយ។

លោក ម៉ា សេរី ពេលធ្វើការឆ្នាំ២០១០

ស្នាដៃសំខាន់ខ្លះៗរបស់លោក ម៉ា សេរី

ការប្រកួតខ្សែក្រវាត់ S1 ពីរដង
ការប្រកួតរវាងកម្ពុជាជាមួយសហរដ្ឋអាមេរិកឆ្នាំ
ការប្រកួតរវាងកម្ពុជាជាមួយអូស្ត្រាលី
ការប្រកួតដណ្ដើមខ្សែក្រវាត់ពិភពលោក ISKA
ការប្រកួតរវាងកម្ពុជាជាមួយនូវែលហ្សេឡង់
ការប្រកួតពានរង្វាន់គុនខ្មែរអន្តរជាតិ
ការប្រកួតអន្តរជាតិនៅក្រុងបាវិត និងការប្រកួតជាមួយឡាវ
ការប្រកួតកំពូលជើងឯក អាស៊ាន
ប៉ុន្មានឆ្នាំចុងក្រោយកម្មវិធីប្រកួតដណ្តើមខ្សែក្រវាត់អន្តរជាតិជាច្រើនទៀត
ស្នាដៃក្នុងវិស័យសិល្បៈ

លោក ម៉ា សេរី (កាលនៅរស់) និងភរិយា (រូបថត៖ ម៉ា សេរី)

ឆ្នាំ ១៩៨២ លោកបានរៀបអាពាហ៍ពិពាហ៍ជាមួយនាង សុខ សុខុមជាអ្នកបញ្ចូលសំឡេងខ្សែភាពយន្តនៅស្ថានីយទូរទស្សន៍ប៉ុស្តិ៍ លេខ៥។ លោកមានកូន៥នាក់(ប្រុស៣ ស្រី២)សម្រាប់ជាចំណងដៃអាពាហ៍ពិពាហ៍។ កូនទី១ឈ្មោះ សេរី វិជ្ជាធន់ ភេទប្រុស កូនទី២ឈ្មោះ សេរី ហាន់នីកា ភេទស្រី កូនទី៣ឈ្មោះ សេរី ណាថាន ភេទប្រុស កូនទី៤ឈ្មោះ សេរី ទីតូ ភេទប្រុស និងកូនពៅឈ្មោះ សេរី ម៉ូនីតា ភេទស្រី។ កូនរបស់លោកទាំងអស់សុទ្ធតែមានការងារធ្វើដែលរហូតមកដល់ពេលនេះ គ្រួសាររបស់លោកមានជីវភាពសមរម្យនៅក្នុងសង្គម។

សេរី ជាបុគ្គលមួយរូបដែលស្រលាញ់ការសិក្សា។ លោកប្រសូតបានប្រមាណ៥ខែ ឪពុកម្ដាយរបស់លោកបានផ្លាស់មករស់នៅក្នុងភូមិ និមិត្ត ឃុំ គោល ស្រុកអូរជ្រៅ ខេត្តបាត់ដំបង (បច្ចុប្បន្នខេត្តបន្ទាយមានជ័យ)។ ទោះបីប្រទេសជាតិមានវិបត្តិនយោបាយយ៉ាងណាក៏ដោយ ក៏លោកនៅតែខិតខំព្យាយាមសិក្សារហូតបានចប់វិទ្យាល័យ។ កាលពីកុមារភាព សេរីបានចូលរៀននៅសាលាបឋមសិក្សានិមិត្ត ឃុំ គោល ស្រុក អូរជ្រៅ ខេត្ត បាត់ដំបង។ បន្ទាប់ពីបញ្ចប់បឋមសិក្សាយុវជន សេរី បានបន្តការសិក្សានៅអនុវិទ្យាល័យសម្ដេចឪ ស្រុក សិរីសោភ័ណ ខេត្តបាត់ដំបង់។ ក្រោយប្រឡងជាប់ឌីប្លូម យុវជន សេរី បានបន្តការសិក្សានៅវិទ្យាល័យ អៀប ឃុត សង្កាត់ រំចេកបួន ខណ្ឌ រតនៈ ក្រុងបាត់ដំបង។

ឆ្នាំ១៩៧៥ ជាពេលដែលលោកបានបញ្ចប់ការសិក្សាកម្រិតវិទ្យាល័យ ប៉ុន្តែដោយប្រទេសជាតិមានភាពវឹកវរ លោកមិនបានបន្តការសិក្សានៅមហាវិទ្យាល័យឡើយ។ កាលណោះលោកបានរសាត់ អណ្ដែតពីភូមិកំណើត ទៅរស់នៅជំរំ តាមបណ្ដោយព្រំប្រទល់ខ្មែរ-ថៃ។ សម័យនោះអង្គការសហប្រជាជាតិបានចុះជួយប្រជាពលរដ្ឋខ្មែរនៅតាម ព្រំដែន ហើយក៏ជាឱកាសសម្រាប់លោកបានរៀនភាសាបរទេស។ លោកក៏បានសិក្សាភាសាបារាំង និងថៃ។ ទីបំផុតលោកអាចប្រើប្រាស់ភាសាទាំងពីរនេះបានល្អគួរសម។ ក្រោយពេលអាចប្រើប្រាស់ភាសាបរទេសបាន លោកក៏មានឱកាសធ្វើការងារជាមួយអង្គការសហប្រជាជាតិ ក្នុងនោះក៏ធ្វើជាគ្រូបង្រៀនភាសាអង់គ្លេសផងដែរ។

លោក ម៉ា សេរី (រូបថត៖ ម៉ា សេរី)

ទន្ទឹមនឹងភាពល្វីងជូរចត់ក្នុងការរស់នៅតាមព្រំប្រទល់ខ្មែរ-ថៃ ជីវភាពរស់នៅក៏លំបាកតោកយ៉ាក ហើយរស់នៅទាំងព្រលឹងចុងសក់ពីមួយថ្ងៃទៅមួយថ្ងៃ។ ប៉ុន្តែយុវជន សេរីនៅតែមានឆន្ទៈជាប់ចិត្តចំពោះអក្សរសាស្ត្រ លោកក៏បានចាប់ស្លាបប៉ាកកាសរសេររឿងប្រលោមលោកលក់ជាភាគ។ លោកបានសរសេររឿងចេញលក់ ឬជួលជាភាគដាក់តាមតូបសៀវភៅនានាជារៀង រាល់ថ្ងៃចន្ទ-ពុធ បើប្រៀបធៀបនាពេលបច្ចុប្បន្នដូចអ្វីដែលយើងតាមដានទស្សនាខ្សែ ភាពយន្តភាគទូរទស្សន៍ដូច្នោះដែរ។ លោកនិពន្ធរឿងប្រលោមលោកបានពីររឿង ទីមួយរឿង មច្ចុរាជម្រាមប្រាំបី និងទីពីររឿង ខ្សែជីវិតខ្ញុំ។ ពេលខ្លះលោកបានបញ្ជាក់ថា “មានប្រិយមិត្តអ្នកអានចង់យល់ដឹងសាច់រឿងរហូតដល់ទៅអង្គុយមើល លោកសរសេរទៀតផង ខណៈពេលលោកសរសេរមិនទាន់ឬប្រិយមិត្តអស់សាច់រឿងអានបន្តទៀត។ ក្រៅពីទទួលបានប្រាក់ខែក្នុងការបម្រើការងារជាមួយអង្គការ សហប្រជាជាតិ លោកក៏អាចរកប្រាក់បានខ្លះៗពីការលក់ឬជួលអត្ថបទរឿងប្រលោមលោក។ លើសពីការនិពន្ធរឿងប្រលោមលោក លោកម៉ា សេរីក៏ធ្លាប់បាននិពន្ធបទចំរៀងឲ្យផលិតកម្មខ្លះៗនៅក្នុងរាជ ធានីភ្នំពេញផងដែរ។

ជីវិតក្នុងវិស័យកីឡា

លោក ម៉ា សេរី បានរៀបអាពាហ៍ពិពាហ៍ពិពាហ៍ជាមួយភរិយាដែលមានកំណើតនៅរាជធានីភ្នំពេញ ប៉ុន្តែលោកមិនបានមករស់នៅទីក្រុងភ្នំពេញភ្លាមៗនោះទេ។ លោកគិតថា លោកមិនដឹងថា ត្រូវប្រកបការងារអ្វីនោះទេ ទោះជា ភរិយារបស់លោកបានបញ្ចុះបញ្ចូល និងហាក់ដូចមានសំណាងផងនោះ ដូចពាក្យចាស់លោកពោលថា “សំណាបយោងដីស្រីយោងប្រុស” ដល់ឆ្នាំ១៩៩៣ លោកក៏សម្រេចមករស់នៅទីក្រុងភ្នំពេញតាមភរិយា ក្រោយពីរៀបការមានបុត្រ៥នាក់ហើយនោះ។ បន្ទាប់ពីបានមកដល់ទឹកដីរាជធានីភ្នំពេញ លោកពុំទាន់មានការងារអ្វីច្បាស់លាស់នៅឡើយទេ ប៉ុន្តែភរិយារបស់លោកបានចូលបម្រើការងារនៅនាយកដ្ឋានភាពយន្តនៃក្រសួងវប្បធម៌ និងវិចិត្រសិល្បៈ។ លើសពីនេះទៀតភរិយារបស់លោកក៏បានចូលបម្រើការងារជាអ្នកបញ្ចូល សំឡេងខ្សែភាពយន្តនៅស្ថានីយទូរទស្សន៍ប៉ុស្តិ៍លេខ៥។ ពេលនោះភរិយារបស់លោកក៏បានឲ្យលោកធ្វើការជាអ្នកបកប្រែខ្សែភាព យន្ត ពីព្រោះលោកចេះភាសាបរទេស។ លោកបានធ្វើការជាអ្នកប្រែខ្សែភាពយន្តសម្រាប់ដាក់បញ្ចាំងតាម ស្ថានីយទូរទស្សន៍ និងរោងភាពយន្តនានា។

ក្រោយមក លោកឈប់ធ្វើការជាអ្នកបកប្រែហើយចូលបម្រើការងារជាមួយអ៊ុនតាក់។ បន្ទាប់ពីឈប់ធ្វើការជាមួយអ៊ុនតាក់ លោកក៏ធ្វើការជាអ្នកបកប្រែវិញ។ ឆ្នាំ១៩៩៦ ភរិយារបស់លោកបានណែនាំលោកឲ្យចូលធ្វើការជាអ្នកបកប្រែនៅ ទូរទស្សន៍ប៉ុស្តិ៍លេខ៥។ ចាប់តាំងពីពេលនោះមក ការងាររបស់លោកកាន់តែរីកចម្រើនជាលំដាប់។ ក្រៅពីការងារជាអ្នកបកប្រែខ្សែភាពយន្ត ស្ថានីយទូរទស្សន៍ប៉ុស្តិ៍លេខ៥តែងតែប្រើលោកឲ្យធ្វើការងារក្រៅពី ការងារជាអ្នកបកប្រែ ហើយលោកក៏មានសមត្ថភាពធ្វើបាន។ លោកអាចប្រើប្រាស់ភាសាថៃ និងបារាំងបានយ៉ាងល្អ ពីព្រោះលោកធ្លាប់បានសិក្សាកាលនៅជំរំ និងធ្លាប់បានធ្វើការជាមួយអង្គការសហប្រជាជាតិ ព្រមជាមួយនឹងបទពិសោធន៍ជាអ្នកនិពន្ធរឿងផងនោះ ធ្វើឲ្យលោកប្រើប្រាស់ពាក្យពេចន៍បានយ៉ាងល្អក្នុងការបកប្រែខ្សែ ភាពយន្ត និងកិច្ចការផ្សេងៗទៀត។

ការងារជាពិធីករ និងអ្នកផលិតកម្មវិធីកីឡាដូច លោកម៉ា សេរីពុំដែលមានបំណងចង់ធ្វើឡើយ។ ក្ដីស្រមៃរបស់លោកចង់ក្លាយជាអ្នកកាសែត និងជាមន្ត្រីការទូត ប៉ុន្តែអ្វីដែលលោកប៉ងប្រាថ្នាមិនបានសម្រេចដូចបំណងឡើយ។ ពេលលោកកំពុងបម្រើការងារនៅស្ថានីយទូរទស្សន៍ប៉ុស្តិ៍លេខ៥ មានពេលមួយនោះកម្មវិធីកីឡាបាល់ទាត់ដែលមានការផ្សាយបន្តផ្ទាល់ ប៉ុន្តែពិធីករអវត្តមាន ដូច្នេះហើយគេក៏ជ្រើសរើសរូបលោកឲ្យជំនួសមួយពេលសិន។ ពេលនោះលោកប្រើប្រាស់ពាក្យបច្ចេកទេសបានយ៉ាងល្អដែលធ្វើឲ្យខាង ប៉ុស្តិ៍លេខ៥ ក៏ដូចជាទស្សនិកជនមានការចាប់អារម្មណ៍យ៉ាងខ្លាំងចំពោះសមត្ថភាពជា ពិធីករបាល់ទាត់។ ប៉ុន្តែទស្សនិកជនមិនទាន់បានស្គាល់ឈ្មោះលោកនៅឡើយទេ ទស្សនិកជនស្គាល់ត្រឹមតែពិធីករតាស្រមូមតែប៉ុណ្ណោះ ព្រោះលោកមិនបានត្រៀមលក្ខណៈសម្បត្តិទុកជាមុនដូចជាកោរពុកមាត់ ឡើយ។

លោក ម៉ា សេរី ស្រលាញ់ពេញចិត្តយ៉ាងខ្លាំងចំពោះវិស័យកីឡា ជាពិសេសកីឡាបាល់ទាត់។ ពេលលោករស់នៅរសាត់អណ្ដែតតាមទល់ដែន និងចូលទៅរស់ក្នុងទឹកដីប្រទេសថៃ លោកតែងតែមើលកម្មវិធីប្រកួតបាល់ទាត់ ដូច្នេះហើយទើបបានជាលោកស្គាល់ប្រវត្តិកីឡាករបាល់ទាត់ និងក្រុមបាល់ទាត់នានានៅអឺរ៉ុប។ កត្តាទាំងនេះហើយដែលជាមូលដ្ឋានគ្រឹះដ៏រឹងមាំនាំឲ្យលោកក្លាយ ជាពិធីករដ៏ល្បីល្បាញនៅស្ថានីយទូរទស្សន៍ប៉ុស្តិ៍លេខ៥។

ឆ្នាំ២០០៣ លោកម៉ា សេរី បានចេញពីស្ថានីយទូរទស្សន៍ប៉ុស្តិ៍លេខ៥ ទៅបម្រើការងារនៅបណ្ដាញទូរទស្សន៍កម្ពុជា ស៊ីធីអិន។ ក្រោមម្លប់ដំបូលនៃស្ថានីយទូរទស្សន៍កម្ពុជា ស៊ីធីអិន រឹតតែធ្វើឲ្យលោក បញ្ចេញស្នាដៃគួរឲ្យកោតសរសើរក្នុងការផលិតកម្មវិធីកីឡាថ្មីៗ។ នៅទីនោះ លោកទទួលបានការគាំទ្រយ៉ាងខ្លាំងក្នុងការបង្កើតកម្មវិធីកីឡា។ លោកជាអ្នកគ្រប់គ្រងកម្មវិធីកីឡាទាំងអស់នៅស្ថានីយទូរទស្សន៍ ស៊ីធីអិន ដូចជាព័ត៌មានកីឡាប្រចាំថ្ងៃ ប្រដាល់ក្បាច់គុនខ្មែរបុរាណពីថ្ងៃសុក្រ-អាទិត្យ កីឡាក្នុងស្រុក និងក្រៅស្រុកដែលត្រូវផ្សាយបន្តផ្ទាល់។

លោកបានសហការជាមួយសហព័ន្ធកីឡាប្រដាល់កម្ពុជារៀបចំការ ប្រកួតអន្តរជាតិបានជាច្រើនទាំងការប្រកួតមិត្តភាពអន្តរជាតិ ការប្រកួតដណ្តើមខ្សែក្រវាត់ជាតិ និងអន្តរជាតិ។ ឆ្នាំ២០០៥ ការប្រកួតខ្សែក្រវាត់ S1 ពីរដង ឆ្នាំ២០០៦ ការប្រកួតរវាងកម្ពុជាជាមួយសហរដ្ឋអាមេរិក ឆ្នាំ ២០០៧ ការប្រកួតរវាងកម្ពុជាជាមួយអូស្ត្រាលី ឆ្នាំ២០០៨ ការប្រកួតរវាងកម្ពុជាជាមួយនូវែលហ្សេឡង់ និងខ្សែក្រវាត់ពិភពលោក ISKA ឆ្នាំ២០០៩ ការប្រកួតពានរង្វាន់គុនខ្មែរអន្តរជាតិ និងឆ្នាំ២០១០ ការប្រកួតអន្តរជាតិនៅក្រុងបាវិត ការប្រកួតជាមួយឡាវ និងប៉ុន្មានឆ្នាំចុងក្រោយនេះរៀបចំការប្រកួតដណ្តើមខ្សែក្រវាត់អន្តរជាតិជាច្រើន។

ក្រៅពីវិស័យកីឡា លោក ម៉ា សេរីបានបន្សល់ទុកស្នាដៃក្នុងវិស័យសិល្បៈជាច្រើនក្នុងនោះការនិពន្ធបទចម្រៀងចន្លោះពី២០ទៅ៣០បទ។ តារាចម្រៀងដែលធ្លាប់ច្រៀងស្នាដៃនិពន្ធរបស់លោកមានដូចជា លោក ឈឿន ឧត្ដម ជិន សេរីយ៉ា លោក សេន រ៉ានុត កញ្ញា សុគន្ធ និសា ជាដើម។

ទោះជាជីវិតធ្លាក់ខ្លួនឈឺ ក៏លោកម៉ា សេរីនៅតែមិនទាន់អស់ចិត្តនៅឡើយក្នុងការបម្រើទស្សនិកជនដែលស្រលាញ់ពេញចិត្តចំពោះកីឡា។ សំដីចុងក្រោយរបស់លោកគឺ រាល់ពេលដែលមានអ្នកធម្មតាមកសួរសុខទុក្ខលោកច្រើននៅមន្ទីរពេទ្យ លោកមានអារម្មណ៍ធម្មតា។ ប៉ុន្តែនៅពេលណាដែលបានឃើញកីឡាករប្រដាល់មកសួរសុខទុក្ខវិញ លោកតែងតែអួលដើមករហូត ហើយពេលខ្លះទឹកភ្នែកក៏ស្រក់មកដោយមិនដឹងខ្លួន។ លោកស្រលាញ់វិស័យកីឡាប្រដាល់ណាស់ ព្រោះវាជាដួងព្រលឹងជាតិខ្មែរ ដោយលោករំពឹងថាថ្ងៃណាមួយវិស័យនេះនឹងលើកមុខមាត់ជាតិជាក់ជាមិនខាន។ លោកបានទទួលមរណភាពដោយរោគជរាពាធកាលពីព្រឹកថ្ងៃទី៨ ខែកុម្ភៈ ឆ្នាំ២០១៧ក្នុងវ័យ៥៦ឆ្នាំ៕

អត្ថបទ៖ ជាន ចាន់រ៉ា