- 2017-06-13 08:06:01
- ព័ត៌មាន
ហែមថុន វិទីនី ជិតឈប់ពីអាជីពកីឡាហែលទឹកហើយ
- 2017-06-13 08:06:01
- ចំនួនមតិ 0 | ចំនួនចែករំលែក 0
ហែមថុន វិទីនី ជិតឈប់ពីអាជីពកីឡាហែលទឹកហើយ
ចន្លោះមិនឃើញ
កីឡាការិនីហែលទឹកជម្រើសជាតិកម្ពុជាដែលបានបំបែកកំណត់ត្រារបស់ខ្លួនក្នុងព្រឹត្តិការណ៍ប្រកួតកីឡាអូឡាំពិក រដូវក្តៅនៅទីក្រុងរីយ៉ូប្រទេសប្រេស៊ីល ហែមថុន វិទិនី គ្រោងបញ្ចប់អាជីពរបស់ខ្លួន ក្រោយចប់កីឡាស៊ីហ្គេមឆ្នាំ២០១៧នៅប្រទេសម៉ាឡេស៊ីពីថ្ងៃទី៩ ដល់៣០ ខែសីហា។
ហែមថុន វិទីនី បាននិយាយថា ៖«នេះជាឆ្នាំចុងក្រោយហើយសម្រាប់ខ្ញុំ ដែលត្រូវលាឈប់ពីអាជីពហែលទឹក ដោយទុកឱកាសដល់អត្តពលិកជំនាន់ក្រោយបានបញ្ចេញស្នាដៃវិញម្តង។ មួយវិញទៀតខ្ញុំ ចង់បង្កើតក្លឹបហែលទឹកផ្ទាល់ខ្លួនដើម្បីចូលរួមប្រកួតប្រជែងដណ្តើមមេដាយក្នុងឆ្នាំ២០២៣ពេលកម្ពុជាធ្វើជាម្ចាស់ផ្ទះកីឡាស៊ីហ្គេមលើកទី៣២»។
ពេលសួរថា ហេតុអ្វីបានឈប់ពីអាជីពមួយនេះ? វិទីនីបានឆ្លើយថា កញ្ញាមានអាយុកាន់តែច្រើន ដូចនេះគឺចង់បញ្ចប់អាជីពត្រឹមឆ្នាំនេះ។ ម្យ៉ាងទៀតកញ្ញាចង់បទពិសោធន៍ច្រើនឆ្នាំដើម្បីបង្ហាត់បង្រៀនដល់យុវជនជំនាន់ក្រោយ និងទុកឱកាសឲ្យប្អូនៗជំនាន់ក្រោយវិញម្តងសម្រាប់ការប្រកួតថ្នាក់ជាតិនិងអន្តរជាតិ។ ជាងនេះទៀតនោះ សហព័ន្ធកីឡាហែកទឹកកម្ពុជាក៏មានកីឡាការិនី ដែលមានសមត្ថភាពច្រើននាក់ ហើយពួកគេមួយចំនួនមានកាយសម្បទា និងសមត្ថភាពខ្ពស់ផងដែរ។
ហែមថុន វិទីនីបន្ថែមថា កីឡាហែលទឹក គឺមិនងាយស្រួលដូចកីឡាដទៃទៀតឡើយ ជាពិសេសសម្រាប់ស្ត្រីភេទ ពីព្រោះត្រូវការប្រើកម្លាំងកាយទាំងស្រុងតែម្តងដើម្បីហែល។ យ៉ាងណាអ្វីដែលជាគោលដៅចម្បងក្រោយពេលបញ្ឈប់អាជីពជាអ្នកហែលទឹកនេះទៅ កញ្ញាចង់ប្រមូលផ្ដុំ និងបណ្ដុះក្មេងៗជំនាន់ក្រោយឲ្យធ្វើការហ្វឹកហាត់។ បច្ចុប្បន្ននេះសំបូរអ្នកចាប់អារម្មណ៍កីឡាហែលទឹកច្រើន និងជាពិសេសគឺមានថ្នាក់ដឹកនាំជាច្រើនបានងាកមកជួយជ្រោមជ្រែងវិស័យកីឡា។
កីឡាការិនី ហែលទឹកជម្រើសជាតិកម្ពុជា វិទីនី ធ្លាប់បានបំបែកកំណត់ត្រាចាស់របស់ខ្លួនក្នុងព្រឹត្តិការណ៍កីឡាអូឡាំពិក ដោយប្រើថេរៈវេលា២៩.៣៧វិនាទី នាការប្រកួតវិញ្ញាសាហែលទឹក ដែលមានការចូលរួមពីកីឡាការិនីសរុប៩២នាក់នៅអាងទឹក Barra Olympic Park នាទីក្រុងរីយ៉ូប្រទេសប្រេស៊ីល កាលពីចុងឆ្នាំ២០១៦កន្លងទៅ៕
ហែមថុន វិទីនី និយាយពីជុំវិញអាជីពហែលទឹក
