- 2017-06-16 07:08:00
- បាល់ទាត់
ក្រុមជើងឯកក្រចេះ ណាត់ជួបក្រុមជើងឯករតនគីរី មិត្តភាពអាទិត្យនេះ
- 2017-06-16 07:08:00
- ចំនួនមតិ 0 | ចំនួនចែករំលែក 0
ក្រុមជើងឯកក្រចេះ ណាត់ជួបក្រុមជើងឯករតនគីរី មិត្តភាពអាទិត្យនេះ
ចន្លោះមិនឃើញ
ក្នុងគោលដៅបំផុសវិស័យកីឡាក្នុងខេត្តរៀងៗខ្លួន និងពង្រឹងគុណភាពបាល់ទាត់នៅភូមិភាគឦសានក្រុមបាល់ទាត់ ASEAN FC ជើងឯកប្រចាំខេត្តរតនគីរី និង Kratie FC ជើងឯកប្រចាំខេត្តក្រចេះ បានព្រមគ្នាពាក់មុខយក្សមិត្តភាពនៅទឹកដីខេត្តក្រចេះ។
នេះជាការប្រកួតជើង២ដែលក្រុមជើងខ្លាំងទាំងពីរជួបគ្នា ខណៈការប្រកួតកាលពីលើកទី១នៅទឹកដីខេត្ត រតនគីរី ក្រុមម្ចាស់ផ្ទះបានត្រឹមស្មើជាមួយក្រុមភ្ញៀវតែប៉ុណ្ណោះ។ យុវជន ខាន់ ទី អ្នកនាំលេង របស់ក្រុមបាល់ទាត់ Kratie FC បាននិយាយថា មែនទែនទៅ ក្រុម ASEAN ជាក្រុមខ្លាំង ដូចច្នេះរូបគេ និងមិត្តរួមក្រុមត្រូវប្រឹងប្រែង និងប្រុងប្រយ័ត្នខ្ពស់។
ជាមួយគ្នានេះ ថ្នាក់ដឹកនាំក្រុមបាល់ទាត់ Kratie FC និងកីឡាករទាំងអស់សូមសំណូមពរដល់អ្នកស្រលាញ់កីឡាក្នុងខេត្ត និងយុវជនដែលតែងគាំទ្របាល់ទាត់ សូមចូលទស្សនាឲ្យបានច្រើនដើម្បីលើកទឹកចិត្តដល់ការប្រកួតនេះ ព្រោះកាលទៅលេងនៅរតនគីរីអ្នកគាំទ្រចូលរួមទស្សនាច្រើន។
ដោយឡែកលោក យាន សិយាង ប្រធានក្រុមបាល់ទាត់ ASEAN FC ថា ការប្រកួតនេះមានសារៈសំខាន់ណាស់ដើម្បីចូលរួមចំណែកពង្រឹងគុណភាពបាល់ទាត់ក្នុងខេត្តលោក ជាពិសេសរឹតចំណងសាមគ្គីភាពរវាងខេត្តទាំងពីរ។ លោកមានបំណងណាត់ក្រុមជើងឯកតាមខេត្តក្នុងតំបន់រួមមាន ខេត្តរតនគីរី ស្ទឹងត្រែង ក្រចេះ មណ្ឌលគីរី និងត្បូងឃ្មុំ(មេមត់) ដើម្បីប្រកួតមិត្តភាពវិលជុំដើម្បីបំផុសចលនាវិស័យកីឡាបាល់ទាត់នៅតំបន់ភូមិភាគឦសានឲ្យមានការរីកចំរើន។ ទោះបីជាយ៉ាងណាលោកពុំដឹងថាអាចដំណើរការបាន ឬយ៉ាងណានោះទេ ពីព្រោះមិនទាន់មានលទ្ធភាពនិងការឧបត្ថម្ភរៀបចំ។ គំនិតនេះគឺមានការគាំទ្រផងដែរពីក្រុមជើងឯកខេត្តស្ទឹងត្រែង ( ECHO FC) និង ក្រុម NADIN FC ស្រុកមេមត់។
ការប្រកួតមិត្តភាពឆ្លងខេត្តរវាងក្រុមទាំងពីរនេះនឹងប្រព្រឹត្តនៅទីលានខេត្តក្រចេះ វេលាម៉ោង៣រសៀល៕
