- 2020-11-12 07:51:10
- បាល់ទាត់
ឆ្នាំ២០២១ខ្សែប្រយុទ្ធ ឱ ភារុណ ដាក់គោលដៅធំមួយនៅបឹងកេត
- 2020-11-12 07:51:10
- ចំនួនមតិ 0 | ចំនួនចែករំលែក 0
ឆ្នាំ២០២១ខ្សែប្រយុទ្ធ ឱ ភារុណ ដាក់គោលដៅធំមួយនៅបឹងកេត
ចន្លោះមិនឃើញ
ឱ ភារុណ ក្នុងដូវកាលឆ្នាំ២០២០ បានបង្ហាញខ្លួនច្រើនគួរសមឱ្យក្លឹបបាល់ទាត់បឹងកេត បើធៀបនឹងរដូវកាលមុនៗ ហើយសមត្ថភាពរបស់គេក៏កើនឡើងមួយកម្រិតដែរ។
ទោះរដូវកាលនេះលេងបានញឹកញាប់ និងមានបទពិសោធន៍ក្នុងការប្រកួតច្រើន ប៉ុន្តែឆ្នាំ២០២១ខាងមុខ កីឡាករមកពីខេត្តបន្ទាយមានជ័យ បានដាក់គោលដៅធំមួយគឺ ធ្វើយ៉ាងណាបង្ហាញខ្លួនឱ្យច្រើនជាងរដូវកាលមុន។
ខ្សែប្រយុទ្ធស្លាបដដែលបានសង្កត់ធ្ងន់ថា ៖«បាទបងក្នុងឆ្នាំ២០២១ គោលដៅធំរបស់ខ្ញុំនៅក្លឹប គឺលេងឱ្យបានញឹកញាប់ជាមុនបង»។
ដើម្បីប្រជែងយកជម្រើស១១នាក់ដំបូង និងលេងឱ្យបានញឹកញាប់ យុវជនវ័យ២១ឆ្នាំ ប្ដេជ្ញាថាខ្លួននឹងខិតខំប្រឹងប្រែង ហ្វឹកហាត់ខ្លួនឯងបន្ថែមឱ្យអស់ពីលទ្ធភាព ជាពិសេសហ្វឹកហាត់ផ្នែកកម្លាំង និងការបញ្ចប់ទី ដែលគេធ្វើមិនសូវបានល្អ។
នៅពេលសួរថា ផ្អែកលើទេពកោសល្យ និងសម្ថភាពកំពុងមាន តើភារុណរំពឹងនឹងជាប់ជម្រើសជាតិដែរឬទេនាពេលខាងមុខ?
អតីតយុវជនជម្រើសជាតិកម្ពុជា អាយុក្រោយ១៩ឆ្នាំ AFF U19 Championship បានឆ្លើយតបថារូបគេក៏រំពឹងដែរ ប៉ុន្តែអ្វីដែលសំខាន់គឺ គេត្រូវខំប្រឹងបង្ហាញសមត្ថភាពឱ្យល្អនៅក្លឹបជាមុនសិន ដើម្បីឱ្យគ្រូជម្រើសជាតិលោកមើលឃើញ។
ឱ ភារុណ រៀបរាប់បន្តថា ៖«ហ្នឹងបង! ចំពោះឱកាសជម្រើសជាតិវិញ គឺខ្ញុំក៏រំពឹងដែរ តែខ្ញុំព្យាយាមដំបូងបំផុត គឺខ្ញុំព្យាយាមផ្ដោតជាមួយក្លឹប ដើម្បីឱ្យបានលេងច្រើន ឱ្យគ្រូគាត់ឃើញអីទៅ បានមានឱកាស»។
គួរបញ្ជាក់ថាកីឡាករជំនាញជើងឆ្វេង ឱ ភារុណ បានចូលឈុតធំបឹងកេតក្នុងឆ្នាំ២០១៦ និងបន្តរហូតដល់រហូតដល់បច្ចុប្បន្ន ហើយគេធ្លាប់ជួយឱ្យក្លឹបបឹងកេតលើកពានលីគកំពូលកម្ពុជា២លើក (ឆ្នាំ២០១៧ និងឆ្នាំ២០២០ថ្មីៗនេះ) និងពានសម្ដេចអគ្គមហាសេនាបតីតេជា ហ៊ុន សែន១លើក៕