- 2017-02-08 07:39:30
- ព័ត៌មាន
ម្ចាស់មេដាយមាសអាស៊ានប៉ារ៉ាហ្គេម ប៉ុង ហុង ធូរស្រាលពីជំងឺតែប្រពន្ធថា...
- 2017-02-08 07:39:30
- ចំនួនមតិ 0 | ចំនួនចែករំលែក 0
ម្ចាស់មេដាយមាសអាស៊ានប៉ារ៉ាហ្គេម ប៉ុង ហុង ធូរស្រាលពីជំងឺតែប្រពន្ធថា...
ចន្លោះមិនឃើញ
កីឡាករអត្តពលកម្មជនពិការដែលបានឈ្នះមេដាយមាសពីព្រឹត្តិការណ៍អាស៊ានប៉ារ៉ាហ្គេមឆ្នាំ២០១៥ ប៉ុង ហុង បានវះកាត់ជំងឺស្អិតពោះវៀនបានជោគជ័យ និងមានអាការៈធូរស្រាលជាងមុន ប៉ុន្តែប្រពន្ធរបស់គេថា គ្មានលុយមួយរៀលសម្រាប់ការចាយវាយផ្សេងៗកំឡុងសម្រាកមន្ទីរពេទ្យ។
អ្នកស្រី វិ ចន្ថា ប្រពន្ធរបស់កីឡាករ ប៉ុង ហុង បានឲ្យដឹងថា ប្ដីរបស់អ្នកស្រីបានធូរស្រាលច្រើនហើយ បន្ទាប់វះកាត់រួចរាល់ ថ្លៃវះកាត់ និងថ្លៃថ្នាំដែលប្រើក្នុងមន្ទីរពេទ្យគឺមន្ទីរពេទ្យមិនបានគិតប្រាក់ឡើយ។ ប៉ុន្តែអ្នកស្រីបង្ហើបថា គ្រួសារអ្នកស្រីក្រណាស់សូម្បីប្រាក់សម្រាប់ចាយវាយផ្សេងៗ ក្នុងកំឡុងប្ដីសម្រាកនៅមន្ទីរពេទ្យក៏ខ្វះខាតដែរ។
កីឡាការិនីជនពិការរូបនេះបន្ថែមថា រាល់ថ្ងៃស្នាក់នៅផ្ទះជួល និងចាយវាយពឹងផ្អែកលើមុខរបរដេរខោអាវតិចតួច។ សម្រាប់រយៈពេលសម្រាកបន្តក្នុងមន្ទីរពេទ្យអ្នកស្រីមិនទាន់ដឹងប្រាកដទេ ព្រោះគ្រូពេទ្យមិនទាន់ឲ្យដឹង ចំពោះលុយកាក់ក្នុងខ្លួនក៏ជិតអស់ដែរ។
អ្នកស្រីនិយាយទាំងអួលដើមកថា សំណាងមែនទែនដែលក្រុមគ្រូពេទ្យមិនគិតថ្លៃវះកាត់ និងថ្នាំ ពុំដូចនោះទេអ្នកស្រីគ្មានប្រាក់បង់ជូនមន្ទីរពេទ្យឡើយ។ រហូតមកដល់ពេលនេះមានឯកឧត្ដម យី វាសនា អគ្គលេខាធិការគណៈកម្មាធិការជាតិប៉ារ៉ាឡាំពិកកម្ពុជាឧបត្ថម្ភ ៥០ដុល្លារ និងក្រុមកីឡាករជនពិការជួយឧបត្ថម្ភបន្តិចបន្តួចប៉ុណ្ណោះ។
បច្ចុប្បន្នកីឡាករ ប៉ុង ហុង កំពុងសម្រាកព្យាបាលនៅមន្ទីរពេទ្យព្រះកុសុមៈ (ពេទ្យលោកសង្ឃ) ។ ខណៈមេដាយដែលកីឡាកររូបនេះដណ្ដើមបាននៅប្រទេសសិង្ហបុរី នាខែធ្នូ ឆ្នាំ២០១៥ក្នុងព្រឹត្តិការណ៍ Sea Para Games គឺមានចំនួនពីរគ្រឿងមាសមួយ និងសំរឹទ្ធិមួយគ្រឿង៕
