Haaland Vs Lewandowski, រឿងត្រូវដឹងពីជំនួប Dortmund ប៉ះ Bayern យប់នេះ

2020-05-26 05:01:55
បាល់ទាត់

2020-05-26 05:01:55
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅម៉ោង១១:៣០នាទីយប់នេះ ក្រុម Dortmund នឹងត្រូវតតាំងជាមួយក្រុម Bayern Munich ក្នុងការប្រកួតក្របខណ្ឌ Bundesliga សប្ដាហ៍ទី២៨។

សម្រាប់ការប្រកួតធំជាងគេនៅអាល្លឺម៉ង់នេះដែរ Sabay នឹងលើកយកចំណុចមួយចំនួនមកវិភាគជូនអ្នកគាំទ្រ ក្រៅពីចំណុចដែលគេផ្ដោតខ្លាំងលើ Haaland Vs Lewandowski៖

ពីក្រុមទាំងពីរ៖

Dortmund និង Bayern Munich រកបាន៦ពិន្ទុពេញដូចគ្នាក្នុងការប្រកួត២ប្រកួតកន្លងមកនេះ និងឈ្នះដាច់គូប្រកួតដូចគ្នាផងដែរ។ ទម្រង់លេងរបស់ក្រុមទាំងពីរនេះ ហាក់ដូចជាល្អខ្លាំងដូចគ្នាតែម្ដង ត្បិតអីពួកគេរៀបចំក្រុមបានល្អ ជាពិសេស Dortmund ក្រោយពីទិញយក Haaland មក ទទួលបានជ័យជម្នះជាប់ជានិច្ច។ តែបើមើលប្រវត្តិប្រកួតវិញ Dortmund មិនសូវជាឈ្នះច្រើនឡើយ ទល់ក្រុម Bayern Munich នេះ។ ជាក់ស្ដែង ៦ប្រកួតចុងក្រោយ Bayern យកបាន៥ប្រកួតទៅហើយ។

កីឡាកររបួស៖

Dortmund មានកីឡាកររបួសច្រើន។ Marco Reus, Nico Schulz និង Dan-Axel Zagadou សុទ្ធតែអវត្តមានសម្រាប់ការប្រកួតនេះ ដោយសារតែបញ្ហារបួស។ ស្របពេល Axel Witsel ក៏មិនទាន់ច្បាស់ថាបានលេងឬអត់នោះដែរ។ អ្វីដែលល្អវិញនោះ Hummels ទំនងជាអាចលេងការពារសំណាញ់ទីវិញបានហើយ ខណៈដែល Sancho ក៏ដូចគ្នា អាចលេងបាន។

សម្រាប់ Bayern Munich វិញ ពួកគេអវត្តមានកីឡាករសំខាន់៤នាក់ដែរ គឺ Phillipe Coutinho , Corentin Tolisso, Niklas Sule និង Thiago សុទ្ធតែរបួសមិនអាចលេងបានទេ។

ជម្រើស១១នាក់ដំបូងដែលអាច៖

Dortmund : Burki; Piszczek, Hummels, Akanji; Hakimi, Can, Brandt, Guerreiro; Sancho, Haaland, Hazard

Bayern Munich : Neuer; Pavard, Boateng, Alaba, Davies; Kimmich, Goretzka; Gnabry, Muller, Coman; Lewandowski

ប្រៀបធៀបខ្សែប្រយុទ្ធ៖

Haaland របស់ Dortmund តាំងពីផ្លាស់មកលេងនៅក្រុមនេះមក រូបគេរកបានគ្រាប់បាល់បាន១០គ្រាប់ក្នុងការបង្ហាញខ្លួន១០ប្រកួត។ ដូច្នេះប្រកួតណាក៏គេរកបានដែរ។ តែបើធៀបជាមួយLewandowski វិញ ខ្សែប្រយុទ្ធ Bayern Munich រូបនេះ គឺជាម៉ាស៊ីនរកគ្រាប់បាល់ឱ្យនេះហើយ។ Lewandowski រកបាន៤១គ្រាប់ក្នុងការបង្ហាញគ្រប់ការប្រកួតនៅរដូវកាលនេះ។ ២ប្រកួតកន្លងមក ក៏គេរកគ្រាប់បាល់បានដែរ។

គិតថាប្រកួតនេះស្មើគ្នា ២-២ ៖

ហេតុផលដែលយកស្មើគ្នានេះ គឺដោយសារតែក្រុមទាំងពីរលេងល្អដូចគ្នានៅរដូវកាលនេះ។ ស្របពេលប្រកួតកន្លងមក ពួកគេកម្រគ្មានគ្រាប់បាល់ណាស់ ដោយសារតែតំបន់ប្រយុទ្ធល្អនិងក្របខណ្ឌ Bundesliga នេះ តែងតែលេងបុកគ្នាខ្លាំង។ នៅរដូវកាលនេះ អាចនិយាយបានថាក្រុម Dortmund និង Bayern Munich មានកម្រិតលេងមិនលើសមិនខ្វះគ្នាឡើយ។ លទ្ធផលស្មើគ្នាគឺជាជម្រើសល្អបំផុតសម្រាប់ការប្រកួតនេះ៕

អត្ថបទ៖ វ៉ាន់ សក្ដិ